શિવસેના પ્રમુખ ઉદ્ધવ ઠાકરેએ બુધવારે કોંગ્રેસના વરિષ્ઠ નેતા અહેમદ પટેલ અને બાદમાં પાર્ટીના બે ટોચના નેતાઓ અશોક ચવ્હાણ અને બાળાસાહેબ થોરાત સાથે કોંગ્રેસ અને રાષ્ટ્રવાદી કોંગ્રેસ પાર્ટી સાથે જોડાણ નક્કી કરવા બેઠક યોજી હતી. 24 કલાકમાં કોંગ્રેસ સાથે આ બીજી બેઠક કર્યા બાદ ઠાકરેએ કહ્યું કે, હવે આપણો સંવાદ યોગ્ય દિશામાં શરૂ થયો છે. બુધવારે સવારે બાંદ્રા કુર્લા સંકુલથી નીકળતી વખતે ઠાકરેએ પત્રકારોને જણાવ્યું હતું કે – યોગ્ય સમયે, બધાની સામે ગઠબંધનની જાહેરાત કરવામાં આવશે.
સેના પ્રમુખે ગઈકાલે સૂચવ્યું હતું કે કોંગ્રેસ-એનસીપી સાથે સૂચિત શિવસેનાના જોડાણમાં થોડો સમય લાગી શકે છે, કારણ કે આ પહેલીવાર છે જ્યારે ત્રણેય પક્ષો મળીને સરકાર બનાવવાનો પ્રયાસ કરી રહ્યા છે. તેમણે પોતાની પત્રકાર પરિષદમાં શિવસેના અને કોંગ્રેસની જુદી જુદી વિચારધારાઓનો પણ ઉલ્લેખ કર્યો હતો.
આપને જણાવી દઈએ કે અહેમદ પટેલ અને ઠાકરે વચ્ચે આ પહેલી મુલાકાત હતી. અગાઉ બંનેએ ફોન પર વાતચીત કરી હતી. કોંગ્રેસ અધ્યક્ષના વિશેષ સહાયક અહમદ પટેલ સરકાર બનાવવા માટે એનસીપીના પ્રમુખ શરદ પવાર સાથે મુલાકાત માટે મુંબઇ છે.
નોંધનીય છે કે, અગાઉ શિવસેનાએ બુધવારે ભાજપ પર આકરા પ્રહાર કરતા કહ્યું હતું કે ભાજપ મહારાષ્ટ્રમાં અન્ય પક્ષોની સરકાર બનાવવાની મુશ્કેલીઓનો આનંદ માણી રહ્યું છે. તે જ સમયે, સંજય રાઉતે બુધવારે ‘અગ્નિપથ’ શબ્દને ત્રણ વખત ટ્વિટ કર્યો હતો, જેણે તેમના રાજકીય હરીફો કોંગ્રેસ અને એનસીપી સાથે સરકાર બનાવવાના તેમના પક્ષના પ્રયાસોને ધ્યાનમાં રાખીને મુશ્કેલ માર્ગનો સંકેત આપ્યો હતો. તેમણે લખ્યું હતું કે અગ્નિપથ, અગ્નિપથ, અગ્નિપથ….
મહત્ત્વની વાત એ છે કે, મહારાષ્ટ્રમાં સરકારની રચના અંગેના માંઠાગાંઠની વચ્ચે મંગળવારે રાષ્ટ્રપતિ શાસન લાદવામાં આવ્યું હતું. રાજ્યપાલ ભગતસિંહ કોશ્યારી દ્વારા કેન્દ્રને મોકલવામાં આવેલા અહેવાલ પછી આ નિર્ણય લેવામાં આવ્યો હતો, જેમાં તેમણે કહ્યું હતું કે તમામ પ્રયાસો છતાં રાજ્યમાં સ્થિર સરકારનું નિર્માણ શક્ય નથી. જો કે, બિન-ભાજપ પક્ષો દ્વારા તેમના નિર્ણયની ખુલ્લેઆમ ટીકા કરવામાં આવી રહી છે.
ઉલ્લેખનીય છે કે, મહારાષ્ટ્રમાં રાષ્ટ્રપતિ શાસનમાં પણ સરકાર બનાવવાનો માર્ગ હજુ ખુલ્લો છે. કોઇ પણ પક્ષ પોતાના બહુમત MLAનાં સંમતીપત્ર સાથે રાજ્યપાલ સમક્ષ સરકાર રચનાનો દાવો કરી શકે છે.
નીચે આપેલી લીંક પર ક્લિક કરીને જોડાવ મંતવ્ય ન્યૂઝ સાથે…
તમે અમને ફેસબુક, ટ્વીટર, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.
લેટેસ્ટ ન્યૂઝ અપડેટ્સ આપના ફોન પર સૌથી ઝડપી મેળવવા માટે આજે જ ડાઉનલોડ કરો “મંતવ્ય ન્યૂઝ” ની નવી મોબાઇલ એપ્લિકેશન.
