કોંગ્રેસ નેતા રાહુલ ગાંધીની લોકસભા સદસ્યતા પુનઃસ્થાપિત કરવામાં આવી છે, ત્યારબાદ તેમને જૂનો બંગલો 12 તુગલક લેન પણ ફાળવવામાં આવ્યો છે. હવે રાહુલ ગાંધીએ પોતાનો જૂનો બંગલો લેવાની ના પાડી દીધી છે. કોંગ્રેસના સૂત્રોના જણાવ્યા અનુસાર રાહુલ ગાંધીએ આ માટે લોકસભા હાઉસિંગ સોસાયટીને પત્ર લખ્યો છે.રાહુલ ગાંધીની સદસ્યતા પુનઃસ્થાપિત થયા બાદ 8 ઓગસ્ટે લોકસભાની હાઉસિંગ સોસાયટીએ તેમને 12 તુગલક લેનમાં બંગલો ફાળવ્યો છે. જો કે, જ્યારે તેમને બંગલા વિશે પ્રશ્ન પૂછવામાં આવ્યો ત્યારે તેમણે કહ્યું હતું કે આખું ભારત મારું ઘર છે.
24 માર્ચે સુરત કોર્ટે રાહુલ ગાંધીને માનહાનિના કેસમાં દોષિત ઠેરવ્યા હતા અને તેમને 2 વર્ષની સજા ફટકારી હતી. આ નિર્ણય બાદ લોકસભા સચિવાલયે રાહુલ ગાંધીની સંસદની સદસ્યતા રદ કરી દીધી હતી. આ પછી તેમનો બંગલો પણ પાછો લઈ લેવામાં આવ્યો હતો.રાહુલ ગાંધીએ 13 એપ્રિલ 2019ના રોજ કર્ણાટકના કોલારમાં એક ચૂંટણી રેલીમાં કહ્યું હતું કે, ‘નીરવ મોદી, લલિત મોદી, નરેન્દ્ર મોદીની અટક કેમ સામાન્ય છે? બધા ચોરની અટક મોદી કેમ છે? રાહુલના આ નિવેદનને લઈને ભાજપના ધારાસભ્ય અને પૂર્વ મંત્રી પૂર્ણેશ મોદીએ તેમની વિરુદ્ધ કલમ 499, 500 હેઠળ ફોજદારી માનહાનિનો કેસ દાખલ કર્યો હતો. આ પછી રાહુલનું સભ્યપદ છીનવાઈ ગયું.સાંસદ બન્યા બાદ રાહુલ ગાંધીએ સજા પર સ્ટે આપવા માટે હાઈકોર્ટનો સંપર્ક કર્યો હતો, પરંતુ તેમને કોઈ રાહત મળી ન હતી. ત્યારબાદ તેઓ સુપ્રીમ કોર્ટ પહોંચ્યા, જ્યાં સજા પર રોક લગાવવામાં આવી. આ પછી રાહુલ ગાંધીની સદસ્યતા પુનઃસ્થાપિત કરવામાં આવી અને તેઓ ફરીથી વાયનાડના સાંસદ બન્યા
