India Russian Crude Oil Imports: વૈશ્વિક પ્રતિબંધો અને આંતરરાષ્ટ્રીય રાજકીય દબાણ વચ્ચે ભારતે રશિયાથી સસ્તા દરે મળતા ક્રૂડ ઓઇલની ખરીદીમાં નોંધપાત્ર વધારો કર્યો છે. એક અહેવાલ મુજબ, મે 2026 દરમિયાન ભારતે રશિયાથી આશરે 5.8 અબજ યુરો (લગભગ 6.7 અબજ ડોલર)ના જીવાશ્મ ઇંધણની આયાત કરી હતી.

આ સાથે ભારત ચીન પછી રશિયન ઇંધણનો વિશ્વનો બીજો સૌથી મોટો ખરીદદાર તરીકે યથાવત્ રહ્યું છે. અહેવાલ અનુસાર, મે મહિનામાં ભારતના કુલ ક્રૂડ ઓઇલ આયાતમાં 8 ટકાનો વધારો નોંધાયો હતો, જેમાં રશિયાથી થતી આયાતમાં 21 ટકાનો ઉછાળો મુખ્ય કારણ રહ્યો હતો.

જામનગર અને વાડીનારમાં વધી ક્રૂડ ઓઇલની આવક

ગુજરાતના બે મોટા રિફાઇનિંગ હબ જામનગર અને વાડીનારમાં રશિયન ક્રૂડ ઓઇલની આવકમાં નોંધપાત્ર વધારો જોવા મળ્યો છે. વાડીનાર રિફાઇનરીમાં એપ્રિલની સરખામણીએ 36 ટકા વધુ ક્રૂડ ઓઇલ ઉતારવામાં આવ્યું, જ્યારે જામનગર રિફાઇનિંગ કોમ્પ્લેક્સમાં ડિલિવરીમાં 14 ટકાનો વધારો નોંધાયો.

રશિયાથી ભારતે આયાત કરેલા કુલ ઇંધણમાં ક્રૂડ ઓઇલનો હિસ્સો લગભગ 83 ટકા રહ્યો હતો, જેનું મૂલ્ય 4.8 અબજ યુરો જેટલું હતું. ઉપરાંત તેલ ઉત્પાદનો અને કોલસાની આયાત પણ નોંધપાત્ર પ્રમાણમાં થઈ હતી.

સરકારી રિફાઇનરીઓએ પણ વધારી ખરીદી

ન્યૂ મેંગલોર, વિશાખાપટ્ટનમ અને પારાદીપ જેવી સરકારી રિફાઇનરીઓએ પણ રશિયન ક્રૂડ ઓઇલની ખરીદીમાં વધારો કર્યો છે. નવેમ્બર 2025માં આયાત અટકાવ્યા બાદ આ રિફાઇનરીઓએ માર્ચ 2026થી ફરી ખરીદી શરૂ કરી હતી.

મે મહિનામાં ન્યૂ મેંગલોર ખાતે રશિયન તેલની ડિલિવરીમાં 13 ટકા વધારો થયો હતો, જ્યારે વિશાખાપટ્ટનમમાં 42 ટકાનો જંગી ઉછાળો નોંધાયો હતો. ઓડિશાની પારાદીપ રિફાઇનરીએ પણ છેલ્લા બે વર્ષમાં સૌથી વધુ રશિયન ક્રૂડ ઓઇલ સ્વીકાર્યું હતું.

ચીન બાદ ભારત સૌથી મોટો ગ્રાહક

તેમજ મે 2026 દરમિયાન ચીને રશિયાના કુલ ક્રૂડ ઓઇલ નિકાસમાંથી 50 ટકા હિસ્સો ખરીદ્યો હતો. બીજા ક્રમે ભારતે 36 ટકા હિસ્સો ખરીદ્યો, જ્યારે તુર્કી 6 ટકા અને યુરોપિયન યુનિયન 5 ટકા હિસ્સા સાથે પાછળ રહ્યા.

ચીને માત્ર મે મહિનામાં જ રશિયાથી 7 અબજ યુરોના જીવાશ્મ ઇંધણની ખરીદી કરી હતી, જેમાં સૌથી મોટો હિસ્સો ક્રૂડ ઓઇલનો રહ્યો હતો.

પ્રતિબંધો છતાં યુરોપ સુધી પહોંચ્યા રશિયન તેલથી બનેલા ઉત્પાદનો

યુરોપિયન યુનિયન દ્વારા રશિયન ક્રૂડ ઓઇલથી બનેલા ઉત્પાદનો પર પ્રતિબંધ લાગુ હોવા છતાં મે 2026 દરમિયાન રશિયન તેલનો ઉપયોગ કરતી રિફાઇનરીઓમાંથી 10 જહાજો યુરોપિયન બંદરો સુધી પહોંચ્યા હતા.

ભારત, તુર્કી, બ્રુનેઇ અને જ્યોર્જિયાની રિફાઇનરીઓએ પ્રતિબંધ લાદનારા દેશોને કુલ 641 મિલિયન યુરોના પેટ્રોલિયમ ઉત્પાદનોની નિકાસ કરી હતી. જેમાંથી લગભગ 214 મિલિયન યુરોના ઉત્પાદનો સીધા રશિયન ક્રૂડ ઓઇલથી તૈયાર કરવામાં આવ્યા હોવાનું જણાવાયું છે.

વિશેષજ્ઞોનું માનવું છે કે સસ્તા રશિયન ક્રૂડ ઓઇલના કારણે ભારતીય રિફાઇનરીઓને ઊંચા નફા સાથે વૈશ્વિક બજારમાં સ્પર્ધાત્મક સ્થિતિ જાળવી રાખવામાં મદદ મળી રહી છે.

આ પણ વાંચો: હોર્મુઝ ખાડીમાં 3 ભારતીયોના મોત બાદ દિલ્હીથી વોશિંગ્ટન સુધી હડકંપ,જયશંકરે અમેરિકાને આપી ચેતવણી

આ પણ વાંચો: બિહારમાં ભરતી પરીક્ષાને લઈને ઉગ્ર વિરોધ, ઉમેદવારોએ ટ્રેન રોકી, પથ્થરમારો અને તોડફોડ કરી

 આ પણ વાંચો: દેશના 19 રાજ્યોમાં ભારે વરસાદ-વાવાઝોડાની ચેતવણી, 90 કિમીની ઝડપે ફૂંકાશે પવન