નકલી પીએમઓ ઓફિસર તરીકે કાશ્મીરમાં ઝેડ પ્લસ સુરક્ષા મેળવનાર કિરણ પટેલના કેસમાં નવા-નવા ખુલાસા થઈ રહ્યા છે. મહાઠગ કિરણ પટેલે જમ્મુ-કાશ્મીર પ્રશાસનને છેતરવા માટે માત્ર 100 રૂપિયા ખર્ચ્યા હતા. અમદાવાદના ઘોડાસર વિસ્તારમાં રહેતો કિરણ પટેલને મણિનગરમાંથી રૂ.100માં છપાયેલા માત્ર 10 વિઝિટિંગ કાર્ડ મળ્યા હતા. આ વિઝિટિંગ કાર્ડ્સના આધારે તેણે સમગ્ર જમ્મુ-કાશ્મીર પ્રશાસન સાથે છેતરપિંડી કરી અને પછી ધમકી પણ આપી. કિરણ પટેલે ગયા ફેબ્રુઆરી અને માર્ચમાં શ્રીનગરમાં ચાર અમલદારો, ભાજપના કેટલાક વરિષ્ઠ નેતાઓ અને પોલીસ અધિકારીઓ સાથેની બેઠકો માટે અમદાવાદના મણિનગર ખાતે છપાયેલા વિઝિટિંગ કાર્ડનો ઉપયોગ કર્યો હતો. પોલીસ તપાસમાં સામે આવ્યું છે કે કિરણ પટેલ વિઝિટિંગ કાર્ડ આપ્યા બાદ પાછા લઇ લેતો હતો.

વાહન ન મળવા પર ધમકી આપી હતી

એક અહેવાલ મુજબ, જ્યારે શ્રીનગર પોલીસે તેને હોટેલ લલિતના રૂમ નંબર 1107માંથી પકડી પાડ્યો ત્યારે કિરણ પટેલ સાથે અમિત પંડ્યા અને જય સીતાપરા પણ હાજર હતા. પોલીસ સૂત્રોના જણાવ્યા અનુસાર આ વખતે શ્રીનગર પહોંચતા જ કિરણ પટેલે શ્રીનગરના વરિષ્ઠ પોલીસ અધિકારી સહિત વિવિધ અધિકારીઓને ફોન કર્યો હતો. તેમાં તેણે તેના અને તેના બે સાથીદારો માટે હોટલ, ઝેડ પ્લસ સુરક્ષા અને બુલેટપ્રૂફ વાહનોની વ્યવસ્થા કરવાનું કહ્યું હતું.

આ બે યુવાનોની ઓળખ થઈ ગઈ છે અને બંનેને ચાર દિવસ પહેલાં કાશ્મીર પોલીસ અમદાવાદ આવીને કાશ્મીર લઈ ગઈ છે. જ્યાં બંનેની પૂછતાછ થશે. આ બે યુવાનોમાં એક ગુજરાતના મુખ્યમંત્રી કાર્યાલયના PRO હિતેષ પંડ્યાના પુત્ર અમિત પંડ્યા છે અને બીજો તેનો મિત્ર જય સીતાપરા છે. અમિત પંડ્યા CCTV નેટવર્કિંગની કંપની ચલાવે છે અને ગુજરાત ભાજપ પ્રદેશની ટીમમાં મીડિયા ઇન્ચાર્જ છે.

મુખ્યમંત્રી કાર્યાલય (CMO)ના જનસંપર્ક અધિકારી (PRO) હિતેષ પંડ્યાના પુત્ર અમિત પંડ્યા અને તેના મિત્ર જય સીતાપરા ચારેક દિવસથી જમ્મુ કાશ્મીર પોલીસના કબજામાં છે. મહાઠગ કિરણ પટેલ સાથે આ બંને કાશ્મીરની સહેલગાહમાં સામેલ હતા. ઝેડ પ્લસ સિક્યોરિટી લેયરમાં રોલા પાડનારા મહાઠગનો ભાંડો ત્રીજી માર્ચે ફૂટ્યા બાદ આ બંને ગુજરાત પરત આવી ગયા હતા, પરંતુ કિરણ પટેલના રિમાન્ડ બાદ તેમને કાશ્મીર બોલાવી પૂછપરછ કરાઈ હતી. ત્યારબાદ બંનેની ધરપકડ કરાઈ છે.

