Ahmedabad News: અમદાવાદમાં કોમર્સિયલ રિયલ્ટીના વળતા પાણી હોય તેમ લાગે છે. તેમાં કરવામાં આવતા નાણાકીય રોકાણમાં 250 ટકાનો જંગી ઘટાડો નોંધાયો છે. એક સમય હતો જ્યારે 2017-18માં અમદાવાદમાં કોમર્સિયલ રિયલ્ટી માર્કેટમાં રૂ. 8,800 કરોડ કરતાં વધારે જંગી રોકાણ થયું હતું અને તેની તુલનાએ 2024-25માં 250 ટકાનો જંગી ઘટાડો થયો. આ રોકાણ ઘટીને રૂ. 3,300 કરોડ થઈ ગયું છે. આ પુરવાર કરે છે કે અમદાવાદના કોમર્સિયલ રિયલ્ટી માર્કેટમાં ખાસ વળતર ન હોવાથી નવા રોકાણકારો આવી રહ્યા નથી.

ગુજરાતની વાત કરીએ તો, આ સમયગાળા દરમિયાન તેમાં 159 ટકાનો ઘટાડો થયો છે. 2017-18માં ગુજરાતના કોમર્શિયલ રિયલ એસ્ટેટ માર્કેટમાં રોકાણ 19,353 કરોડ રૂપિયા હતું, જે 2024-25માં ઘટીને 12,152 કરોડ રૂપિયા થઈ ગયું છે.

યુનિટ્સની વાત કરીએ તો, આમાં વિરોધાભાસ છે, કારણ કે 2024-25માં ગુજરાતના કોમર્શિયલ રિયલ એસ્ટેટ માર્કેટમાં વાર્ષિક ધોરણે 20 ટકાનો વધારો થયો છે, જ્યારે અમદાવાદમાં આ જ સમયગાળામાં 1.4 ટકાનો ઘટાડો નોંધાયો છે. ગુજરેરાના તાજેતરના અહેવાલ મુજબ, 2024-25માં ગુજરાતમાં નોંધાયેલા કોમર્શિયલ યુનિટ્સની સંખ્યા 31,520 હતી, જે પાછલા વર્ષના 25,235  યુનિટ્સ કરતાં વધુ છે. જે વાર્ષિક ધોરણે 20 ટકાનો વધારો દર્શાવે છે.

જોકે, અમદાવાદમાં પરિસ્થિતિ કંઈક અલગ છે. આ જ સમયગાળા દરમિયાન, અમદાવાદમાં નોંધણી 8,645 એકમોથી ઘટીને 8,523 એકમો થઈ ગઈ, જે 1.4 % નો ઘટાડો દર્શાવે છે. અમદાવાદના કોમર્શિયલ રિયલ એસ્ટેટ બજારે 2017-18 થી 2020-21 સુધી સંઘર્ષ ચાલુ રાખ્યો. 2020-21માં, પ્રોજેક્ટ નોંધણીમાં 39.8% નો ઘટાડો થયો, જ્યારે ખર્ચમાં 50.9% નો ઘટાડો થયો.

2021-22માં તેમાં સુધારો થયો, જેમાં પ્રોજેક્ટમાં 26.2% અને યુનિટ્સમાં 11.3% નો વધારો થયો. પરંતુ આ સુધારો અલ્પજીવી રહ્યો, કારણ કે 2022-23માં પ્રોજેક્ટ્સમાં 14.6% અને ખર્ચમાં 17.6% નો ઘટાડો થયો. 2023-24માં ઓછા પ્રોજેક્ટ્સ હોવા છતાં, ખર્ચમાં 93 ટકાનો વધારો થયો, પરંતુ 2024-25માં બજારને ફરીથી ફટકો પડ્યો, જેમાં ખર્ચમાં 10.7 ટકા અને યુનિટ્સમાં 1.4 ટકાનો ઘટાડો થયો.

અમદાવાદમાં 2017-18માં 193 કોમર્શિયલ પ્રોજેક્ટ નોંધાયા હતા, જે 2020-21માં ઘટીને માત્ર 65 થયા હતા. 2024-25માં સુધારો થયો છે, પરંતુ તે નજીવો છે, કારણ કે આ સમયગાળા દરમિયાન ફક્ત 72 પ્રોજેક્ટ નોંધાયા હતા.

આ પણ વાંચો: અમદાવાદમાં રિયલ્ટી માર્કેટમાં તેજીઃ વર્ષમાં ભાવ દસ ટકા વધ્યાં

આ પણ વાંચો: અમદાવાદમાં થયો ગુજરાતનો અત્યાર સુધીનો સૌથી મોંઘો રિયલ્ટી સોદો

આ પણ વાંચો: અમદાવાદમાં ધમધમવા લાગેલું રિયલ્ટી સેક્ટરઃ લોનધારકો બમણા થયા