ભુવનેશ્વર,
દેશભરમાં વસ્તીગીચતા ધરાવતા શહેરોમાં વધી રહેલા વાહનોની સાથે સાથે ટ્રાફિકની સમસ્યા પણ જટિલ બનતી જાય છે, ત્યારે આ ટ્રાફિકને કંટ્રોલ કરવા માટે ટ્રાફિક પોલીસ જવાનોની તૈનાતી કરવામાં આવતી હોય છે.
દિવસભર શહેરોમાં ટ્રાફિકને કંટ્રોલ કરવા માટે પોલીસના જવાનો તૈનાત રહેતા હોય છે. આ દરમિયાન કેટલાક ટ્રાફિક પોલીસના જવાનો કઈક અલગ અંદાજમાં પણ પોતાની ડ્યુટી નિભાવતા હોય છે, ત્યારે આ જ પ્રકારે કોઈ બોલીવુડના ફિલ્મના હીરોની જેમ જ ડાન્સ કરીને ટ્રાફિકને કંટ્રોલ કરતો એક જવાનનો વીડિયો સામે આવ્યો છે. આ વીડિયો સોશિયલ મીડિયામાં વાઈરલ થઇ રહ્યો છે.
હકીકતમાં, આ વીડિયો ઓરિસ્સાની રાજધાની ભુવનેશ્વરમાં તૈનાત એક ટ્રાફિક જવાનનો છે. ૩૩ વર્ષીય પ્રતાપ ચંદ્ર ખંડવાલ કે જેઓ પહેલા હોમગાર્ડમાં ફરજ બજાવતા હતા, પરંતુ ત્યારબાદ તેઓને ટ્રાફિક પોલીસમાં તૈનાત કરવામાં આવ્યા છે.
આ દરમિયાન પી સી ખંડવાલ નામના ટ્રાફિક પોલીસ જવાન પોતાના ડાન્સ મુવ દ્વારા ટ્રાફિકને કંટ્રોલ કરી રહ્યા છે. બીજી બાજુ આ જવાનની અનોખી ડ્યુટી જોઈ લોકો પણ સાથ આપી રહ્યા છે.
ન્યુઝ એજન્સી ANI સાથેની વાતચીતમાં તેઓએ જણાવ્યું હતું કે, “હું મારા ડાન્સના મુવ દ્વારા લોકોને ટ્રાફિકના નિયમોનું ઉલ્લંઘન ન કરવા માટે સંદેશો આપી રહ્યું છું. સાથે સાથે ટ્રાફિક જવાને કહ્યું, :મારી આ ડાન્સ મુવની સ્ટાઈલ લોકોને ખુબ ગમી રહી છે અને તેઓ નિયમોનું પાલન કરી રહ્યા છે”.
