Philippines Earthquake 2026: દક્ષિણ ફિલિપાઇન્સમાં સોમવારે સવારે આવેલા એક અત્યંત વિનાશક ભૂકંપે ભારે તબાહી મચાવી છે. રિક્ટર સ્કેલ પર 7.8 ની પ્રચંડ તીવ્રતા ધરાવતા આ શક્તિશાળી ભૂકંપના કારણે અત્યાર સુધીમાં ઓછામાં ઓછા 37 લોકોના કમકમાટીભર્યા મોત થયા છે અને 500 થી વધુ લોકો ગંભીર રીતે ઘાયલ થયા છે. આ કુદરતી આફતના કારણે 20000 થી વધુ લોકો બેઘર બન્યા છે, જેમને ઇમરજન્સી આશ્રયસ્થાનોમાં ખસેડવામાં આવ્યા છે. હાલમાં સત્તાવાર રીતે 4 લોકો ગુમ છે, પરંતુ કાટમાળ નીચે હજુ પણ અનેક લોકો દબાયા હોવાની આશંકા વચ્ચે બચાવકર્મીઓ દ્વારા મંગળવારે પણ ધરાશાયી થયેલી ઇમારતોમાં સઘન સર્ચ ઓપરેશન ચલાવવામાં આવી રહ્યું છે.
સુનામીનો ફફડાટ અને ભૂસ્ખલનથી મોટી જાનહાનિ
ભૂકંપનું કેન્દ્રબિંદુ ફિલિપાઇન્સના(Philippines) બીજા સૌથી વધુ વસ્તી ધરાવતા ટાપુ મિંડાનનની દરિયાઈ સરહદમાં હતું:
દરિયામાં ઉછળ્યા મોજા: તીવ્ર આંચકાના કારણે દરિયામાં 1.4 મીટર (4.6 ફૂટ) ઊંચા મોજા ઉછળતા લોકોમાં સુનામીનો ફફડાટ ફેલાયો હતો. જોકે, સુનામીના નાના મોજા ઇન્ડોનેશિયા અને દક્ષિણ જાપાન સુધી પહોંચ્યા હતા.
ભૂસ્ખલનથી તબાહી: સૌથી વધુ તબાહી ભૂસ્ખલન અને ઇમારતો પડવાના કારણે થઈ છે. ફિલિપાઇન્સની(Philippines) ‘ટુના કેપિટલ’ તરીકે ઓળખાતા જનરલ સેન્ટોસ શહેરમાં કાટમાળ પડવાથી 13 લોકોના મોત થયા છે, જ્યારે સારાંગાની પ્રાંતના પહાડી નગરમાં ભૂસ્ખલન થતાં અનેક મકાનો દબાઈ ગયા હતા, જેમાં 18 લોકોએ જીવ ગુમાવ્યો છે.
Philippines માં શાળાના પહેલા જ દિવસે કુદરતી આફત
આ ભયાનક ભૂકંપ એવા સમયે આવ્યો જ્યારે બે મહિનાના ઉનાળુ વેકેશન પછી શાળાઓનો પહેલો જ દિવસ હતો. સવારની ધ્વજવંદન સભા માટે ઉત્સાહભેર એકઠા થયેલા માસૂમ વિદ્યાર્થીઓ આ આફતમાં મોટી સંખ્યામાં ઇજાગ્રસ્ત થયા છે.
પ્રારંભિક સરકારી આંકડા મુજબ, આશરે 2000 મકાનો અને 117 સરકારી ઇમારતોને ભારે નુકસાન થયું છે. જનરલ સેન્ટોસનું આંતરરાષ્ટ્રીય એરપોર્ટ બંધ કરી દેવામાં આવ્યું છે, જેના કારણે 63 ડોમેસ્ટિક ફ્લાઇટ્સ રદ કરવી પડી છે. પ્રશાસને જણાવ્યું છે કે અંદાજે 6000 સરકારી શાળાની ઇમારતોની કડક તપાસ કર્યા વગર શાળાઓ ફરી શરૂ કરી શકાય તેમ નથી, કારણ કે આફ્ટરશોક્સના કારણે તિરાડો પડેલી ઇમારતો ગમે ત્યારે તૂટી પડવાનું જોખમ છે.
વર્ષ 1976 પછીનો દેશનો સૌથી વિનાશક ભૂકંપ
નિષ્ણાતોના જણાવ્યા અનુસાર, કોટાબેટો ટ્રેન્ચમાં થયેલી પ્લેટ્સની હલચલને કારણે આ ભૂકંપ આવ્યો હતો અને તે 1976 પછીનો દેશનો સૌથી શક્તિશાળી ભૂકંપ છે.
અગાઉ 17 August 1976 ના રોજ આ જ વિસ્તારમાં 8.1 ની તીવ્રતાનો ભૂકંપ આવ્યો હતો, જેનાથી સર્જાયેલી વિનાશક સુનામીમાં 8000 લોકોના મોત થયા હતા.
આ સિવાય 1990 માં પણ 7.8 ની તીવ્રતાના ભૂકંપે ઉત્તરીય પ્રાંતોમાં 1000 થી વધુ લોકોનો ભોગ લીધો હતો.
આ ભયાનક આપત્તિને જોતા રાષ્ટ્રપતિ ફર્ડિનાન્ડ માર્કોસ જુનિયરે મનિલાથી ઉચ્ચ સંરક્ષણ અધિકારીઓને રાહત સામગ્રી અને બચાવ કામગીરી પર દેખરેખ રાખવા માટે પ્રભાવિત વિસ્તારોમાં રવાના કર્યા છે.
‘રિંગ ઓફ ફાયર’ પર હોવાના કારણે સતત જોખમ
આ મુશ્કેલ સમયમાં અમેરિકા, ફ્રાન્સ, જાપાન અને ન્યુઝીલેન્ડ જેવા દેશોએ ફિલિપાઇન્સને(Philippines) મદદ કરવાની તત્પરતા દર્શાવી છે. ભૌગોલિક દ્રષ્ટિએ ફિલિપાઇન્સ (Philippines) પ્રશાંત મહાસાગરના ‘રિંગ ઓફ ફાયર’ (Ring of Fire) પર આવેલું હોવાથી ત્યાં વારંવાર ધરતીકંપ અને જ્વાળામુખી વિસ્ફોટ જેવી ઘટનાઓ બનતી રહે છે. આ ઉપરાંત, આ ટાપુ સમૂહ દર વર્ષે આશરે 20 જેટલા ભયાનક વાવાઝોડા અને દરિયાઈ તોફાનોનો સામનો કરે છે, જે તેને વિશ્વના સૌથી વધુ આપત્તિ-સંભવિત દેશોમાંથી એક બનાવે છે.
