Kalol Nagarpalika Vandalism News: પંચમહાલ જિલ્લાના કાલોલ નગરપાલિકામાં આજે તંત્રની ઘોર બેદરકારી સામે જનતાનો રોષ ચરમસીમાએ પહોંચ્યો હતો. વોર્ડ નંબર-4 માં પાયાની સુવિધાઓના અભાવે છેલ્લા એક વર્ષથી પીડાતા રહીશોનો સંયમ આજે ખૂટ્યો હતો. રજૂઆત કરવા ગયેલા સ્થાનિકો અને કાઉન્સિલરે પાલિકા કચેરીમાં અધિકારીઓની ગેરહાજરી જોઈ ઉશ્કેરાઈ જઈ તોડફોડ કરી હતી, જેના કારણે સમગ્ર પંથકમાં ચકચાર મચી ગઈ છે.

Kalol : એક વર્ષથી રજૂઆતો છતાં પરિણામ શૂન્ય

કાલોલ નગરપાલિકાના વોર્ડ નંબર-4 ના રહીશો છેલ્લા લાંબા સમયથી પીવાના પાણી, ગટર અને રસ્તા જેવી પાયાની સમસ્યાઓનો સામનો કરી રહ્યા છે. સ્થાનિકોનો આક્ષેપ છે કે છેલ્લા એક વર્ષમાં અનેકવાર લેખિત અને મૌખિક રજૂઆતો કરવા છતાં તંત્રના પેટનું પાણી હલતું નથી. જનપ્રતિનિધિ તરીકે કાઉન્સિલરે પણ અનેકવાર પાલિકામાં રજૂઆત કરી હતી, પરંતુ અધિકારીઓ દ્વારા માત્ર આશ્વાસન જ આપવામાં આવતું હતું.

અધિકારીઓની ગેરહાજરીએ બળતામાં ઘી હોમ્યું

આજે ફરી એકવાર વોર્ડ નંબર-4 ના કાઉન્સિલર અને રહીશો આશા સાથે પાલિકા કચેરીએ રજૂઆત કરવા પહોંચ્યા હતા. જોકે, કચેરીમાં કોઈ પણ જવાબદાર અધિકારી હાજર ન મળતા લોકોનો ગુસ્સો સાતમા આસમાને પહોંચ્યો હતો. પ્રજાની સમસ્યા સાંભળવા માટે કોઈ હાજર ન હોવાથી ઉશ્કેરાયેલા ટોળાએ પાલિકાની મિલકતો પર પોતાનો ગુસ્સો ઉતાર્યો હતો.

નગરપાલિકા કચેરીમાં તોડફોડ

રોષે ભરાયેલા લોકોએ પાલિકા કચેરીના ફર્નિચર, કાચ અને અન્ય સરકારી મિલકતોમાં તોડફોડ શરૂ કરી દીધી હતી. જોતજોતામાં પાલિકા કચેરી રણમેદાનમાં ફેરવાઈ ગઈ હતી. સ્થાનિકોનું કહેવું છે કે, “જ્યારે અમે વેરો સમયસર ભરીએ છીએ, તો અમને સુવિધા કેમ નથી મળતી? અને રજૂઆત કરવા આવીએ ત્યારે અધિકારીઓ ક્યાં ગાયબ થઈ જાય છે?”

આ ઘટનાને પગલે કાલોલ પોલીસ પણ હરકતમાં આવી છે અને સરકારી મિલકતને નુકસાન પહોંચાડવા બદલ કાયદેસરની કાર્યવાહી હાથ ધરી છે. જોકે, આ ઘટનાએ સાબિત કરી દીધું છે કે જ્યારે તંત્ર પ્રજાના પ્રશ્નોને નજરઅંદાજ કરે છે, ત્યારે જનતાનો આક્રોશ આવું સ્વરૂપ ધારણ કરી શકે છે.

આ પણ વાંચો:  પંચમહાલના હાલોલના વાંકડીયામાં એસઓજીનો દરોડો પાડી બોગસ ડોક્ટર ઝડપ્યો

આ પણ વાંચો: પંચમહાલમાં એક્સપ્રેસ વે પર અકસ્માતમાં ત્રણનાં મોત

આ પણ વાંચો: પંચમહાલ અને દાહોદ જિલ્લામાં ₹1100 કરોડના વિકાસકામોનું લોકાર્પણ