Gujarat Weather Update: ગુજરાતમાં છેલ્લા થોડા દિવસોથી વાતાવરણમાં સતત પલટો જોવા મળી રહ્યો છે. રાજ્યના હવામાન વિભાગ દ્વારા આગામી દિવસો માટે એક મહત્વની આગાહી કરવામાં આવી છે. હાલમાં રાજ્યભરમાં ‘મિક્સ ઋતુ’ એટલે કે બેવડી ઋતુનો અનુભવ થઈ રહ્યો છે, પરંતુ ટૂંક સમયમાં પવનની ગતિમાં ફેરફાર થતા ઠંડીનો ચમકારો વધવાની પૂરેપૂરી શક્યતા છે.
પવનની ગતિ વધતા ઠંડીનું જોર વધશે
હવામાન (Weather) વિભાગના જણાવ્યા અનુસાર, અત્યારે ઉત્તર-પશ્ચિમી પવનો ફૂંકાવાનું શરૂ થઈ ગયું છે. આગામી દિવસોમાં પવનની ગતિ 15 થી 20 કિલોમીટર પ્રતિ કલાક રહેવાની શક્યતા છે. આ તેજ પવનને કારણે વાતાવરણમાં એકાએક ઠંડક પ્રસરાશે. ખાસ કરીને વહેલી સવારે અને મોડી રાત્રે લોકોને કડકડતી ઠંડીનો અહેસાસ થશે.
તાપમાનમાં મોટો તફાવત: દિવસ ગરમ, રાત ઠંડી
આગામી દિવસોમાં લઘુતમ અને મહત્તમ તાપમાન વચ્ચે મોટો તફાવત જોવા મળશે, જેમાં લઘુતમ તાપમાન 14 થી 15 ડિગ્રી અને મહત્તમ તાપમાન 30 થી 32 ડિગ્રી સેલ્સિયસ રહેવાની શક્યતા છે. તાપમાનમાં જોવા મળતા આ આશરે 15 ડિગ્રી જેટલા મોટા તફાવતને કારણે રાજ્યમાં બેવડી ઋતુની અસર યથાવત રહેશે. બપોરે ગરમી અને વહેલી સવારે કે રાત્રે ઠંડીનો અનુભવ થવાને કારણે લોકોને તબિયત બાબતે સાવધ રહેવા જણાવાયું છે.
સ્વાસ્થ્યનું ધ્યાન રાખવું જરૂરી
નિષ્ણાતોના મતે, જ્યારે વાતાવરણ (Weather) માં આ રીતે અચાનક બદલાવ આવે છે ત્યારે શરીરની રોગપ્રતિકારક શક્તિ પર તેની અસર પડે છે. આ મિક્સ ઋતુને કારણે વાયરલ ઇન્ફેક્શન, શરદી, અને ઉધરસના કેસોમાં વધારો થઈ શકે છે. ખાસ કરીને બાળકો અને વૃદ્ધોએ આ બદલાતા હવામાનમાં વિશેષ કાળજી રાખવી જોઈએ.
આ પણ વાંચો:રાજ્યમાં ઠંડીનું જોર વધ્યું, જાણો ગુજરાતના ક્યાં જિલ્લામાં કેટલું નોંધાયું તાપમાન
આ પણ વાંચો: ઉત્તર ભારતમાં હાડ થીજવતી ઠંડી, મકરસંક્રાંતિ પર હવામાન કેવું રહેશે?
આ પણ વાંચો: ગુજરાતના હવામાનમાં આવ્યો પલટો, કમોસમી વરસાદ, ગાઢ ધુમ્મસથી ખેડૂતો ચિંતિત
