India E20 Petrol Ethanol Blending Programme 2026: કેન્દ્ર સરકારે સુપ્રીમ કોર્ટમાં સ્પષ્ટ કર્યું છે કે દેશમાં પેટ્રોલમાં 20 ટકા ઇથેનોલ મિશ્રણ (E20) કરવાની યોજના એક રાષ્ટ્રીય નીતિ છે અને આ પ્રયોગ સકારાત્મક રીતે ચાલુ રહેશે. ભારત પેટ્રોલિયમ કોર્પોરેશન લિમિટેડ (BPCL) દ્વારા કર્ણાટક હાઈકોર્ટના એક આદેશને પડકારતી અરજી પરની સુનાવણી દરમિયાન એટર્ની જનરલ આર. વેંકટરામણીએ આ મહત્વપૂર્ણ રજૂઆત કરી હતી.
વાહનચાલકોની ચિંતા અને સરકારનો જવાબ
વાહનચાલકોમાં એવી ચિંતા હતી કે ઇથેનોલ મિશ્રણથી એન્જિનને નુકસાન થાય છે અને માઈલેજ ઘટે છે. સરકાર દ્વારા આ આશંકાઓને સત્તાવાર રીતે ફગાવી દેવામાં આવી છે:
સરકારે કોર્ટમાં સ્પષ્ટ કર્યું છે કે E20 પેટ્રોલના કારણે વાહનોના એન્જિનને નુકસાન થયું હોય તેવા કોઈ વૈજ્ઞાનિક પુરાવા નથી.
અમેરિકા, બ્રાઝિલ અને જાપાન જેવા દેશોમાં પણ ઇથેનોલ મિશ્રણ સફળતાપૂર્વક અપનાવવામાં આવ્યું છે.
Ethanol ના આર્થિક અને રાષ્ટ્રીય ફાયદા
આ પ્રોગ્રામ ભારત માટે આર્થિક રીતે ગેમ-ચેન્જર સાબિત થયો છે:
ઇથેનોલ(Ethanol) મિશ્રણને કારણે ભારત ક્રૂડ ઓઇલની આયાતમાં ઘટાડો કરી શક્યું છે, જેનાથી દેશના અંદાજે 1.4 લાખ કરોડ રૂપિયા જેટલા વિદેશી હૂંડિયામણની બચત થઈ છે.
ભારતે નિર્ધારિત સમય કરતાં 5 વર્ષ વહેલા 20 ટકા મિશ્રણનો લક્ષ્યાંક હાંસલ કર્યો છે, અને હવે 2030 સુધીમાં તેને 30 ટકા સુધી લઈ જવાનું સરકારનું લક્ષ્ય છે.
આ નીતિ માત્ર ઊર્જા સુરક્ષા જ નહીં, પરંતુ ખેડૂતોની આવક વધારવા અને પ્રદૂષણ ઘટાડવામાં પણ મદદરૂપ છે.
સુપ્રીમ કોર્ટમાં કેસની સ્થિતિ
સરકારે કોર્ટને વિનંતી કરી છે કે અલગ-અલગ હાઈકોર્ટમાં પેન્ડિંગ રહેલી તમામ અરજીઓને સુપ્રીમ કોર્ટમાં ટ્રાન્સફર કરવામાં આવે. સરકારનો તર્ક છે કે ઓક્ટોબરમાં નવા કોન્ટ્રાક્ટ રિન્યૂ થાય તે પહેલાં આ મુદ્દે આખરી નિર્ણય લેવો જરૂરી છે, જેથી રાષ્ટ્રીય નીતિના અમલીકરણમાં કોઈ અવરોધ ન આવે.
