Gujarat Unseasonal Rain Alert : ગુજરાતમાં કાળઝાળ ગરમી વચ્ચે હવે કુદરતનો બીજો મિજાજ જોવા મળી રહ્યો છે. હવામાન વિભાગે રાજ્યમાં આગામી 18 થી 20 માર્ચ સુધી કમોસમી વરસાદ (Unseasonal Rain) અને ભારે પવન ફૂંકાવાની ગંભીર આગાહી કરી છે. પશ્ચિમ વિક્ષેપ અને સાયક્લોનિક સર્ક્યુલેશન એમ બે-બે સિસ્ટમ એકસાથે સક્રિય થતા રાજ્યભરમાં વરસાદી માહોલ જામશે.
બે-બે સિસ્ટમ સક્રિય, આખું Gujarat ધમરોળાશે
હવામાન વિભાગના જણાવ્યા અનુસાર, અપર એર સાયક્લોનિક સર્ક્યુલેશન સિસ્ટમ સક્રિય થઈ છે, જેની સીધી અસર હાલ ગુજરાત પર જોવા મળી રહી છે. આ સિસ્ટમને કારણે ખાસ કરીને ઉત્તર ગુજરાત અને કચ્છના વિસ્તારોમાં ગાજવીજ સાથે વરસાદ પડવાની સૌથી વધુ શક્યતા છે. આ ઉપરાંત, મધ્ય અને દક્ષિણ ગુજરાતમાં પણ વાદળછાયું વાતાવરણ રહેશે અને છૂટાછવાયા વરસાદી ઝાપટાં પડી શકે છે. જ્યારે સૌરાષ્ટ્ર પંથકની વાત કરીએ તો, અમરેલી, ભાવનગર અને ગીર સોમનાથ જેવા જિલ્લાઓમાં પણ ભારે પવન સાથે વરસાદ થવાની આગાહી કરવામાં આવી છે.
ભારે પવન અને ગાજવીજનો ખતરો
માત્ર વરસાદ જ નહીં, પણ 30 થી 40 કિમીની ઝડપે તેજ પવન ફૂંકાવાની પણ શક્યતા છે. આકાશમાં વીજળીના કડાકા-ભડાકા સાથે કમોસમી માવઠું પડી શકે છે. પવનની ગતિ વધુ હોવાથી કાચા મકાનો, પતરા અને ખેતીના પાકને નુકસાન થવાની ભીતિ સેવાઈ રહી છે.
ખેડૂતો અને જનતા માટે એલર્ટ
માર્ચ મહિનામાં પડી રહેલા આ વરસાદને કારણે તૈયાર થયેલા રવિ પાક જેવા કે ઘઉં, જીરું અને ચણાના પાક પર જોખમ તોળાઈ રહ્યું છે. હવામાન વિભાગે માછીમારો અને ખેડૂતોને સાવચેત રહેવા સૂચના આપી છે. વરસાદને કારણે તાપમાનમાં 2 થી 3 ડિગ્રીનો ઘટાડો થશે, જે ગરમીથી થોડી રાહત આપશે પણ પવન મુશ્કેલી વધારી શકે છે.
આ પણ વાંચો:ગુજરાતમાં પવન સાથે મિશ્ર હવામાન, દિવસે ગરમી, રાત્રે ઠંડીનો અહેસાસ
આ પણ વાંચો:ગુજરાતમાં ભરશિયાળે કમોસમી વરસાદની એન્ટ્રી, હવામાન વિભાગે જાહેર કર્યું યલો અલર્ટ, ખેડૂતોમાં ચિંતા વધી
આ પણ વાંચો:ગુજરાતમાં કાતિલ ઠંડીની એન્ટ્રી! હવામાન વિભાગે કરી બેવડી ઋતુની આગાહી
