Palanpur News: બનાસકાંઠાના પાલનપુર શહેરમાં માર્ગની ગુણવત્તાને લઈને ગંભીર સવાલો ઉભા કરતી ઘટના સામે આવી છે. શહેરના વ્યસ્ત આકર્ષણ રોડ પર વહેલી સવારે અચાનક મોટો ભૂવો (Palanpur Road Collapse) પડી ગયો હતો, જેમાંથી પસાર થતો એક ભારે ટ્રક ખાબકી ગયો હતો. ઘટનાને પગલે રોડ પર અફરાતફરીનો માહોલ સર્જાયો હતો.
મળતી માહિતી મુજબ, વહેલી સવારે એક ટ્રક આકર્ષણ રોડ પરથી પસાર થઈ રહ્યો હતો ત્યારે અચાનક રસ્તો ધસી પડ્યો હતો. રોડનો મોટો ભાગ બેસી જતાં ટ્રક ભૂવામાં ફસાઈ ગયો હતો. સદનસીબે મોટી જાનહાનિ ટળી હતી, પરંતુ ઘટનાના કારણે વાહન વ્યવહાર ખોરવાયો હતો.
ટ્રક ભૂવામાં ખાબકતા આકર્ષણ રોડ (Palanpur Road Collapse) પર બંને તરફ વાહનોની લાંબી કતારો લાગી ગઈ હતી. કલાકો સુધી ટ્રાફિકજામની સ્થિતિ સર્જાતા વાહનચાલકોને ભારે હાલાકીનો સામનો કરવો પડ્યો હતો.
Palanpur Road Collapse: રોડની કામગીરી સામે ઉઠ્યા સવાલો
ચોમાસાની શરૂઆતમાં જ આ પ્રકારની ઘટના સામે આવતા પાલનપુર પાલિકા અને માર્ગ-મકાન વિભાગની કામગીરી સામે સવાલો ઉભા થયા છે. સ્થાનિકોના આક્ષેપ મુજબ, થોડા સમય પહેલા બનાવવામાં આવેલા અથવા સમારકામ કરાયેલા રસ્તાની આ હાલત માર્ગ નિર્માણની ગુણવત્તા પર પ્રશ્નો ઉભા કરે છે.
સ્થાનિકોએ આક્ષેપ કર્યો છે કે કરોડો રૂપિયાના ખર્ચ બાદ પણ રસ્તાઓ વરસાદમાં બિસ્માર બની જાય છે. લોકોના જણાવ્યા પ્રમાણે, નબળી કામગીરી અને દેખરેખના અભાવે આવી સમસ્યાઓ વારંવાર સર્જાય છે.
સ્થાનિકોમાં તંત્ર સામે રોષ
ઘટનાને પગલે સ્થાનિક રહીશો અને વાહનચાલકોમાં ભારે રોષ જોવા મળી રહ્યો છે. લોકોએ તંત્ર અને જવાબદાર એજન્સીઓ સામે તપાસ કરવાની માંગ કરી છે. સાથે જ ભૂવો (Palanpur Road Collapse) તાત્કાલિક ભરવા તેમજ રસ્તાની ગુણવત્તાની ચકાસણી કરવા પણ માંગ ઉઠાવવામાં આવી છે.હાલમાં તંત્ર દ્વારા રોડ પર સર્જાયેલી સ્થિતિને નિયંત્રિત કરવા અને ટ્રાફિક વ્યવસ્થા પૂર્વવત કરવા કામગીરી હાથ ધરવામાં આવી છે.
આ પણ વાંચો:છોટાઉદેપુરના બોડેલીમાં 4 વર્ષની બાળકી કોતરના પાણીમાં તણાઈ, 500 મીટર દૂરથી મૃતદેહ મળ્યો
આ પણ વાંચો:અમદાવાદમાં રેડ એલર્ટ વચ્ચે વરસાદની શરૂઆત, પૂર્વ-પશ્ચિમ વિસ્તારોમાં મેઘમહેર; સ્કૂલ-કોલેજોમાં રજા
આ પણ વાંચો:રેડ એલર્ટ વચ્ચે ભાવનગરમાં વરસાદની ધમાકેદાર એન્ટ્રી, 1 ઓગસ્ટે શાળા-કોલેજોમાં શૈક્ષણિક કાર્ય બંધ
