Khatu Shyam Falgun Mela 2026: રાજસ્થાનના સીકર જિલ્લામાં સ્થિત વિશ્વવિખ્યાત ખાટૂશ્યામ મંદિર ખાતે આજથી (શનિવાર) ફાલ્ગુન મેળાનો ભવ્ય પ્રારંભ થયો છે. 21 ફેબ્રુઆરીથી 28 ફેબ્રુઆરી સુધી ચાલનારા આ 8 દિવસીય મેળામાં દેશ-વિદેશમાંથી લાખો શ્રદ્ધાળુઓ બાબા શ્યામના દર્શને ઉમટી રહ્યા છે. રીંગસથી ખાટૂ સુધીનો આખો માર્ગ કેસરીયા ધજાઓ અને ભક્તિ સંગીતથી ગુંજી ઉઠ્યો છે.
35 લાખ ભક્તો આવવાનો અંદાજ
મેળાના આયોજન સાથે જોડાયેલા અધિકારીઓના જણાવ્યા મુજબ, આ વર્ષે મેળામાં આશરે 28 થી 35 લાખ શ્રદ્ધાળુઓ પહોંચે તેવી શક્યતા છે. ખાસ કરીને 24 થી 28 ફેબ્રુઆરી દરમિયાન ભારે ભીડ રહેવાની સંભાવના છે, જેમાં માત્ર આ ચાર દિવસમાં જ 15 લાખ ભક્તો ઉમટી શકે છે.
Khatu Shyam : દર્શન માટે ખાસ વ્યવસ્થા
ભીડને નિયંત્રિત કરવા માટે વહીવટીતંત્ર દ્વારા ખાસ આયોજન કરવામાં આવ્યું છે, જેમાં લખદાતાર અને મોદી ગ્રાઉન્ડમાં ભક્તોની વ્યવસ્થા જાળવવા માટે ખાસ ઝિગ-ઝેગ બેરિકેડિંગની સુવિધા ઉભી કરવામાં આવી છે. મંદિર સુધી પહોંચવા માટે કુલ 14 અલગ-અલગ કતારો નક્કી કરવામાં આવી છે, જેથી શ્રદ્ધાળુઓ કોઈપણ અડચણ વગર ઝડપથી અને સરળતાથી દર્શન કરી શકે. વધુમાં, ટ્રાફિક અને ભીડના વ્યવસ્થાપન માટે તમામ વાહનોને મંદિરથી 3 કિમી દૂર રોકી દેવામાં આવ્યા છે, જેના કારણે ભક્તોએ દરબારમાં પહોંચવા માટે અંદાજે 5 થી 8 કિમીની પદયાત્રા કરવી પડશે.
ભક્તો માટે સુવિધાઓ અને ‘શ્યામ સારથી’ એપ
શ્રદ્ધાળુઓની સુવિધા માટે વહીવટીતંત્ર દ્વારા અભૂતપૂર્વ આયોજન કરવામાં આવ્યું છે, જેમાં ભક્તો માટે 1 કરોડ પાણીના પાઉચ, કિન્નુના 1000 ટોપલા અને લેમન ટોફીના વિતરણની સુંદર વ્યવસ્થા કરવામાં આવી છે. વાહન વ્યવસ્થાપન માટે ૫૨ વીઘા જેટલા વિશાળ વિસ્તારમાં પાર્કિંગની સગવડ ઉભી કરવામાં આવી છે, જ્યાં અંદાજે 25000 જેટલા વાહનો પાર્ક કરી શકાશે. આ ઉપરાંત, શ્રદ્ધાળુઓને તમામ જરૂરી સુવિધાઓ અને માર્ગદર્શન મળી રહે તે હેતુથી “શ્યામ સારથી” (Shyam Sarathi) નામની વિશેષ મોબાઈલ એપ પણ લોન્ચ કરવામાં આવી છે, જે દર્શનાર્થીઓ માટે ખૂબ જ મદદરૂપ સાબિત થશે.
ચુસ્ત સુરક્ષા અને તબીબી સેવા
મેળાની સુરક્ષા માટે 4,400 પોલીસકર્મીઓ અને 1,000 હોમગાર્ડ તૈનાત કરવામાં આવ્યા છે. સમગ્ર મેળા વિસ્તારને 22 સેક્ટરોમાં વહેંચવામાં આવ્યો છે. સ્વાસ્થ્ય સુવિધા માટે 14 કેમ્પ, 80 ડોક્ટર્સ અને 30 એમ્બ્યુલન્સ રાત-દિવસ સેવામાં હાજર રહેશે.
આ પણ વાંચો:રાજસ્થાનમાં ઉદયપુર હાઈવે પર અકસ્માત: ગુજરાતના ત્રણ યુવકના મોત
આ પણ વાંચો:રાજસ્થાનના હનુમાનગઢમાં ઇથેનોલ પ્લાન્ટ વિવાદથી હિંસા ભભૂકી, ખેડૂતો અને પોલીસ વચ્ચે અથડામણ
આ પણ વાંચો:રાજસ્થાનમાં NCBની મોટી કાર્યવાહી, રસાયણોનો જથ્થો જપ્ત
