નવી દિલ્હી,
છેલ્લા કેટલાક સમયથી દેશભરમાં લોકસભાની ચૂંટણીની સાથે સાથે રાજ્યોની વિધાનસભાની ચૂંટણી યોજવાને લઈ ચર્ચાઓનો દોર ચાલી રહ્યો છે, ત્યારે આ વચ્ચે ઇલેકશન કમિશન દ્વારા આગામી વર્ષે લોકસભાની સાથે દેશના ૫ રાજ્યોની વિધાનસભાની ચૂંટણી યોજી શકે છે.
સૂત્રો દ્વારા પ્રાપ્ત માહિતી અનુસાર, ચૂંટણીપંચ ૦૧૯માં લોકસભાની સાથે આંધ્રપ્રદેશ, ઓરિસ્સા, સિક્કિમ, અરુણાચલ પ્રદેશ અને જમ્મુ-કાશ્મીર વિધાનસભા સભાની ચૂંટણી યોજવા માટેના સંકેત મળી રહ્યા છે.
એક અધિકારીના જણાવ્યા અનુસાર, લોકસભા ચૂંટણીની સાથે સાથે આંધ્રપ્રદેશ, ઓરિસ્સા, સિક્કિમ, અરુણાચલ પ્રદેશ એમ ચાર રાજ્યોની ચૂંટણી કરીને ચૂંટણીપંચ પોતાની પહેલાની પરંપરા નિભાવશે.
જમ્મુ-કાશ્મીરની ચૂંટણી યોજવાને લઈ તેઓએ કહ્યું, “J & K માં વિધાનસભા ભંગ કર્યા બાદ છ મહિનાની અંદર જ ફરીથી ચૂંટણી કરાવવાની છે અને તેની સીમા મેં મહિનામાં સમાપ્ત થઇ રહી છે. આ અરસામાં ચૂંટણીપંચ લોકસભાની સાથે જમ્મુ-કાશ્મીરની ચૂંટણી પણ યોજી શકે છે.
જમ્મુ-કાશ્મીરની વિધાનસભાનો કાર્યકાળ છ વર્ષનો હોય છે, પરંતુ રાજ્યપાલ દ્વારા રાજ્યની વિધાનસભા ભંગ કરવામાં આવી ચુકી છે. જો કે જમ્મું-કાશ્મીરની વિધાનસભાનો કાર્યકાળ ૧૬ માર્ચ, ૨૦૨૧ સુધી હતો.
બીજી બાજુ આંધ્રપ્રદેશ વિધાનસભાનો કાર્યકાળ ૧૮ જૂન, ઓરિસ્સાનો ૧૧ જૂન, સિક્કિમનો ૨૭ મે અને અરુણાચલ પ્રદેશનો ૧ જૂનના રોજ સમાપ્ત થઇ રહ્યો છે.
