New Delhi News : ઓપરેશન સિંદૂર (Operation Sindoor)ને લઈને કોંગ્રેસે (Congress)કેન્દ્ર સરકાર અને રક્ષા મંત્રી રાજનાથ સિંહ સામે કડક વલણ અપનાવ્યું છે. કોંગ્રેસે આરોપ લગાવ્યો છે કે રક્ષા મંત્રીએ સંસદમાં ઓપરેશન સિંદૂર દરમિયાન કોઈપણ સૈનિક શહીદ ન થયો હોવાનું નિવેદન આપીને સંસદને ગેરમાર્ગે દોરી અને શહીદ જવાનોનું અપમાન કર્યું છે.
કોંગ્રેસે (Congress) માંગ કરી છે કે રાજનાથ સિંહ (Rajnath Singh)સામે વિશેષાધિકાર હનનનો પ્રસ્તાવ લાવવામાં આવે અને જો તેઓ રાજીનામું ન આપે તો તેમને તાત્કાલિક પદ પરથી હટાવવામાં આવે. સાથે જ વડાપ્રધાન નરેન્દ્ર મોદી, રક્ષા મંત્રી અને ભાજપે શહીદોના પરિવારજનો તથા દેશની જનતા પાસે જાહેર માફી માંગવી જોઈએ તેવી પણ માંગ કરવામાં આવી છે.
શહીદોના નામ જાહેર કરવામાં વિલંબ કેમ થયો?
કોંગ્રેસના પૂર્વ સૈનિક વિભાગના અધ્યક્ષ કર્નલ રોહિત ચૌધરી અને નિવૃત્ત વિંગ કમાન્ડર અનુમા આચાર્યએ પ્રશ્ન ઉઠાવ્યો કે ઓપરેશન મે 2025માં પૂર્ણ થઈ ગયું હોવા છતાં શહીદ થયેલા જવાનોના નામ જાહેર કરવામાં લગભગ 13 મહિનાનો સમય કેમ લાગ્યો? તેમના મતે આ વિલંબથી સૈનિકોના બલિદાનને યોગ્ય સન્માન મળ્યું નથી.
તેમણે દાવો કર્યો કે ઓપરેશન દરમિયાન કુલ 10 જવાનો શહીદ થયા હતા, પરંતુ નેશનલ વોર મેમોરિયલ પર અત્યાર સુધી માત્ર છ જ જવાનોના નામ ઉમેરાયા છે, જ્યારે ચાર નામ હજુ પણ નોંધાયા નથી.
સરકારની સુરક્ષા અને વિદેશ નીતિ પર સવાલ
કોંગ્રેસે પહલગામ આતંકી હુમલાને મોટી સુરક્ષા નિષ્ફળતા ગણાવી અને કહ્યું કે જમ્મુ-કાશ્મીર કેન્દ્રશાસિત પ્રદેશ હોવાથી તેની સુરક્ષાની જવાબદારી કેન્દ્ર સરકારની હતી.
પાર્ટીએ એવો પણ આરોપ લગાવ્યો કે ઓપરેશન સિંદૂર (OperationSindoor)દરમિયાન ભારત પાસે પાકિસ્તાન અધિકૃત કાશ્મીર (PoK) મુદ્દે મજબૂત તક હતી, પરંતુ સરકારની કૂટનીતિક નીતિના કારણે તે તક ગુમાઈ ગઈ.
વિદેશ મંત્રાલય અને સૈન્ય વ્યૂહરચના પર પણ નિશાન
અનુમા આચાર્યએ દાવો કર્યો કે ઓપરેશનની શરૂઆતમાં જ ભારતે પાકિસ્તાનને કાર્યવાહી અંગે માહિતી આપી દીધી હતી, જેના કારણે ભારતીય વાયુસેનાના અચાનક હુમલાની વ્યૂહરચનાને અસર પહોંચી. તેમણે વધુમાં આરોપ લગાવ્યો કે અમેરિકી હસ્તક્ષેપ બાદ થયેલા યુદ્ધવિરામથી ભારતીય સેનાનું મનોબળ પણ અસરગ્રસ્ત થયું.
અગ્નિવીર યોજના પર ફરી વિરોધ
કોંગ્રેસે અગ્નિવીર યોજના સામે પોતાનો વિરોધ પુનરાવર્તિત કરતાં જણાવ્યું કે અગ્નિવીર તરીકે શહીદ થતા જવાનોના પરિવારોને નિયમિત સૈનિકોના પરિવારો જેવી તમામ સુવિધાઓ મળતી નથી. પાર્ટીએ સત્તામાં આવ્યા બાદ અગ્નિવીર યોજના રદ કરવાની પોતાની પ્રતિબદ્ધતા પણ ફરી વ્યક્ત કરી.
કોંગ્રેસ (Congress)ના નેતાઓએ જણાવ્યું કે લોકસભામાં વિપક્ષના નેતા રાહુલ ગાંધી (Rahul Gandhi) અને કોંગ્રેસે ઓપરેશન સિંદૂર (OperationSindoor) દરમિયાન શહીદ થયેલા જવાનોના પરિવારજનોનો સંપર્ક કરીને તેમને સાંત્વના અને સહયોગ આપ્યો હતો.
નોંધ : ઉપરોક્ત તમામ આક્ષેપો કોંગ્રેસ દ્વારા પત્રકાર પરિષદમાં કરવામાં આવ્યા છે. આ મુદ્દે કેન્દ્ર સરકાર અથવા રક્ષા મંત્રાલય તરફથી આ આરોપો અંગે સત્તાવાર પ્રતિક્રિયા ઉપલબ્ધ નથી.
