National News/ બિહારને મળ્યો નવો 6 લેનનો પુલ: PM મોદીએ ‘નીતીશ સેતુ’નું ઉદ્ઘાટન કર્યું

PM મોદીએ બિહારમાં ગંગા પર બનેલા 9.76 કિમી લાંબા અને રૂ.4,280 કરોડના 6 લેનના નીતીશ સેતુનું ઉદ્ઘાટન (Nitish Setu Inauguration) કર્યું.

Top Stories India Breaking News
Nitish Setu Inauguration: રૂ.4,280 કરોડના નીતીશ સેતુનું PM મોદીએ કર્યું ઉદ્ઘાટન

Bihar News: બિહારના વૈશાલી જિલ્લામાં ગંગા નદી પર બનાવવામાં આવેલા છ લેનના કેબલ-સ્ટેડ ‘નીતીશ સેતુ’નું શનિવારે પ્રધાનમંત્રી નરેન્દ્ર મોદીએ ઉદ્ઘાટન (Nitish Setu Inauguration) કર્યું. લગભગ રૂ.4,280 કરોડના ખર્ચે તૈયાર થયેલો 9.76 કિલોમીટર લાંબો આ પુલ વૈશાલીના બિદુપુરને પટનાની બહાર આવેલા કચ્છી દરગાહ સાથે જોડશે. આ પુલ શરૂ થવાથી ઉત્તર અને દક્ષિણ બિહાર વચ્ચેની કનેક્ટિવિટી વધુ મજબૂત બનશે અને વાહનચાલકોને મુસાફરીમાં રાહત મળવાની અપેક્ષા છે.

પ્રધાનમંત્રી મોદી સાથે બિહારના મુખ્યમંત્રી સમ્રાટ ચૌધરી, રાજ્યપાલ લેફ્ટનન્ટ જનરલ સૈયદ અતા હસનૈન (નિવૃત્ત), કેન્દ્રીય મંત્રી ચિરાગ પાસવાન સહિતના અધિકારીઓ ઉપસ્થિત રહ્યા હતા. પુલ પર પહોંચતા પહેલાં મોદીએ પટના એરપોર્ટ પર નીતિશ કુમાર સાથે મુલાકાત પણ કરી (PM Modi Bihar Visit) હતી. આ ઉપરાંત તેઓ રોડ કનેક્ટિવિટી, ઊર્જા, શહેરી માળખાગત સુવિધાઓ, જળ સંસાધનો, શિક્ષણ અને આરોગ્ય ક્ષેત્રના અન્ય વિકાસ પ્રોજેક્ટ્સનું પણ ઉદ્ઘાટન કરવાના છે.

Nitish Setu Inauguration: મહાત્મા ગાંધી સેતુ અને જેપી સેતુ પર ટ્રાફિકનું દબાણ ઘટશે

પ્રધાનમંત્રી કાર્યાલયના નિવેદન અનુસાર, ‘નીતીશ સેતુ’ ગંગા પર એક વધારાનો મહત્ત્વપૂર્ણ માર્ગ (Bihar Ganga Bridge) પૂરો પાડશે. તેનાથી હાલના મહાત્મા ગાંધી સેતુ અને જેપી સેતુ પર વાહનોનું દબાણ ઘટશે તેમજ ઉત્તર અને દક્ષિણ બિહાર વચ્ચે મુસાફરીનો સમય ઓછો થવાની અપેક્ષા છે.

આ પુલનો ખાસ લાભ વૈશાલી જિલ્લાના રાઘોપુર દિયારા વિસ્તારને મળશે. ગંગા નદીથી ઘેરાયેલા આ વિસ્તારમાં અત્યાર સુધી કનેક્ટિવિટીની મર્યાદિત સુવિધા હતી. નવા પુલથી પટનાના રહેવાસીઓને હોસ્પિટલો, શૈક્ષણિક સંસ્થાઓ અને અન્ય આવશ્યક સેવાઓ સુધી પહોંચવામાં પણ સરળતા રહેશે.

વેપાર, કૃષિ અને પ્રવાસનને મળશે વેગ

આ પુલથી માત્ર મુસાફરોની અવરજવર જ સરળ નહીં બને, પરંતુ માલસામાનના પરિવહન અને બજારો સુધી પહોંચવામાં પણ ઝડપ આવશે. ઉત્તર બિહારની કૃષિ આધારિત અર્થવ્યવસ્થાને પણ તેનો લાભ મળવાની અપેક્ષા છે. અધિકારીઓના જણાવ્યા અનુસાર, બિદુપુર-કચ્છી દરગાહ કોરિડોર પ્રવાસન અને લોજિસ્ટિક્સના કેન્દ્ર તરીકે વિકસે તેવી શક્યતા છે, જેનાથી આ વિસ્તારમાં રોકાણને પ્રોત્સાહન મળી શકે છે.

