યુપીમાં થશે કોંગ્રેસ-સપાનું ગઠબંધન, અખિલેશે કહ્યું, 'કોઈ વિવાદ નહીં'

ઉત્તર પ્રદેશ/ યુપીમાં થશે કોંગ્રેસ-સપાનું ગઠબંધન, અખિલેશે કહ્યું, ‘કોઈ વિવાદ નહીં’

ઉત્તર પ્રદેશમાં કોંગ્રેસ સાથે ગઠબંધન પર અખિલેશ યાદવનું મોટું નિવેદન આવ્યું છે. તેમણે કહ્યું કે કોંગ્રેસ અને સમાજવાદી પાર્ટી વચ્ચે કોઈ મતભેદ નથી.

ઉત્તર પ્રદેશમાં કોંગ્રેસ સાથે ગઠબંધન પર અખિલેશ યાદવનું મોટું નિવેદન આવ્યું છે. તેમણે કહ્યું કે કોંગ્રેસ અને સમાજવાદી પાર્ટી વચ્ચે કોઈ મતભેદ નથી. ઉત્તર પ્રદેશમાં બંને પક્ષો વચ્ચે ગઠબંધન થશે. તેમણે કહ્યું કે આજે સાંજ સુધીમાં સીટોની જાહેરાત થઈ શકે છે. અખિલેશે કહ્યું કે ગઠબંધન થશે – અંત ભલા તો સબ ભલા.

પ્રિયંકા ગાંધીએ અખિલેશ સાથે કરી વાત

બીજી તરફ સુત્રો પાસેથી મળતી માહિતી મુજબ પ્રિયંકા ગાંધી વાડ્રાએ અખિલેશ યાદવ સાથે સીટ વહેંચણીના મુદ્દે વાત કરી હતી, જે બાદ બંને પક્ષો વચ્ચે ડીલ ફાઈનલ થઈ ગઈ હતી. સૂત્રોના જણાવ્યા અનુસાર કોંગ્રેસને 16થી 18 બેઠકો મળી શકે છે. જેમાં એક-બે બેઠકો પર ખેંચતાણ ચાલી રહી છે જે અંગે વાતચીત ચાલી રહી છે અને સાંજ સુધીમાં નિર્ણય લેવામાં આવશે તેમ મનાય છે. મળતી માહિતી મુજબ કોંગ્રેસ પાર્ટીને અમરોહા, બિજનૌર, સહારનપુર, ઝાંસી જેવી સીટો મળી શકે છે. જ્યારે બુલંદશહેર અને મથુરાની સીટો સમાજવાદી પાર્ટી પાસે જઈ શકે છે.

સપાએ 31 સીટો માટે ઉમેદવારોની જાહેરાત કરી છે

જણાવી દઈએ કે અખિલેશ યાદવનું નિવેદન એવા સમયે આવ્યું છે જ્યારે ઉત્તર પ્રદેશમાં કોંગ્રેસ સાથે ગઠબંધનને લઈને તમામ પ્રકારની શંકાઓ વ્યક્ત કરવામાં આવી રહી છે. સમાજવાદી પાર્ટીએ મંગળવારે ઉત્તર પ્રદેશમાં વધુ પાંચ લોકસભા બેઠકો માટે તેના ઉમેદવારોની યાદી જાહેર કરી. સમાજવાદી પાર્ટીએ અત્યાર સુધી યુપીમાં 31 સીટો પર પોતાના ઉમેદવારો જાહેર કર્યા છે.

સપાએ અગાઉ 30 જાન્યુઆરીએ ઉત્તર પ્રદેશની 16 લોકસભા બેઠકો અને 19 ફેબ્રુઆરીએ 11 બેઠકો માટે તેના ઉમેદવારો જાહેર કર્યા હતા. માનવામાં આવી રહ્યું છે કે કોંગ્રેસને 16થી 18 બેઠકો મળી શકે છે. બાકીની બેઠકો પર સમાજવાદી પાર્ટી પોતાના ઉમેદવારો ઉતારશે.

બદાઉનથી શિવપાલ યાદવને ટિકિટ

જે પાંચ બેઠકો પર એસપીએ મંગળવારે તેના ઉમેદવારોના નામ જાહેર કર્યા હતા, તેમાંથી શિવપાલ સિંહ યાદવને બદાઉનથી ટિકિટ આપવામાં આવી છે જે અગાઉ જાહેર કરાયેલ ધર્મેન્દ્ર યાદવની જગ્યાએ છે. કૈરાનાના ધારાસભ્ય નાહિદ હસનની બહેન ઇકરા હસનને કૈરાના લોકસભા સીટથી ઉમેદવાર બનાવવામાં આવી છે. આ સિવાય બરેલીથી પ્રવીણ સિંહ એરોન, હમીરપુરથી અજેન્દ્ર સિંહ રાજપૂત અને વારાણસીથી સુરેન્દ્ર સિંહ પટેલને ઉમેદવાર બનાવવામાં આવ્યા છે.