Banaskantha News: હિંમતનગર શહેરમાં હાઉસિંગ અર્બન ડેવલપમેન્ટ ઓથોરિટી (HUDA) સામે વેપારીઓ અને સ્થાનિક સહકારી સંસ્થાઓનો વિરોધ આજે ઐતિહાસિક સ્તરે પહોંચ્યો છે. શહેરમાં સજ્જડ બંધ પાળવામાં આવ્યો છે, જેમાં વેપારીઓથી લઈને જિલ્લા ખરીદ-વેચાણ સંઘ, APMC માર્કેટિંગ યાર્ડ અને શાકમાર્કેટ સુધી તમામે સ્વયંભૂ ભાગ લીધો છે. હુડા (HUDA)ની જમીન-સંબંધિત નીતિઓ અને મિલ્કત મૂલ્યાંકન પ્રક્રિયા સામે ઊભેલા અસંતોષે શહેરના તમામ વેપાર વર્ગોને એક મંચ પર લાવી દીધા છે.
હિંમતનગરમાં હુડા (HUDA)ની અપારદર્શક નીતિઓથી અસંતોષાઈ
સૂત્રો અનુસાર, હિંમતનગરની મુખ્ય બજાર વિસ્તારોમાં સવારથી જ શટર બંધ રહ્યા અને વ્યાપારીઓએ જણાવ્યું કે હુડા (HUDA)ની અપારદર્શક નીતિઓ, વધારેલા મિલ્કત મૂલ્યાંકન અને નોટિસોની કાર્યવાહી લોકો પર ભારે આર્થિક દબાણ ઉભું કરે છે. પહેલી વખત આટલી મોટી સંખ્યામાં સહકારી સંસ્થાઓ અને માર્કેટિંગ યાર્ડ પણ ખુલ્લેઆમ બંધનેસમર્થન આપવાથી અભૂતપૂર્વ તાકાત મળી. શહેર સિવાય આસપાસના 11 ગામોના મિલ્કતધારકો પણ શહેરમાં આવી વિરોધમાં જોડાયા, કારણ કે ગ્રામ્ય વિસ્તારોમાં પણ હુડા (HUDA)ની નીતિઓને લઈને અસંતોષ ઊંડો છે.
આ આંદોલન વેપારીની માંગણીઓમાં હુડા (HUDA)નું નવા મૂલ્યાંકનનું ફ્રેમવર્ક પાછું ખેંચવું
શહેરમાં પોલીસ બંદોબસ્ત વધારવામાં આવ્યો હતો અને આખો દિવસ કોઈ અનિચ્છનીય ઘટના બન્યા વિના શાંતિપૂર્ણ બંધ રહ્યો. વેપારી સંગઠનોની મુખ્ય માંગણીઓમાં હુડા (HUDA)નું નવા મૂલ્યાંકનનું ફ્રેમવર્ક પાછું ખેંચવું, જૂના નોટિસો રદ કરાવવાં અને નવી નીતિ બનાવતી વખતે જાહેર જનતાનો મત લેવો સામેલ છે. આંદોલનકારીઓનું કહેવું છે કે હુડાની હાલની કાર્યવાહી વ્યાપારીઓ, ખેડૂતો અને સામાન્ય નાગરિકોના રોજિંદા જીવન અને આવક પર સીધી અસર કરે છે.
ચેતવણી અપાઈ, માંગણીઓ પૂર્ણ ન થાય તો આંદોલન વધુ તીવ્ર બનશે
હિંમતનગરનો આજનો સજ્જડ બંધ માત્ર વેપારીઓનો વિરોધ નહોતો, પરંતુ શહેર અને ગ્રામ્ય વિસ્તારની સંયુક્ત જનભાવનાઓનું પ્રતિબિંબ હતો. આંદોલનકારીઓએ ચેતવણી આપી છે કે માંગણીઓ પૂર્ણ ન થાય તો આંદોલન વધુ તીવ્ર બની શકે છે. હુડા (HUDA)ની નીતિઓમાં સુધારાની માંગ સાથે આજે હિંમતનગર શહેરે સરકારને સ્પષ્ટ સંદેશ આપ્યો છે કે જમીન અને મિલ્કત સંબંધિત નીતિઓમાં પારદર્શિતા અને ન્યાયસંગતતા અનિવાર્ય છે.