પુલના નામને લઈને રાજકીય વિવાદ

‘નીતીશ સેતુ’ના નામને લઈને બિહારમાં રાજકીય વિવાદ પણ શરૂ થયો છે. શાસક ભાજપ-જેડી(યુ) ગઠબંધન અને વિપક્ષી આરજેડી વચ્ચે આ પ્રોજેક્ટનો શ્રેય કોને મળવો જોઈએ તે મુદ્દે નિવેદનબાજી થઈ રહી છે.

આરજેડીના કાર્યકારી પ્રમુખ તેજસ્વી યાદવે આરોપ લગાવ્યો કે ભાજપ પુલનું નામ નીતિશ કુમારના નામ પર રાખીને એવો સંદેશ આપવાનો પ્રયાસ કરી રહી છે કે તેમની રાજકીય કારકિર્દી હવે સમાપ્ત થઈ ગઈ છે. તેમણે સવાલ ઉઠાવ્યો કે કોઈ વ્યક્તિ જીવિત હોય ત્યારે તેના નામ પર પુલ રાખવાની ઉતાવળ શા માટે કરવામાં આવી રહી છે.

બીજી તરફ, ભાજપે પુલને નીતિશ કુમારના નેતૃત્વ હેઠળ થયેલા વિકાસનું ઉદાહરણ ગણાવ્યું છે. પાર્ટીએ તેજસ્વી યાદવને બેજવાબદાર નેતા ગણાવી તેમના પરિવાર પર ભ્રષ્ટાચારના આરોપો પણ લગાવ્યા છે.

કોંગ્રેસના નેતા પવન ખેરાએ પણ પુલનું નામ નીતિશ કુમારના બદલે દસમા શીખ ગુરુ, ગુરુ ગોવિંદ સિંહના નામ પર ન રાખવા બદલ ભાજપની ટીકા કરી હતી. તેમણે કહ્યું કે આ નિર્ણયથી શીખ સમુદાયની લાગણીઓને ઠેસ પહોંચી છે. તેજસ્વી યાદવની ટિપ્પણીને સમર્થન આપતાં ખેરાએ સોશિયલ મીડિયા પ્લેટફોર્મ X પર નીતિશ કુમારને રાજકીય મુખ્ય પ્રવાહમાંથી બહાર ધકેલવામાં આવી રહ્યા હોવાનો સવાલ ઉઠાવ્યો હતો.

પ્રશાંત કિશોરે નીતિશ કુમારને આપ્યું શ્રેય

જન સુરાજના સ્થાપક પ્રશાંત કિશોરે પુલના નિર્માણ (Bihar Infrastructure) માટે નીતિશ કુમારને શ્રેય આપ્યો હતો. સાથે જ તેમણે ભાજપ અને આરજેડી પર પ્રોજેક્ટનો શ્રેય મેળવવા માટે બિનજરૂરી પ્રયાસ કરવાનો આરોપ લગાવ્યો હતો. કિશોરે એવો પણ દાવો કર્યો કે ભાજપ ધીમે ધીમે નીતિશ કુમારની પાર્ટીને રાજકીય રીતે પોતાની સાથે ભેળવી રહી છે. પુલના ઉદ્ઘાટન પહેલાં NDAનાં પોસ્ટરોમાં નીતિશ કુમારને ઓછું સ્થાન આપવામાં આવ્યું હોવાનો ઉલ્લેખ પણ તેમણે કર્યો હતો.


આ પણ વાંચો: બિહારનું એક અનોખુ ગામ…જ્યાંની લોકો ઘર પર પાકી છત નથી કરાવતા…શેનો છે ડર?

આ પણ વાંચો: 20થી વધુ દેશોમાં પહોંચ્યું બિહારનું મખાના, 30 હજાર ટન નિકાસનું લક્ષ્ય

આ પણ વાંચો: બિહારમાં દિનદહાડે કરોડોની લૂંટ, ત્રણ બાઇક પર આવેલા 8 હથિયારધારી બદમાશોએ JDU નેતાનો શોરૂમ ખાલી કર્યો