Lifestyle News :ટીવી જગતનો સૌથી લોકપ્રિય કૉમેડી શો ‘તારક મહેતા કા ઉલ્ટા ચશ્મા’ (Taarak Mehta Ka Ooltah Chashmah)જોનારા દરેક દર્શક જાણે છે કે જેઠાલાલ ગડા (Jethalal )માટે રવિવારની સવાર એટલે ફાફડા-જલેબી (Fafda-Jalebi)નો રોયલ નાસ્તો! ગુજરાતની સંસ્કૃતિમાં કરકરા ફાફડા અને ગરમાગરમ મીઠી જલેબીની જુગલબંધી માત્ર એક વાનગી નથી પરંતુ એક પરંપરા છે. વીકએન્ડ હોય કે કોઈ ખાસ તહેવાર, પપૈયાનો છીણવાયેલો સંભારો (Grated Papaya Sambharo)અને તળેલા તીખા મરચાં સાથે આ નાસ્તો ખાવાની એક અલગ જ મજા છે.જો તમે પણ બહાર જેવો જ ઓથેન્ટિક ગુજરાતી સ્વાદ તમારા રસોડામાં માણવા માંગતા હો, તો અહીં દર્શાવેલી સરળ રીતથી તમે પણ એકદમ પરફેક્ટ ફાફડા-જલેબી બનાવી શકો છો.

ફાફડા બનાવવા માટેની આવશ્યક સામગ્રી 

 1 કપ ચણાનો લોટ (બેસન)

 1 નાની ચમચી પાપડખાર

4 નાની ચમચી મોણ માટે તેલ

સ્વાદાનુસાર મીઠું અને જરૂર મુજબ પાણી

તળવા માટે તેલ

ફાફડાનો લોટ અને વણવાની રીત

સૌપ્રથમ એક પહોળા વાસણમાં ચણાનો લોટ ચાળી લો. તેમાં પાપડખાર, ૩ ચમચી તેલ અને થોડું મીઠું ઉમેરીને બરાબર મિક્સ કરો.

હવે થોડું-થોડું પાણી ઉમેરીને મધ્યમ કઠણ લોટ બાંધી લો. લોટ બહુ કડક કે બહુ ઢીલો ન હોવો જોઈએ. લોટ બાંધ્યા પછી તેને થોડું તેલ લગાવીને સરસ કેળવી લો.

ત્યારબાદ લોટમાંથી નાના-નાના લંબગોળ લૂઆ બનાવો. કિચન પ્લેટફોર્મ પર લૂઆને રાખીને હથેળીના પાછળના ભાગથી આગળની તરફ ઘસીને પાતળી પટ્ટી તૈયાર કરો. તેને ચપ્પુની મદદથી પ્લેટફોર્મ પરથી અલગ કરી લો.

ફાફડા તળવાની પરફેક્ટ ટિપ્સ

કડાઈમાં તેલને મધ્યમ તાપમાને ગરમ કરો. તૈયાર કરેલા ફાફડાને ધીમેથી તેલમાં મૂકો. તેને હળવા ગોલ્ડન રંગના અને કરકરા થાય ત્યાં સુધી તળો. જો તેલ વધારે ગરમ હશે તો ફાફડા ઉપર બબલ્સ નહીં આવે અને તે અંદરથી કાચા રહી જશે.

જલેબી બનાવવાના 2 વિકલ્પ

જલેબી બનાવવા માટે તમે બેમાંથી કોઈ પણ રીત પસંદ કરી શકો છો.મેંદામાં થોડો ચણાનો લોટ, યીસ્ટ અને પાણી મિક્સ કરીને આખી રાત આથો આવવા દો.મેંદામાં મોળો દહીં, થોડું વિનેગર અને બેકિંગ સોડા ઉમેરીને ઘટ્ટ બેટર બનાવો અને તેને 5-7 મિનિટ માટે રહેવા દો.

ચાસણી અને જલેબી બનાવવાની વિધિ

એક વાસણમાં ખાંડ અને પાણી ઉમેરીને એક તારની ચાસણી તૈયાર કરો. તેમાં થોડું કેસર અને લીંબુના રસના ટીંપા નાખો જેથી ચાસણી જામી ન જાય.તૈયાર બેટરને પાઇપિંગ બેગ અથવા સોસની બોટલમાં ભરો. ગરમ તેલ કે ઘીમાં ગોળ-ગોળ આકાર આપતા જલેબી તળો. બંને બાજુથી ક્રિસ્પી અને ગોલ્ડન થાય એટલે તુરંત બહાર કાઢીને ગરમ ચાસણીમાં 1-2 મિનિટ માટે ડૂબાડી રાખો.

તૈયાર છે જેઠાલાલ સ્ટાઇલ ગરમાગરમ, રસદાર જલેબી અને કડક ફાફડા! આ રવિવારે જ પરિવાર સાથે આ પરંપરાગત નાસ્તાની મજા માણો.

આ પણ વાંચો : ચોમાસામાં પેટની સમસ્યાઓથી છો પરેશાન? ફણસના બીજનો આ દેશી ઉકાળો આપશે રાહત

આ પણ વાંચો : રાત્રે આ મસાલાનું પાણી પીવાથી મીણની જેમ ઓગળશે શરીરની ચરબી: જાણો વજન ઘટાડવાની સૌથી સરળ અને અસરકારક રીત!

આ પણ વાંચો : ચોમાસામાં જાંબુનું સેવન ડાયાબિટીસમાં આપે છે સંજીવની સમાન રાહત: જાણો નિષ્ણાતોનો અભિપ્રાય