Vadodara News : હરણી બોટકાંડ (Harni Boat Tragedy)ને 33 મહિના પૂર્ણ થયા છતાં પીડિત પરિવારો ન્યાયની રાહ જોઈ રહ્યા છે. વડોદરામાં બાળકોને શ્રદ્ધાંજલિ આપી ન્યાયની માગ ઉઠાવવામાં આવી.

33 મહિના બાદ પણ ન્યાયની રાહ

વડોદરાના હરણી તળાવમાં સર્જાયેલી કરુણ હરણી બોટકાંડ (Harni Boat Tragedy)ની ઘટનાને 33 મહિના પૂર્ણ થયા છે. આ દુર્ઘટનામાં જીવ ગુમાવનારા બાળકો અને શિક્ષકોને યાદ કરી પીડિત પરિવારો (Victims Familes)એ ફરી એકવાર ન્યાયની માગ ઉઠાવી છે. પશુપતિનાથ મહાદેવ મંદિરે યોજાયેલા કાર્યક્રમમાં મૃતકોને શ્રદ્ધાંજલિ અર્પણ કરવામાં આવી હતી.

આ કાર્યક્રમમાં વોર્ડ નંબર 15ના કોંગ્રેસના કાઉન્સિલર આશિષ જોશી સહિત પીડિત પરિવારો જોડાયા હતા. પરિવારોનું કહેવું છે કે ઘટનાને લાંબો સમય વીતી ગયો હોવા છતાં તેમની ન્યાયની લડત હજુ પૂર્ણ થઈ નથી.

બાળકોને શ્રદ્ધાંજલિ આપી

પીડિત પરિવારોએ હરણી તળાવની ઘટના (Boat Accident)માં જીવ ગુમાવનારા બાળકોની યાદમાં શ્રદ્ધાંજલિ આપી હતી. પરિવારજનોએ જણાવ્યું કે પોતાના સંતાનને ગુમાવવાનું દુઃખ આજે પણ એટલું જ તીવ્ર છે.

એક પીડિત પરિવારે ભાવુક થઈને જણાવ્યું કે, “બાળક ગુમાવ્યાને 33 મહિના થઈ ગયા છે. તંત્રના પાપના કારણે અમારા ઘરનો દીવો ઓલવાઈ ગયો.” પરિવારજનોએ કહ્યું કે તેમને અત્યાર સુધી આશ્વાસનો મળ્યા છે, પરંતુ ન્યાયની પ્રક્રિયા અંગે તેમની ચિંતા યથાવત છે.

‘જ્યાં સુધી ન્યાય નહીં મળે, લડત ચાલુ રહેશે’

પીડિત પરિવારોએ ન્યાય ન મળે ત્યાં સુધી લડત ચાલુ રાખવાનો સંકલ્પ વ્યક્ત કર્યો છે. પરિવારજનો દ્વારા ઘટનામાં તંત્રની બેદરકારી અને ભ્રષ્ટાચાર અંગે ગંભીર સવાલો ઉઠાવવામાં આવ્યા હતા.

તેમનું કહેવું છે કે બાળકોના મોત માટે જવાબદારી નક્કી થવી જોઈએ અને પીડિત પરિવારોને ન્યાય મળવો જોઈએ. પરિવારો માટે આ માત્ર એક કેસ નથી, પરંતુ પોતાના સંતાનોની યાદ અને ન્યાય સાથે જોડાયેલો સંઘર્ષ છે.

આશિષ જોશીએ નાગરિકોને જોડાવા અપીલ કરી

કોંગ્રેસના કાઉન્સિલર આશિષ જોશી (Asish Joshi)એ જણાવ્યું હતું કે દુઃખી માતાઓ આજે પણ ન્યાય માટે રાહ જોઈ રહી છે. તેમણે નાગરિકોને પીડિત પરિવારોની ન્યાયની લડતમાં જોડાવા અપીલ કરી હતી.

તેમણે વધુમાં જણાવ્યું કે નાગરિકો દરરોજ એક દીપ પ્રગટાવી પીડિત પરિવારોને ન્યાય મળે તે માટે અવાજ ઉઠાવે તેવી માગણી સભામાં કરવામાં આવશે.

ઉલ્લેખનીય છે કે 18 જાન્યુઆરી, 2024ના રોજ વડોદરાના હરણી તળાવમાં બોટ દુર્ઘટના (Boat Accident)સર્જાઈ હતી. આ ઘટનામાં પ્રવાસે ગયેલા 12 વિદ્યાર્થીઓ અને 2 શિક્ષકોએ જીવ ગુમાવ્યો હતો. ઘટનાને 33 મહિના પૂર્ણ થયા બાદ પણ પીડિત પરિવારો ન્યાયની માગ સાથે પોતાની લડત ચાલુ રાખી રહ્યા છે.

આ પણ વાંચો : વડોદરા હરણી  અંગે મોટા સમાચાર,આખરે 1 વર્ષ 21 દિવસ બાદ કરી સહાયની સત્તાવાર જાહેરાત

આ પણ વાંચો : વડોદરા બોટકાંડ ઇફેક્ટ: AMC સફાળી જાગી, સાબરમતી રિવર ફ્રન્ટ પર બોટિંગ એક્ટિવિટી બંધનો આદેશ, કાંકરીયા તળાવમાં કેમ ચાલુ?

આ પણ વાંચો :  હરણીકાંડમાં 16 માસુમો અને એક શિક્ષકનું મોત,મૃતકના પરિવારજનને રૂ. 4 લાખ અને ઈજાગ્રસ્તોને રૂ. 50,000 ની સહાય