Heavy Rain Alert India: દેશભરમાં છેલ્લા કેટલાક દિવસોથી હવામાનમાં મોટો પલટો જોવા મળી રહ્યો છે. વેસ્ટર્ન ડિસ્ટર્બન્સ અને સાયક્લોનિક સર્ક્યુલેશનની અસરને કારણે અનેક રાજ્યોમાં ગરમીથી રાહત મળી છે. જોકે હવે હવામાન વિભાગે આગામી 48 કલાક માટે ભારે વરસાદ, ધૂળભર્યા વાવાઝોડા અને તેજ પવનનું એલર્ટ જાહેર કર્યું છે.
હવામાન વિભાગના જણાવ્યા અનુસાર ઉત્તર-પશ્ચિમ ભારત, મધ્ય ભારત, પૂર્વ ભારત અને દક્ષિણ ભારતના અનેક વિસ્તારોમાં 2 જૂન સુધી વરસાદી માહોલ યથાવત રહી શકે છે. રાજસ્થાનના રણ વિસ્તારમાંથી ઉડતી ધૂળના કારણે કેટલાક રાજ્યોમાં રેતીના તોફાન જેવી સ્થિતિ સર્જાઈ શકે છે.
100 કિમી પ્રતિ કલાકની ઝડપે ફૂંકાઈ શકે પવન
હવામાન વિભાગે ચેતવણી આપી છે કે કેટલાક વિસ્તારોમાં 70થી 100 કિલોમીટર પ્રતિ કલાકની ઝડપે તોફાની પવન ફૂંકાઈ શકે છે. સાથે જ ગાજવીજ, વીજળી અને કરા પડવાની પણ શક્યતા વ્યક્ત કરવામાં આવી છે. ખાસ કરીને બિહાર, ઉત્તર પ્રદેશ, રાજસ્થાન, પંજાબ, હરિયાણા અને દિલ્હીમાં આંધી અને વરસાદનું એલર્ટ જાહેર કરવામાં આવ્યું છે.
ચોમાસું 4 જૂન સુધી કેરળ પહોંચશે
IMD અનુસાર દક્ષિણ-પશ્ચિમ ચોમાસું 4 જૂન સુધીમાં કેરળમાં પ્રવેશ કરી શકે છે. જોકે આ વર્ષે દેશભરમાં સામાન્ય કરતાં ઓછો વરસાદ થવાની સંભાવના વ્યક્ત કરવામાં આવી છે. હવામાન નિષ્ણાતોના અનુમાન પ્રમાણે આ વર્ષે ચોમાસામાં સરેરાશ 87 સેન્ટિમીટરના બદલે આશરે 78 સેન્ટિમીટર વરસાદ નોંધાઈ શકે છે. જેના કારણે કૃષિપ્રધાન રાજ્યોમાં ખેડૂતોની ચિંતા વધી શકે છે.
આ રાજ્યોમાં ભારે વરસાદ (Heavy Rain) ની આગાહી
આવતા બે દિવસ દરમિયાન પંજાબ, હરિયાણા, દિલ્હી, ઉત્તર પ્રદેશ, ઝારખંડ, મધ્ય પ્રદેશ અને રાજસ્થાનમાં ગાજવીજ સાથે વરસાદ પડી શકે છે. દક્ષિણ ભારતમાં તમિલનાડુ, કેરળ, કર્ણાટક અને આંધ્રપ્રદેશના અનેક વિસ્તારોમાં હળવાથી ભારે વરસાદની આગાહી કરવામાં આવી છે. ઉત્તર-પૂર્વીય રાજ્યો જેમ કે અસમ, મેઘાલય, અરુણાચલ પ્રદેશ, નાગાલેન્ડ, મણિપુર, મિઝોરમ અને ત્રિપુરામાં પણ ભારે વરસાદ અને તોફાની પવનની શક્યતા વ્યક્ત કરવામાં આવી છે.
દિલ્હીમાં વાદળછાયું વાતાવરણ
દેશની રાજધાની દિલ્હીમાં આગામી બે દિવસ સુધી વાદળછાયું વાતાવરણ રહેવાની શક્યતા છે. સવાર અને સાંજના સમયે ગાજવીજ સાથે વરસાદી ઝાપટાં પડી શકે છે. હવામાન વિભાગે દિલ્હીમાં 50થી 60 કિમી પ્રતિ કલાકની ઝડપે પવન ફૂંકાવાની આગાહી પણ કરી છે. આગામી દિવસોમાં તાપમાનમાં ફરી વધારો થઈ શકે છે.
ગુજરાતમાં પણ વરસાદી માહોલ
ગુજરાતના કેટલાક વિસ્તારોમાં પણ આગામી દિવસોમાં ગાજવીજ સાથે વરસાદ અને તોફાની પવનની શક્યતા વ્યક્ત કરવામાં આવી છે. ખાસ કરીને ઉત્તર ગુજરાત અને મધ્ય ગુજરાતમાં હવામાનમાં પલટો જોવા મળી શકે છે. હવામાન વિભાગે લોકોને જરૂરી સાવચેતી રાખવા અને ખરાબ હવામાન દરમિયાન બહાર ન નીકળવાની સલાહ આપી છે.
આ પણ વાંચો:ગુજરાતના વાતાવરણમાં આવ્યો પલટો, સુરત-વડોદરા સહિત અનેક શહેરોમાં ભારે પવન સાથે વરસાદ
આ પણ વાંચો:સુરત સહિત દક્ષિણ ગુજરાતમાં 24 કલાકમાં દોઢ ઇંચ વરસાદ ખાબક્યો
આ પણ વાંચો:સુરતમાં છેલ્લા આઠમાંથી સાત વર્ષ 100 ટકા વરસાદ નોંધાયો
