મહારાષ્ટ્ર નવનિર્માણ સેના (MNS)ના પ્રમુખ રાજ ઠાકરેએ રવિવારે કહ્યું કે તેઓ ભગવાન રામના દર્શન કરવા માટે 5 જૂને અયોધ્યા જશે. આ સાથે તેમણે ‘હિંદુ ભાઈઓને’ તૈયાર રહેવાની અપીલ કરી છે જો 3 મે સુધીમાં મસ્જિદોમાંથી લાઉડસ્પીકર હટાવવામાં નહીં આવે તો તેઓ જડબાતોડ જવાબ આપશે.
ઠાકરેએ કહ્યું કે અઝાન માટે લાઉડસ્પીકરનો ઉપયોગ ધાર્મિક કરતાં સામાજિક મુદ્દો છે. MNS વડાએ કહ્યું કે તેઓ ઇચ્છતા નથી કે સમાજની શાંતિ ડહોળાય પરંતુ “જો લાઉડસ્પીકરનો ઉપયોગ ચાલુ રહેશે, તો તેઓએ (મુસ્લિમો) પણ લાઉડસ્પીકર પર અમારી પ્રાર્થના સાંભળવી પડશે.”
પુણેમાં મીડિયા સાથે વાત કરતાં તેમણે કહ્યું, ‘1 મેના રોજ હું સંભાજીનગર (ઔરંગાબાદ)માં એક જાહેર સભાને સંબોધિત કરીશ. 5 જૂને હું અન્ય MNS કાર્યકર્તાઓ સાથે અયોધ્યા દર્શન માટે જઈશ. હું અન્ય લોકોને પણ અયોધ્યા આવવાની અપીલ કરું છું. અયોધ્યા જવાના હેતુ વિશે પૂછવામાં આવતા ઠાકરેએ કહ્યું કે તેઓ લાંબા સમયથી બહાર ગયા નથી. રસપ્રદ વાત એ છે કે રાજ્યની સત્તાધારી શિવસેના અને રાજ ઠાકરે વચ્ચેની ખેંચતાણ વચ્ચે શિવસેનાના સાંસદ સંજય રાઉતે શનિવારે કહ્યું હતું કે રાજ્યના મંત્રી આદિત્ય ઠાકરે આવતા મહિને અયોધ્યાની મુલાકાત લેશે.
MNS વડાએ કહ્યું, “લોકો માને છે કે મસ્જિદ પર લાઉડસ્પીકર એક ધાર્મિક મુદ્દો છે, પરંતુ તે એક સામાજિક મુદ્દો છે. જો તમારે દિવસમાં પાંચ વખત લાઉડસ્પીકરનો ઉપયોગ કરવો હોય તો અમે મસ્જિદની બહાર પાંચ વખત હનુમાન ચાલીસા વગાડીશું. હું તમામ હિન્દુ ભાઈઓને તૈયાર રહેવાની અપીલ કરું છું.
“અમે 3 મે સુધી રાહ જોઈશું, જ્યારે રમઝાન સમાપ્ત થશે, પરંતુ જો તેઓ તેને રોકશે નહીં, અને જો તેઓ વિચારે છે કે તેમનો ધર્મ ન્યાયતંત્ર કરતા મોટો છે, તો અમે જે પણ થશે તે કરીશું,” તેમણે કહ્યું. મનસે આ માટે તૈયારી કરી રહી છે. ઠાકરેએ કહ્યું કે MNS ક્યારેય પણ દેશમાં સાંપ્રદાયિક રમખાણો કે શાંતિ ડહોળવા માંગતી નથી. મુસ્લિમ સમુદાયે મસ્જિદોમાંથી લાઉડસ્પીકર હટાવવાની માંગને માનવીય દૃષ્ટિકોણથી જોવી જોઈએ.
