BRICS Summit 2026: ભારતની અધ્યક્ષતામાં જયપુરમાં યોજાયેલી 10મી BRICS ઉદ્યોગ મંત્રીઓની બેઠકમાં સભ્ય દેશોએ સંયુક્ત ઘોષણાપત્ર સ્વીકારી ભારતને મોટી કૂટનીતિક સફળતા અપાવી છે. બેઠકમાં ઔદ્યોગિક વિકાસ, નવીનતા, ટેક્નોલોજી અને પરસ્પર સહકારને વધુ મજબૂત બનાવવા પર ભાર મૂકવામાં આવ્યો. અમેરિકા-ઈરાન વચ્ચે વધતા વૈશ્વિક તણાવ વચ્ચે તમામ સભ્ય દેશોની સહમતિથી આ ઘોષણાપત્ર સ્વીકારાવું ભારત માટે મહત્વપૂર્ણ સિદ્ધિ માનવામાં આવી રહ્યું છે.
ઔદ્યોગિક વિકાસ અને નવીનતા પર ખાસ ભાર
ભારતે જાન્યુઆરી 2026થી બ્રિક્સની અધ્યક્ષતા સંભાળી છે અને સપ્ટેમ્બરમાં નવી દિલ્હીમાં બ્રિક્સ શિખર સંમેલન યોજાવાનું છે. જયપુર બેઠકમાં ભારત, બ્રાઝિલ, રશિયા, ચીન, દક્ષિણ આફ્રિકા સહિત તમામ સભ્ય દેશોના પ્રતિનિધિઓએ ભાગ લીધો હતો. કેન્દ્રીય મંત્રી પીયૂષ ગોયલે જણાવ્યું કે BRICS દેશોએ એકબીજાની શક્તિનો લાભ લઈ વ્યવહારિક નવીનતા અને મજબૂત ઔદ્યોગિક માળખું ઉભું કરવું જોઈએ. તેમણે PartNIR (Partnership on New Industrial Revolution)ને ટેક્નોલોજી અને ઉદ્યોગ ક્ષેત્રે સહકાર વધારવા માટેનું મહત્વપૂર્ણ પ્લેટફોર્મ ગણાવ્યું. આ વર્ષની બેઠકની થીમ “Resilience, Innovation, Cooperation and Sustainability” રાખવામાં આવી હતી.
#WATCH | Rajasthan: The Tenth BRICS Industry Ministers’ Meeting concluded successfully today in Jaipur, under India’s BRICS Chairship 2026. The meeting brought together Industry Ministers and senior representatives from BRICS member countries to culminate the ministerial… pic.twitter.com/zPDehCUd3W
— ANI (@ANI) August 6, 2026
MSME, સ્ટાર્ટઅપ્સ અને લોજિસ્ટિક્સ માટે મહત્વપૂર્ણ નિર્ણયો
બેઠકમાં MSME માટે સહકારનું માળખું તૈયાર કરવું, ફોટોવોલ્ટેઇક (સોલાર) ઉદ્યોગ માટે કાર્યયોજના સ્વીકારવી, સ્ટાર્ટઅપ્સને પ્રોત્સાહન આપવું તેમજ GIS આધારિત ઇન્ફ્રાસ્ટ્રક્ચર અને આધુનિક લોજિસ્ટિક્સ સિસ્ટમ વિકસાવવાના મુદ્દાઓ પર સહમતિ બની હતી. રાજ્ય મંત્રી જિતિન પ્રસાદે જણાવ્યું કે સહકાર, નવીનતા અને વિશ્વાસના આધારે જ સમાવેશી ઔદ્યોગિક વિકાસ શક્ય છે.
વિશ્વમાં BRICSનું વધતું પ્રભુત્વ
BRICS હવે માત્ર પાંચ દેશોનું સંગઠન રહ્યું નથી. ઈરાન, ઈજિપ્ત, ઈથિયોપિયા, ઇન્ડોનેશિયા અને યુએઈ સહિત નવા સભ્યો જોડાતા તેનું વૈશ્વિક મહત્વ વધુ વધ્યું છે. હાલમાં બ્રિક્સ દેશોની કુલ વસ્તી આશરે 390 કરોડ, વિશ્વની વસ્તીના 48 ટકા જેટલી છે, જ્યારે PPP આધારે તેનું કુલ GDP લગભગ 78 ટ્રિલિયન ડોલર છે, જે વૈશ્વિક GDPના આશરે 40 ટકા બરાબર છે. ભારતની અધ્યક્ષતામાં સ્વીકારાયેલું આ સંયુક્ત ઘોષણાપત્ર આવનારા BRICS શિખર સંમેલન પહેલાં ભારતની વૈશ્વિક કૂટનીતિક અને આર્થિક નેતૃત્વ ક્ષમતાને વધુ મજબૂત બનાવે છે.
