રાયપુર ધર્મ સંસદમાં મહાત્મા ગાંધીનું અપમાન કરનાર કાલીચરણ મહારાજ 90 દિવસ પછી જામીન પર જેલમાંથી મુક્ત થઈને મધ્યપ્રદેશના ઈન્દોર પહોંચ્યા હતા. કાલીચરણે કહ્યું કે ગાંધીજી વિશે કરવામાં આવેલી ટિપ્પણી બદલ તેમને કોઈ પસ્તાવો નથી.રાજદ્રોહના કેસમાં જામીન પર બહાર આવેલા કાલીચરણે વધુમાં કહ્યું કે, મેં ગાંધી વિશે જે કહ્યું તેનો મને કોઈ અફસોસ નથી. હું ગાંધીજીનો અનુયાયી હતો, તેમણે જે કહ્યું તે મેં કર્યું. પરંતુ જ્યારે મેં તેના વિશે વાંચ્યું ત્યારે મને સમજાયું કે તેઓએ ધર્મ માટે શું કર્યું? તે પછી હું ગાંધીને નફરત કરવા લાગ્યો.
શિવાજી મહારાજ અને ગુરુ ગોવિંદ સિંહને તેમના હથિયારોના કારણે ‘ગુમરાહ દેશભક્ત’ કહેવામાં આવ્યા હતા, તેથી જ હું ગાંધીને ધિક્કારું છું. કારણ કે ગાંધીએ સરદાર પટેલને PM બનતા રોક્યા હતા. તે જ સમયે, કાલીચરણે પોતાના નિવેદનમાં સ્પષ્ટ કર્યું કે, હું કોઈ ધાર્મિક શિક્ષક નથી. હું કાલીમાતાનો પુત્ર છું. મારો દેશ મારી માતા છે, અને મારો કોઈ પિતા નથી.
કાલીચરણે કહ્યું, હું નાથુરામ ગોડસેને સલામ કરું છું. બંધારણે મને નાથુરામ ગોડસેના વખાણ કરવાનો અધિકાર આપ્યો છે. મને જેલ જવાનો ડર નથી. ચિંતા કરવા જેવું કંઈ નથી. હું દેશ માટે મારો જીવ આપવા તૈયાર છું.
નોંધનીય છે કે છત્તીસગઢની રાજધાની રાયપુરના ટીકરાપારા વિસ્તારમાં 25 અને 26 ડિસેમ્બર 2020ના રોજ ધર્મ સંસદનું આયોજન કરવામાં આવ્યું હતું. આ કાર્યક્રમમાં મહારાષ્ટ્રના અકોલાના રહેવાસી કાલીચરણે મહાત્મા ગાંધી વિશે વિવાદાસ્પદ ટિપ્પણી કરી હતી. આ પછી છત્તીસગઢ પોલીસે કાલીચરણ પર કેસ નોંધ્યો હતો.
આરોપી કાલીચરણ વિરુદ્ધ કેસ નોંધાતાની સાથે જ તે સ્થળ પરથી ફરાર થઈ ગયો હતો, ત્યારબાદ છત્તીસગઢ પોલીસે તેની 30 ડિસેમ્બરે મધ્યપ્રદેશના પર્યટન સ્થળ ખજુરાહોથી ધરપકડ કરી હતી. આ કેસમાં કાલીચરણ મહારાજને લગભગ 90 દિવસ જેલમાં રહેવું પડ્યું હતું, હાલ તેઓ જામીન પર બહાર છે.
