New Delhi: પોલીસ આમ આદમી પાર્ટીના સાંસદ અને દિલ્હી મહિલા આયોગના અધ્યક્ષ સ્વાતિ માલીવાલની દિલ્હીના મુખ્યમંત્રીના નિવાસસ્થાને હુમલા અને દુર્વ્યવ્હારના કેસમાં અરવિંદ કેજરીવાલના માતા-પિતાની આજે પૂછપરછ કરશે. પોલીસનું અનુમાન છે કે ત્રણેયની પૂછપરછ દરમિયાન ઘણું સત્ય બહાર આવી શકે છે.
પોલીસ આરોપી સીએમના અંગત મદદનીશ બિભવ કુમાર સાથે મુંબઈથી પરત ફરી છે અને તેને ગુરુવારે(આજે) કોર્ટમાં રજૂ કરીને ફરીથી રિમાન્ડ માંગી શકે છે. સૂત્રો મુજબ, વિભવ કુમાર પોતાના નિવેદન પર અડગ છે અને સ્વાતિ માલીવાલ પર હુમલાની ઘટનાને નકારી રહ્યો છે.
એક પોલીસ અધિકારીનું કહેવું છે કે સ્વાતિ માલીવાલે પોતાના નિવેદનમાં જણાવ્યું છે કે જ્યારે તે 13 મેના રોજ સવારે સીએમ આવાસ પર ગઈ હતી ત્યારે તે કેજરીવાલની પત્ની સુનીતા અને તેના માતા-પિતાને પણ મળી હતી, ત્યારબાદ તે ડ્રોઈંગ રૂમમાં ગઈ હતી. તે સમયે સીએમના માતા-પિતા નાસ્તો કરી રહ્યા હતા.
બે દિવસથી એક મહિલા પોલીસ તપાસ અધિકારી કેજરીવાલના પરિવારજનોનો સંપર્ક કરવાનો પ્રયાસ કરી રહી છે જેથી તેમનું નિવેદન નોંધી શકાય. મહિલા તપાસ અધિકારીએ કેજરીવાલ પાસે નિવેદન નોંધવા માટે સમય માંગ્યો હતો, પરંતુ તેમણે જવાબ આપ્યો ન હતો.
અરવિંદ કેજરીવાલે X પર પોસ્ટ કરીને લખ્યું છે કે પોલીસ તેમના વૃદ્ધ માતા-પિતાની આજે પૂછપરછ કરવા માંગે છે. બીજી તરફ સીએમના અંગત મદદનીશ બિભવ કુમાર સાથે પુરાવા ભેગા કરવા મુંબઈ ગયેલી પોલીસ બુધવારે પરત ફરી હતી. તેને ફાઈવ સ્ટાર હોટલ અને અન્ય બે જગ્યાએ લઈ જવામાં આવ્યો હતો. પોલીસે બિભવ કુમારના ફોનનું લોકેશન મુંબઈમાં આ ત્રણ જગ્યાએ ટ્રેસ કર્યું હતું. તેનો આઈફોન મુંબઈમાં જ ફોર્મેટ કરવામાં આવ્યો હતો. એવી શક્યતા છે કે ફોનને ફોર્મેટ કરતા પહેલા વિભવ કુમારે ફોનનો ડેટા અન્ય કોઈ ડિવાઈસમાં સુરક્ષિત રાખ્યો હોય અથવા કોઈને આપ્યો હોય. ફોનનો ડેટા શોધવા અને અન્ય પુરાવા એકત્ર કરવા પોલીસ મંગળવારે વિભવ સાથે મુંબઈ ગઈ હતી.
સૂત્રોના જણાવ્યા અનુસાર, બિભવે પૂછપરછ દરમિયાન જણાવ્યું કે ફોન હેંગ થવાના કારણે તેણે આઇફોનનું ફોર્મેટ કર્યું હતું, પરંતુ ફોનનો ડેટા કોપી ન કરી શક્યો. પોલીસ બિભવનું આ નિવેદન સ્વીકારવા તૈયાર નથી. પોલીસે મુંબઈમાં ત્રણ જગ્યાએથી CCTV ફૂટેજ મેળવ્યા છે જ્યાં બિભવના ફોનનું લોકેશન ટ્રેસ થયું હતું. પોલીસ આ ફૂટેજની બારીકાઈથી તપાસ કરશે. એવી પણ એક થિયરી છે કે કેસ નોંધાયા બાદ બિભવ કુમારે પોતાનો ફોન કોઈ અન્ય વ્યક્તિ મારફતે મુંબઈ મોકલ્યો હતો.
કેજરીવાલે મૌન તોડતાં કહ્યું, હું ઘરે હતો, ઘટના સ્થળે નહીં
અરવિંદ કેજરીવાલે આખરે નવ દિવસ બાદ મૌન તોડ્યું છે. તેણે કહ્યું કે, ઘટના સમયે તે ઘરે હતો, પરંતુ સ્થળ પર નહોતો. તેમણે કહ્યું, ‘આ મામલો હજુ કોર્ટમાં પેન્ડિંગ છે અને મારા નિવેદનથી કાર્યવાહીને પ્રભાવિત થઈ શકે છે, પરંતુ મને આશા છે કે યોગ્ય તપાસ થશે. ન્યાય મળવો જોઈએ. ઘટનાને લઈને બે પક્ષો છે. પોલીસે બંને પક્ષોની યોગ્ય તપાસ કરવી જોઈએ.
કોંગ્રેસના વરિષ્ઠ નેતા શશિ થરૂરે સીએમ આવાસ પર સ્વાતિ માલીવાલ પર હુમલાના મુદ્દે આમ આદમી પાર્ટીનો બચાવ કર્યો છે. તેમણે કહ્યું કે, ‘દેશમાં ચાલી રહેલા બેરોજગારી અને મોંઘવારી જેવા મહત્વના મુદ્દાઓ પરથી ધ્યાન હટાવવા માટે જ આ મામલો ચગાવવામાં આવી રહ્યો છે. આપણે સામાન્ય લોકો માટે શું મહત્વનું છે તેના પર ધ્યાન કેન્દ્રિત કરવું પડશે અને આ નકામા મુદ્દાઓને મહત્વ આપવું જોઈએ નહીં. વાસ્તવિક મુદ્દાઓ પરથી ધ્યાન ભટકાવવાથી કોઈનું હિત થતું નથી.’
આ પણ વાંચો: RBIએ સરકારને રેકોર્ડ રૂ. 2.10 લાખ કરોડ આપ્યા
આ પણ વાંચો: પંજાબમાં પીએમ મોદીની આજે જનસભા, ખેડૂતો આંદોલન યથાવત્ રાખશે
