નવા વેરિઅન્ટને લઈને મોટા સમાચાર સામે આવ્યા છે. WHO અનુસાર, અત્યાર સુધી 23 દેશોમાં કોરોનાના ઓમિક્રોન વેરિઅન્ટની પુષ્ટિ થઈ છે. આ સાથે સંખ્યા વધવાની આશંકા વ્યક્ત કરવામાં આવી છે. જેમાં યુરોપિયન દેશો બ્રિટન, જર્મની, પોર્ટુગલ, બેલ્જિયમ, નેધરલેન્ડથી લઈને કેનેડા, હોંગકોંગ, જાપાન અને ઓસ્ટ્રેલિયાનો સમાવેશ થાય છે. બ્રિટન, યુરોપિયન યુનિયન અને યુએસએ ચેપના જોખમને કારણે દક્ષિણ આફ્રિકાના દેશો પર ટ્રાવેલ પ્રતિબંધ લાદ્યો છે.અને માસ્ક પહેરવાનું ફરજિયાત બનાવવાથી લઈને બીજી ઘણી માર્ગદર્શિકા જારી કરવામાં આવી છે.
જાપાને જાહેરાત કરી છે કે મંગળવારથી તે નવા વિદેશી પ્રવાસીઓ માટે તેની સરહદો બંધ કરવા જઈ રહ્યું છે. અને, ઓસ્ટ્રેલિયાએ તેની સરહદો પરના નિયંત્રણો હળવા કરવા માટે તેની બહુપ્રતિક્ષિત યોજનાને અસ્થાયી રૂપે મુલતવી રાખી છે. આ પછી, આંતરરાષ્ટ્રીય વિદ્યાર્થીઓ અને ‘કુશળ કામદારો’ જેમણે ઓસ્ટ્રેલિયાના વિઝા લીધા છે તેઓએ 15 ડિસેમ્બર સુધી રાહ જોવી પડશે. ઈઝરાયેલે વિદેશી નાગરિકોના આવવા પર પણ બે સપ્તાહનો પ્રતિબંધ લગાવી દીધો છે. આરોગ્ય નિષ્ણાતોએ એવી આશંકા વ્યક્ત કરી છે કે ઓમિક્રોન વેરિઅન્ટ ડેલ્ટા વેરિઅન્ટ કરતાં વધુ ખતરનાક સાબિત થઈ શકે છે, જેણે ભારત સહિત સમગ્ર વિશ્વમાં હોબાળો મચાવ્યો છે