જયપુર-મુંબઈ ટ્રેન ગોળીબારના આરોપી ચેતન સિંહને રેલવેએ સેવામાંથી બરતરફ કરી દીધો છે. ચેતન સિંહે ચાલતી ટ્રેનમાં તેના વરિષ્ઠ સહિત અન્ય ત્રણ મુસાફરોની ગોળી મારીને હત્યા કરી હતી. બોરીવલી કોર્ટના આદેશ બાદ ચેતન હાલમાં જ્યુડિશિયલ કસ્ટડીમાં છે. ગયા મહિને 31 જુલાઈએ રેલવે પ્રોટેક્શન ફોર્સ (RPF)ના જવાન ચેતન સિંહે જયપુર-મુંબઈ ટ્રેનમાં ચાર લોકોની ગોળી મારીને હત્યા કરી દીધી હતી. જેમાં ત્રણ મુસાફરો અને એક આરપીએફ એસઆઈનો સમાવેશ થાય છે. આ હત્યાકાંડ બાદ હોબાળો મચી ગયો હતો. ટ્રેનમાં સિક્યોરિટી ગાર્ડના આ કૃત્યથી મુસાફરો અચંબામાં પડી ગયા હતા.
ઉલ્લેખનીય છે કે ઘટના બાદ તરત જ આરોપી કોન્સ્ટેબલ ચેતન સિંહની ધરપકડ કરીને બોરીવલી કોર્ટમાં રજૂ કરવામાં આવ્યો હતો, જ્યાંથી તેને ન્યાયિક કસ્ટડીમાં મોકલી દેવામાં આવ્યો હતો. અત્યાર સુધી, ચેતન સિંહ વિરુદ્ધ IPCની કલમ 302 (હત્યા), ભારતીય રેલવે એક્ટની કલમ 152 અને આર્મ્સ એક્ટ લાગુ કરવામાં આવી છે, પરંતુ પોલીસે આરોપીઓ વિરુદ્ધ IPCની કલમ 363, 341, 342 અને 153A પણ ઉમેરી છે. પોલીસ ટીમ ચેતનસિંહની પૂછપરછમાં લાગેલી છે. પૂછપરછમાં વિવિધ ખુલાસા થઈ રહ્યા છે.
આરપીએફની ઉચ્ચ સ્તરીય સમિતિ તપાસ કરી રહી હતી
આરપીએફની ઉચ્ચ સ્તરીય સમિતિ પણ આ મામલાની તપાસ કરી રહી હતી. તપાસ પૂર્ણ થયા બાદ આરોપી કોન્સ્ટેબલ ચેતન સિંહને નોકરીમાંથી બરતરફ કરવામાં આવ્યો હતો. તપાસમાં જાણવા મળ્યું હતું કે ચેતનસિંહે પોતાની પાસેના હથિયારનો દુરુપયોગ કરી હત્યા જેવા જઘન્ય ગુના આચર્યા હતા. સરકારી સેવાના નિયમોનો ભંગ કર્યો. આ સાથે જ આ મામલામાં જીઆરપીની તપાસમાં બુરખા પહેરેલી મહિલા પાસેથી ધાર્મિક નારા લગાવવાનો મામલો પણ સામે આવ્યો છે, જેની જીઆરપી દ્વારા તપાસ કરવામાં આવી રહી છે.
