Gujarat Rain News: ગુજરાતમાં ફરી એકવાર વરસાદી માહોલ જામ્યો છે. આજે વહેલી સવારથી જ રાજ્યના અનેક વિસ્તારોમાં મેઘરાજાએ ધમાકેદાર (Gujarat Red Alert) બેટિંગ શરૂ કરી છે. સવારે 6થી 10 વાગ્યા સુધીના માત્ર ચાર કલાકમાં રાજ્યના 172 તાલુકામાં વરસાદ નોંધાયો છે. અરવલ્લીના મેઘરજમાં સૌથી વધુ 3 ઈંચ વરસાદ ખાબક્યો છે, જ્યારે અમદાવાદ શહેરમાં પોણા 3 ઈંચ જેટલો વરસાદ નોંધાતા અનેક વિસ્તારોમાં પાણી ભરાવાની સ્થિતિ સર્જાઈ છે.

રાજ્યના 34 તાલુકામાં એક ઈંચથી વધુ વરસાદ નોંધાયો છે. વહેલી સવારથી શરૂ થયેલા વરસાદને કારણે શહેરી વિસ્તારોમાં જનજીવનને અસર થઈ રહી છે, જ્યારે ગ્રામ્ય વિસ્તારોમાં વરસાદ ખેતી માટે રાહતરૂપ બન્યો છે.

Gujarat Red Alert: 6 જિલ્લામાં રેડ એલર્ટ

હવામાન વિભાગે આજે બપોરે 1 વાગ્યા સુધી રાજ્યમાં ભારે વરસાદની આગાહી કરી છે. અમદાવાદ, ગાંધીનગર, ખેડા, સાબરકાંઠા, અરવલ્લી અને મહીસાગર જિલ્લામાં ભારેથી અતિ ભારે વરસાદની સંભાવનાને પગલે રેડ એલર્ટ જાહેર કરવામાં આવ્યું છે.આ ઉપરાંત બનાસકાંઠા, મહેસાણા, પાટણ, સુરેન્દ્રનગર, બોટાદ, ભાવનગર, અમરેલી, ગીર સોમનાથ, આણંદ, નવસારી, તાપી, નર્મદા, સુરત, પંચમહાલ, દાહોદ, ભરૂચ, વડોદરા, છોટાઉદેપુર, ડાંગ, વલસાડ સહિતના વિસ્તારોમાં ઓરેન્જ એલર્ટ જાહેર કરવામાં આવ્યું છે.દીવ, દમણ અને દાદરા નગર હવેલીમાં પણ ભારે વરસાદની સંભાવનાને પગલે ઓરેન્જ એલર્ટ આપવામાં આવ્યું છે. રાજ્યના અન્ય વિસ્તારોમાં યેલો એલર્ટ સાથે હળવાથી મધ્યમ વરસાદની આગાહી કરવામાં આવી છે.

રાજકોટ આવતી મુંબઈની બે ફ્લાઈટ વડોદરા ડાયવર્ટ

વરસાદ અને ખરાબ હવામાનની અસર હવાઈ સેવા પર પણ જોવા મળી છે. રાજકોટના હિરાસર સ્થિત ઈન્ટરનેશનલ એરપોર્ટ પર હવામાનની સ્થિતિને કારણે મુંબઈથી રાજકોટ આવતી બે ફ્લાઈટને વડોદરા તરફ ડાયવર્ટ કરવામાં આવી છે.બંને ફ્લાઈટમાં સવાર 200થી વધુ મુસાફરોને આ ફેરફારના કારણે કલાકો સુધી મુશ્કેલીનો સામનો કરવો પડ્યો હતો. રાજકોટ નજીક વરસાદી માહોલને કારણે એરક્રાફ્ટના લેન્ડિંગમાં મુશ્કેલી સર્જાતા ફ્લાઈટને વૈકલ્પિક એરપોર્ટ તરફ વાળવાનો નિર્ણય લેવાયો હતો.હાલમાં બે ફ્લાઈટ ડાયવર્ટ થઈ છે, જોકે જો હવામાનમાં સુધારો નહીં થાય તો આગામી સમયમાં વધુ ફ્લાઈટને પણ અસર થવાની શક્યતા છે.

રાજપીપળામાં ધોધમાર વરસાદ, નીચાણવાળા વિસ્તારોમાં પાણી

નર્મદા જિલ્લામાં બે દિવસના વિરામ બાદ વહેલી સવારથી ફરી વરસાદ શરૂ થયો છે. રાજપીપળા સહિત સમગ્ર પંથકમાં ધોધમાર વરસાદ પડતા નીચાણવાળા વિસ્તારોમાં પાણી ભરાયા છે.શહેરના સ્ટેશન રોડ પર વરસાદી પાણી ભરાતા વાહનચાલકો અને રાહદારીઓને મુશ્કેલી પડી હતી. વરસાદના કારણે ગણેશ મહોત્સવના આયોજકોની ચિંતામાં પણ વધારો થયો છે. બીજી તરફ ખેડૂતો માટે આ વરસાદ રાહતરૂપ બન્યો છે.

