NFSU Gandhinagar 4th Convocation: વિશ્વની પ્રથમ અને એકમાત્ર ફોરેન્સિક સાયન્સ યુનિવર્સિટી, નેશનલ ફોરેન્સિક સાયન્સિસ યુનિવર્સિટી (NFSU) નો ચતુર્થ દીક્ષાંત સમારોહ આગામી 27 ફેબ્રુઆરી, 2026 ના રોજ યોજાવા જઈ રહ્યો છે. આ ભવ્ય સમારોહમાં કાયદા અને ન્યાયતંત્રના દિગ્ગજો તેમજ રાજ્યના નેતૃત્વની ગરિમામય ઉપસ્થિતિ જોવા મળશે.

ભારતના મુખ્ય ન્યાયાધીશ રહેશે મુખ્ય અતિથિ

આ પ્રસંગે ભારતના માનનીય મુખ્ય ન્યાયાધીશ (CJI) ન્યાયમૂર્તિ સૂર્યકાંત ‘મુખ્ય અતિથિ’ તરીકે ઉપસ્થિત રહી વિદ્યાર્થીઓને પ્રોત્સાહિત કરશે. તેમની સાથે ‘સન્માનનીય અતિથિ’ તરીકે ગુજરાતના નાયબ મુખ્યમંત્રી હર્ષ સંઘવી અને ગુજરાત હાઈકોર્ટના મુખ્ય ન્યાયાધીશ ન્યાયમૂર્તિ સુનિતા અગ્રવાલ ઉપસ્થિત રહેશે. NFSU ના કુલપતિ અને પદ્મશ્રી ડૉ. જે.એમ. વ્યાસ આ સમારોહમાં વિદ્યાર્થીઓને ડિગ્રી એનાયત કરશે.

1799 વિદ્યાર્થીઓનું સન્માન અને 52 ગોલ્ડ મેડલ

કેમ્પસ ડાયરેક્ટર પ્રો. (ડૉ.) એસ.ઓ. જુનારેએ વિગતો આપતા જણાવ્યું હતું કે આ દીક્ષાંત સમારોહમાં કુલ 1,799 વિદ્યાર્થીઓને ડિગ્રી એનાયત કરવામાં આવશે. આ પૈકી 17 જેટલા સંશોધક વિદ્યાર્થીઓ પીએચ.ડી. (Ph.D.) ની પદવી પ્રાપ્ત કરશે, જ્યારે પોતાની શૈક્ષણિક કારકિર્દી દરમિયાન શ્રેષ્ઠ દેખાવ કરનારા તેજસ્વી વિદ્યાર્થીઓને તેમની શૈક્ષણિક શ્રેષ્ઠતા બદલ 52 સુવર્ણ ચંદ્રક (Gold Medals) થી નવાજવામાં આવશે.

IDDRC નું ઉદ્ઘાટન: ન્યાયિક ક્ષેત્રે નવી ક્રાંતિ

આ સમારોહમાં એક મહત્વપૂર્ણ પ્રોજેક્ટ ‘આંતરરાષ્ટ્રીય ડિજિટલ વિવાદ નિવારણ કેન્દ્ર’ (IDDRC) નું ઉદ્ઘાટન CJI દ્વારા કરવામાં આવશે. આ કેન્દ્ર ટેકનોલોજીના માધ્યમથી વિવાદોના ઝડપી અને પારદર્શક નિરાકરણ માટે કામ કરશે. આ પહેલ માત્ર ભારત જ નહીં પરંતુ વૈશ્વિક સ્તરે વિવાદ નિવારણ પ્રક્રિયામાં સીમાચિહ્નરૂપ સાબિત થશે.

આંતરરાષ્ટ્રીય મહાનુભાવોની ઉપસ્થિતિ

દીક્ષાંત સમારોહમાં ઝિમ્બાબ્વે અને સાઉદી અરેબિયાના પ્રતિનિધિઓ સહિત આંતરરાષ્ટ્રીય સ્તરના મહાનુભાવો હાજર રહેશે. આ ઉપરાંત વિવિધ કાયદા અમલીકરણ એજન્સીઓના અધિકારીઓ, ન્યાયિક અધિકારીઓ અને વિદ્યાર્થીઓના પરિવારજનો આ ઐતિહાસિક ક્ષણના સાક્ષી બનશે.

આ પણ વાંચો:Generative AI માનવીય સભ્યતા માટે આશીર્વાદ છે કે અભિશાપ

આ પણ વાંચો:AI દ્વારા અવાજની ચોરી કેવી રીતે થાય છે? ભારતમાં પણ કેસ વધી રહ્યા છે

આ પણ વાંચો:એશિયાની સૌથી મોટી AI ઈવેન્ટ આ રાજ્યમાં યોજાશે! ક્રિકેટરોથી લઈને કલાકારો સામેલ થશે