Pariyaj Wetland Saras Conservation: પર્યાવરણ જાળવણી અને વન્યજીવ સંરક્ષણ ક્ષેત્રે ગુજરાતના ખેડા જિલ્લાએ વૈશ્વિક સ્તરે એક નવો કીર્તિમાન સ્થાપિત કર્યો છે. ખેડા અને આણંદ જિલ્લાની સરહદે આવેલું પરિયેજ વેટલેન્ડ આજે સારસ ક્રેન (Saras Crane) માટે સૌથી સુરક્ષિત આશ્રયસ્થાન બની ગયું છે. વન વિભાગ અને સ્થાનિક સમુદાયના સહિયારા પ્રયાસોથી અહીં સારસની સંખ્યામાં જે ઉછાળો આવ્યો છે, તે પર્યાવરણ પ્રેમીઓ માટે ખુશીના સમાચાર છે.
10 વર્ષમાં સારસની સંખ્યા ત્રણ ગણી વધી
વર્ષ 2015ના આંકડાઓ પર નજર કરીએ તો પરિયેજમાં સારસ પક્ષીઓની સંખ્યા માત્ર 500ની આસપાસ હતી. જોકે, વન વિભાગ, શૈક્ષણિક સંસ્થાઓ અને સ્થાનિક ખેડૂતોની જાગૃતિને કારણે જૂન 2025 સુધીમાં આ સંખ્યા વધીને 1477 પર પહોંચી ગઈ છે. આ આંકડો દર્શાવે છે કે સારસ સંરક્ષણ માટે ખેડા જિલ્લો હવે એક ‘રોલ મોડેલ’ બની રહ્યો છે.
Pariyaj Wetland : 120થી વધુ પક્ષી પ્રજાતિઓનું ઘર
માત્ર સારસ જ નહીં, પરંતુ પરિયેજ વેટલેન્ડ 120થી વધુ વિવિધ પક્ષી પ્રજાતિઓનું નિવાસસ્થાન છે. અહીંની જૈવ-વિવિધતા અને કુદરતી સૌંદર્યને કારણે હવે આ સ્થળ ‘બર્ડ વોચિંગ’ (Bird Watching) માટે પ્રવાસીઓની પ્રથમ પસંદગી બની રહ્યું છે. સોશિયલ મીડિયાના કારણે આ સ્થળની સુંદરતા દેશભરમાં ફેલાઈ રહી છે, જેનાથી પ્રકૃતિપ્રેમીઓ પક્ષી દર્શન માટે મોટી સંખ્યામાં અહીં ઉમટી રહ્યા છે.
સંરક્ષણ સાથે રોજગારીનો સંગમ
પરિયેજની આ સફળતા પાછળ વૈજ્ઞાનિક અભિગમ અને સ્થાનિક યુવાનોનો પણ મોટો ફાળો રહ્યો છે, જ્યાં શ્રૉફ્સ યુપીએલ ફાઉન્ડેશન જેવા સંગઠનો દ્વારા સારસના કુદરતી નિવાસસ્થાનની રક્ષા કરવાની પ્રશંસનીય કામગીરી કરવામાં આવી રહી છે. આ પ્રયાસોના ભાગરૂપે 40થી વધુ સ્થાનિક યુવાનોને ‘નેચર ગાઈડ’ તરીકે વિશેષ તાલીમ આપવામાં આવી છે, જે પર્યાવરણના રક્ષણ સાથે પ્રવાસનને પણ વેગ આપે છે. રાજ્ય સરકાર દ્વારા આ ક્ષેત્રને ઇકો-ટૂરિઝમ તરીકે વિકસાવવાના નિર્ણયથી સ્થાનિક અર્થતંત્રને મોટો વેગ મળ્યો છે અને સ્થાનિક લોકોને રોજગારીની અનેક નવી તકો પ્રાપ્ત થઈ રહી છે.
આ પણ વાંચો: વાઇબ્રન્ટ ગુજરાત રીજનલ સમિટ (VGRC), મહેસાણા ખાતે ગુજરાત પ્રવાસનનું ભવ્ય પેવિલિયન સાકાર…
આ પણ વાંચો:VGRC – મહેસાણા ખાતે શિક્ષણ અને ઉદ્યોગ વચ્ચે સુમેળ સાધવા માટે બે પેનલ ડિસ્કશનનું આયોજન…
