માલદીવ આવ્યું ઘૂંટણિયે, ભારત સાથે સંબંધ સુધારવા RuPay સેવા શરૂ કરવાની યોજના

ગત દિવસોમાં ભારત અને માલદીવ વચ્ચે વધી રહેલા તણાવ બાદ હવે પાડોશી દેશ તરફથી મિત્રતાનો હાથ લંબાવવામાં આવી રહ્યો છે. બંને દેશો વચ્ચે તણાવ વધ્યા બાદ માલદીવમાં જનારા ભારતીય પ્રવાસીઓની સંખ્યામાં ભારે ઘટાડો જોવા મળ્યો હતો. વિદેશી પ્રવાસીઓની આવક પર નિર્ભર માલદીવની અર્થવ્યવસ્થાને મોટું નુકસાન થયું હતું. હવે માલદીવ, ભારતની RuPay સેવા શરૂ કરવાની યોજના બનાવી રહ્યું છે. માલદીવના આ પગલાને પાછલા દિવસોમાં વધી રહેલા તણાવને ઘટાડવાની દિશામાં એક પગલું માનવામાં આવી રહ્યું છે. માલદીના એક કેબિનેટ મંત્રીએ કહ્યું કે આનાથી માલદીવની કરન્સી રુફિયા મજબૂત થશે.

લોન્ચ તારીખ વિશે કોઈ માહિતી નથી

માલદીવ દ્વારા આ પગલું એવા સમયે લેવામાં આવી રહ્યું છે જ્યારે ભારત સાથે તેના સંબંધો સામાન્ય નથી. માલદીવના મંત્રીએ કહ્યું કે યુએસ ડૉલરની સમસ્યાને ઉકેલવી અને માલદીવની કરન્સી રુફિયા (MVR)ને મજબૂત બનાવવી એ સરકારની સૌથી મોટી પ્રાથમિકતા છે. જોકે, કાર્ડના લોન્ચિંગની તારીખ અંગે કોઈ માહિતી આપવામાં આવી નથી. અહેવાલો અનુસાર, તેમણે કહ્યું કે RuPay કાર્ડનો ઉપયોગ ‘માલદીવમાં રૂપિયાના વ્યવહારો માટે’ કરવામાં આવશે.

માલદીવની ચલણ રૂફિયાને પ્રોત્સાહન મળશે
નેશનલ પેમેન્ટ કોર્પોરેશન ઓફ ઈન્ડિયા (NPCI) એ ભારતમાં ગ્લોબલ કાર્ડ પેમેન્ટ નેટવર્કમાં સામેલ પ્રથમ કાર્ડ છે. એટીએમમાં ચૂકવણી કરવા, માલની ખરીદી અને વેચાણ અને ઈ-કોમર્સ વેબસાઇટ્સ પર તે ભારતમાં સંપૂર્ણ રીતે સ્વીકારવામાં આવે છે. આર્થિક વિકાસ અને વેપાર પ્રધાન મોહમ્મદ સઈદે ભારતની RuPay સેવા શરૂ કરવાની જાહેરાત કરી. તેમણે કહ્યું કે ભારત અને ચીન દ્વિપક્ષીય વેપારમાં સ્થાનિક ચલણનો ઉપયોગ કરવા માટે સંમત થયા છે. સઈદે સરકારી ન્યૂઝ ચેનલ ‘PSM ન્યૂઝ’ને જણાવ્યું, ‘માલદીવ્સ રુફિયા (MVR) ને ભારતની RuPay સેવાની શરૂઆત સાથે વધુ પ્રોત્સાહન મળવાની અપેક્ષા છે.’

આર્થિક સંબંધોને મજબૂત કરવા કરશે ચર્ચા
ન્યૂઝ વેબસાઈટ CorporateMaldives.comએ ગયા અઠવાડિયે સઈદને ટાંકીને કહ્યું હતું કે આ કાર્ડનો ઉપયોગ માલદીવમાં રૂપિયાના વ્યવહારો માટે કરવામાં આવશે. મંત્રીએ કહ્યું, ‘અમે હાલમાં રૂપિયામાં ચૂકવણીની સુવિધા માટેના રસ્તાઓ શોધવા માટે ભારત સાથે ચર્ચા કરી રહ્યા છીએ.’ ઑગસ્ટ 2022 માં માલદીવના ભૂતપૂર્વ રાષ્ટ્રપતિ ઇબ્રાહિમ મોહમ્મદ સોલિહની ભારતની સત્તાવાર મુલાકાત દરમિયાન, એક સંયુક્ત નિવેદનમાં માલદીવમાં RuPay કાર્ડ શરૂ કરવાના નિર્ણયને આવકારવામાં આવ્યો હતો. દ્વિપક્ષીય પ્રવાસ, પર્યટન અને આર્થિક સંબંધોને મજબૂત કરવાના ઉપાયો પર ચર્ચા કરવા પણ સંમત થયા હતા.

ભારત સાથે સંબંધ બગડતા થયું નુકસાન
ભારત સાથે તંગદિલીના કારણે માલદીવને નુકસાન થયું છે. ચાર મહિનામાં માલદીવ પહોંચનારા ભારતીય પ્રવાસીઓની સંખ્યા લગભગ અડધી થઈ ગઈ છે. આ સમયગાળા દરમિયાન પ્રવાસીઓની સંખ્યામાં 42 ટકાનો ઘટાડો થયો છે. પ્રવાસીઓની સંખ્યામાં ઘટાડો થતાં માલદીવે પણ ભારતીય પ્રવાસીઓને આવવાની અપીલ કરી છે. પ્રવાસન મંત્રી ઈબ્રાહિમ ફૈઝલે બંને દેશો વચ્ચેના સંબંધો પર ભાર મૂક્યો હતો અને ભારત સાથે કામ કરવાની વાત કરી હતી. તેમણે સ્પષ્ટ કહ્યું હતું કે આપણી અર્થવ્યવસ્થા પ્રવાસન પર નિર્ભર છે. પર્યટન મંત્રાલય દ્વારા જાહેર કરવામાં આવેલા આંકડા અનુસાર, આ વર્ષે જાન્યુઆરીથી એપ્રિલ સુધીમાં 42,638 ભારતીય પ્રવાસીઓએ માલદીવની મુલાકાત લીધી હતી. પરંતુ ગયા વર્ષે આ ચાર મહિનામાં 73,785 ભારતીય પ્રવાસીઓએ માલદીવની મુલાકાત લીધી હતી.