સૂત્રોના જણાવ્યા અનુસાર, ધરપકડના થોડા દિવસો પહેલા આરોપી કિરણ પટેલે શ્રીનગરમાં તેના એસ્કોર્ટ સાથે મોબાઈલ સિગ્નલ જામર ન આપવા બદલ એક વરિષ્ઠ પોલીસ અધિકારીને પણ ફટકાર લગાવી હતી. બીજી તરફ ગુજરાત પોલીસના એક વરિષ્ઠ પોલીસ અધિકારીએ ખુલાસો કર્યો છે કે કિરણ પટેલ, પંડ્યા અને સીતાપરાએ વિવિધ વરિષ્ઠ રાજકારણીઓ અને નિવૃત્ત સરકારી અધિકારીઓને કાશ્મીરમાં વિવિધ પ્લોટના સપના બતાવ્યા હતા.

કોણ છે જય સીતાપરા

જય સીતાપરા નામનો વ્યક્તિ ખરેખર કોણ છે તે હજી સુધી જાણી શકાયું નથી, પરંતુ રાજકોટનો આ યુવાને પણ મહાઠગ કિરણ પટેલ સાથે કાશ્મીરમાં PMOનું નામ વટાવીને સુવિધાઓ ભોગવી હતી. ગુજરાત CMOના PRO હિતેષ પંડ્યાનો પુત્ર અમિત પોતે CCTV નેટવર્કિંગની કંપની ચલાવે છે અને તે પણ વ્યવસાયને વિસ્તારવા કિરણ સાથે કાશ્મીર ગયો હતો. અમિત પંડ્યા પોતે ગુજરાત ભાજપ પ્રદેશની ટીમમાં મીડિયા ઇન્ચાર્જ હોવાથી ભાજપના અનેક યુવા નેતા- કાર્યકરો પણ મહાઠગ કિરણ પટેલ સાથે જોડાયેલા હોવાનું ચર્ચાય છે. આ કારણોસર દેશની સુરક્ષા સાથે જોડાયેલી અત્યંત સંવેદનશીલ બાબતે ન તો ગુજરાત સરકાર, ભાજપના નેતા કે ભાજપ સરકારના નિયંત્રણ હેઠળની ATSથી લઈને સમગ્ર પોલીસમાં કોઈ જ મગનું નામ મરી પાડી રહ્યું નથી! કારણ કે, મહાઠગ કિરણ સાથે ન કેવળ ભાજપ પણ RSS સાથે સંકળાયેલા મોટા નેતાઓ પણ જોડાયેલા છે.

મોટા જોડાણો સામે આવી રહ્યા છે

કિરણ પટેલ મોટા નેતાઓ સાથે તેમના નામનો ઉપયોગ કરીને છેતરપિંડીનો ધંધો ચલાવતો હોવાનું પોલીસ તપાસમાં બહાર આવ્યું છે. છેલ્લી વખત જ્યારે તે પકડાયો હતો, ત્યારે તેના જોડાણો અને સંપર્કોને કારણે તેને ઝડપથી છોડી દેવામાં આવ્યો હતો. વડોદરામાં જ્યારે તેની ધરપકડ કરવામાં આવી ત્યારે પોલીસે તેને થોડા કલાકોમાં જ છોડી દીધો હોવાનું કહેવાય છે. આવું જ કંઈક અન્ય કેસોમાં પણ બન્યું છે. જો કે કિરણ પટેલ નકલી પીએમઓ ઓફિસર બનવાના કારણે શ્રીનગર પોલીસના સકંજામાં આવી ચૂક્યા છે, પરંતુ આ વખતે પણ તેમની સામે છેતરપિંડી, છેતરપિંડી અને બનાવટી દસ્તાવેજો બનાવવા અને ગેરમાર્ગે દોરવાના આરોપમાં કેસ નોંધવામાં આવ્યો છે. શ્રીનગર પોલીસની અત્યાર સુધીની તપાસમાં કિરણ પટેલનો મોટો કાળો પત્ર બહાર આવ્યો છે. આ સાથે તેના નેતાઓ અને અધિકારીઓ સાથેના સંબંધો પણ સામે આવ્યા છે.

આ પણ વાંચો:ઠગ કિરણ પટેલ પર રાજ્યસભામાં ચર્ચાની માંગ, શક્તિસિંહે કહ્યું- આરોપીને કેવી રીતે મળી Z પ્લસ સુરક્ષા

આ પણ વાંચો:મહાઠગ કિરણ પટેલને સુરતના ડાયમંડ અગ્રણીએ કર્યો મોટો ખુલાસો, જાણો શું કહ્યું

આ પણ વાંચો:કિરણ પટેલ મામલે વધુ એક ખુલાસો, જાણો કોણ છે અને ક્યાં ક્યાં નોધાઇ ચુક્યા છે તેના સામે કેસ

આ પણ વાંચો:પાટણમાં મોટાભાઈના મોતના સમાચાર સાંભળી નાના ભાઈનું પણ પ્રાણ પંખેરુ ઉડી ગયું