ધંધુકા પંથકમાં પણ વરસાદી માહોલ

ધંધુકા અને આસપાસના વિસ્તારોમાં પણ સવારથી વરસાદી માહોલ જોવા મળ્યો છે. વાદળછાયા વાતાવરણ વચ્ચે વરસાદ પડતાં રસ્તાઓ ભીના થયા છે અને ગ્રામ્ય વિસ્તારોમાં ખેડૂતોમાં રાહત જોવા મળી રહી છે.વરસાદનું પ્રમાણ વધે તો નીચાણવાળા વિસ્તારોમાં પાણી ભરાવાની સ્થિતિ ઊભી થઈ શકે છે, જેના કારણે સ્થાનિક તંત્રની કામગીરી પણ મહત્વપૂર્ણ બની રહેશે.

પાટણમાં રેલવે ગરનાળું પાણીમાં ગરકાવ

પાટણ જિલ્લામાં વહેલી સવારથી ધોધમાર વરસાદ પડ્યો છે. ભારે વરસાદના કારણે શહેરના રેલવે ગરનાળામાં પાણી ભરાઈ જતા રસ્તો વાહનવ્યવહાર માટે બંધ કરવાની સ્થિતિ સર્જાઈ છે.ગરનાળામાં પાણી ભરાયા હોવા છતાં કેટલાક રાહદારીઓ જોખમ લઈને રસ્તો પસાર કરવાનો પ્રયાસ કરતા જોવા મળ્યા હતા. પાણીનું સ્તર વધવાથી અકસ્માતની શક્યતા હોવાથી નાગરિકો સાવચેતી રાખે તે જરૂરી બન્યું છે.

અમદાવાદ સહિત અનેક શહેરોમાં વરસાદની અસર

રાજ્યના અન્ય વિસ્તારોની સાથે અમદાવાદમાં પણ સવારથી વરસાદનું જોર જોવા મળ્યું છે. શહેરમાં પોણા ત્રણ ઈંચ જેટલો વરસાદ નોંધાતા અનેક વિસ્તારોમાં પાણી ભરાયા છે. ઓફિસ અને નોકરી-ધંધા માટે સવારમાં નીકળેલા લોકોને વરસાદના કારણે મુશ્કેલીનો સામનો કરવો પડી રહ્યો છે.હવામાન વિભાગ દ્વારા બપોર સુધી ભારે વરસાદની આગાહી કરવામાં આવી હોવાથી આગામી કલાકો ગુજરાત માટે મહત્વના બની શકે છે. ખાસ કરીને રેડ અને ઓરેન્જ એલર્ટ ધરાવતા જિલ્લાઓમાં નીચાણવાળા વિસ્તારો પર તંત્રની નજર રહેશે.

ખેડૂતો માટે રાહત, પરંતુ ભારે વરસાદથી પડકાર પણ

રાજ્યના અનેક ગ્રામ્ય વિસ્તારોમાં વરસાદ ખેતી માટે ફાયદાકારક બની રહ્યો છે. જોકે જ્યાં ટૂંકા સમયમાં ભારે વરસાદ થાય છે ત્યાં ખેતરોમાં પાણી ભરાવાની સમસ્યા ઊભી થઈ શકે છે.એક તરફ વરસાદથી પાણીના સ્ત્રોતોને ફાયદો થઈ રહ્યો છે, તો બીજી તરફ શહેરોમાં પાણી ભરાવું, ટ્રાફિક અને જાહેર પરિવહનને અસર તથા હવાઈ સેવા ખોરવાવા જેવી સમસ્યાઓ પણ સામે આવી રહી છે.હાલ રાજ્યમાં વરસાદી સિસ્ટમ સક્રિય હોવાથી આગામી કલાકોમાં કયા વિસ્તારમાં કેટલો વરસાદ પડે છે અને ક્યાં પાણી ભરાવાની સ્થિતિ સર્જાય છે તેના પર તંત્ર તેમજ નાગરિકોની નજર રહેશે.

આ પણ વાંચો: ઉત્તર ગુજરાતમાં મેઘરાજાનું રૌદ્ર સ્વરૂપ: 9 જિલ્લામાં એલર્ટ, નદીઓમાં નવા નીરથી ખેડૂતોમાં ખુશી

આ પણ વાંચો: અમદાવાદમાં મેઘરાજાની ધમાકેદાર એન્ટ્રી: બે કલાકમાં બે ઈંચ વરસાદ, રસ્તાઓ જળબંબાકાર

આ પણ વાંચો: ગુજરાતમાં વરસાદનું જોર વધ્યું : 5 જિલ્લામાં યલો એલર્ટ,દ્વારકામાં ધોધમાર વરસાદ