વડાપ્રધાન નરેન્દ્ર મોદી અને વિદેશ મંત્રી એસ. જયશંકર વચ્ચે ઉચ્ચ સ્તરીય બેઠક યોજાઈ. આ બેઠકમાં પાડોશી દેશો પાકિસ્તાન અને શ્રીલંકામાં ઉથલપાથલની સ્થિતિ પર ચર્ચા કરાઈ. એક તરફ જ્યાં પાકિસ્તાનની સંસદ ભંગ કરવાની જાહેરાત કરવામાં આવી હતી અને તે પછી હવે બધા સુપ્રીમ કોર્ટના નિર્ણયની રાહ જોઈ રહ્યા છે, તો બીજી તરફ શ્રીલંકામાં પીએમ સિવાયના સમગ્ર કેબિનેટે રાજીનામું આપી દીધું છે.
આ પણ વાંચો: / નવાબ મલિકની જ્યુડિશિયલ કસ્ટડી 18 એપ્રિલ સુધી લંબાવાઈ, ઘરના ભોજન અને દવાઓની પરવાનગી
રાષ્ટ્રપતિ આરિફ અલ્વીએ જાહેરનામું બહાર પાડ્યું
પાકિસ્તાનના રાષ્ટ્રપતિ આરિફ અલ્વીએ સોમવારે એક નોટિફિકેશન જારી કરીને કહ્યું છે કે, ઇમરાન ખાન જ્યાં સુધી કાર્યપાલક વડા પ્રધાનની નિમણૂક નહીં કરે ત્યાં સુધી દેશના વડા પ્રધાન તરીકે યથાવત્ રહેશે. નોટિફિકેશનમાં કહેવામાં આવ્યું છે કે કાર્યવાહક વડાપ્રધાનની નિમણૂક ન થાય ત્યાં સુધી આઉટગોઇંગ વડાપ્રધાન પદ પર ચાલુ રહેશે.
અગાઉ, કેબિનેટ સચિવાલયે એક જાહેરનામું બહાર પાડ્યું હતું કે ખાન “તાત્કાલિક અસરથી પાકિસ્તાનના વડા પ્રધાન તરીકે રાજીનામું આપે છે.” રાષ્ટ્રપતિ અલ્વીએ વડા પ્રધાન ખાનની સલાહ પર નેશનલ એસેમ્બલી (એનએ) ભંગ કરી દીધી છે.
શ્રીલંકાના રાષ્ટ્રપતિએ વિપક્ષી એકતાની અપીલ કરી
શ્રીલંકાના રાષ્ટ્રપતિ ગોટાબાયા રાજપક્ષેએ સોમવારે દેશના તમામ વિરોધ પક્ષોને એકતા કેબિનેટમાં સામેલ થવાની અપીલ કરી હતી. રાષ્ટ્રપતિના આમંત્રણને સરકાર દ્વારા ગંભીર આર્થિક સંકટનો સામનો કરી રહેલા શ્રીલંકાના લોકોના ગુસ્સાને શાંત કરવાના પ્રયાસ તરીકે જોવામાં આવી રહ્યું છે. એક સત્તાવાર નિવેદન અનુસાર, “રાષ્ટ્રપતિ ગોટાબાયા રાજપક્ષેએ દેશ સામે ચાલી રહેલી રાષ્ટ્રીય કટોકટીનો ઉકેલ શોધવા માટે તમામ પક્ષોને આમંત્રણ આપ્યું છે.” રવિવારે દેશના તમામ 26 મંત્રીઓએ તેમના પદ પરથી રાજીનામું આપી દીધું છે. શિક્ષણ પ્રધાન અને ગૃહના નેતા દિનેશ ગુણવર્દનેએ પત્રકારોને જણાવ્યું હતું કે કેબિનેટ પ્રધાનોએ વડા પ્રધાન મહિન્દા રાજપક્ષેને તેમના રાજીનામા સુપરત કર્યા છે. જોકે, તેમણે સામૂહિક રાજીનામું આપવાનું કોઈ કારણ આપ્યું ન હતું.
આ પણ વાંચો:/ જમ્મુ અને કાશ્મીરના પૂંચમાં આતંકવાદી ઠેકાણાનો પર્દાફાશ, બે AK-47 એસોલ્ટ રાઈફલ મળી
