શ્રીલંકાના નવા PM: શ્રીલંકામાં ચાલી રહેલી આર્થિક કટોકટી અને રાજકીય સંકટ વચ્ચે પીઢ રાજકારણી નેતા રાનિલ વિક્રમસિંઘે દેશના નવા વડાપ્રધાન બન્યા છે. રાષ્ટ્રપતિના મીડિયા કાર્યાલયે જણાવ્યું કે 73 વર્ષીય રાનિલ વિક્રમસિંઘેએ પીએમ તરીકે શપથ લીધા છે. બુધવારે રાષ્ટ્રને સંબોધનમાં રાષ્ટ્રપતિ ગોટાબાયા રાજપક્ષેએ જાહેરાત કરી કે આ અઠવાડિયે નવા વડા પ્રધાન અને તેમના મંત્રીમંડળની રચના કરવામાં આવશે.
આ પહેલા સોમવારે વડાપ્રધાન મહિન્દા રાજપક્ષેએ દેશમાં ચાલી રહેલી આર્થિક કટોકટી પર વિરોધ પ્રદર્શન દરમિયાન ચૂંટાયેલી સરકારને હટાવીને તેમના પદ પરથી રાજીનામું આપી દીધું હતું. આ દિવસે રાજધાની કોલંબોમાં ભારે હોબાળો થયો હતો. ઘણા વિરોધીઓએ હિંસા અને આગચંપીનો આશરો લીધો હતો.
રાનિલ વિક્રમસિંઘે 2018-2019માં શ્રીલંકાના વડાપ્રધાન પદ પર પણ રહી ચૂક્યા છે. 2019 માં રાનિલે પોતાની પાર્ટીના દબાણને કારણે પીએમ પદ પરથી રાજીનામું આપ્યું હતું. નવા પીએમની નિમણૂક કરતા પહેલા રાષ્ટ્રપતિ ગોટાબાયા રાજપક્ષેએ સ્પષ્ટપણે કહ્યું હતું કે તેઓ યુવા કેબિનેટની નિમણૂક કરશે, જેમાં રાજપક્ષે પરિવારનો એક પણ સભ્ય નહીં હોય. જો કે, અલગ પક્ષમાં હોવા છતાં રાનિલ વિક્રમસિંઘે શ્રીલંકાના રાષ્ટ્રપતિ ગોટાબાયા રાજપક્ષે અને મહિન્દા રાજપક્ષેની નજીક હોવાનું કહેવાય છે. કદાચ આ કારણે જ ગોટાબાયા રાજપક્ષેએ તેમને નવા પીએમ બનાવ્યા.
રાનિલ વિક્રમસિંઘે 1994થી યુનાઈટેડ નેશનલ પાર્ટીના વડા છે. તેઓ અત્યાર સુધીમાં 4 વખત શ્રીલંકાના વડાપ્રધાન રહી ચૂક્યા છે. મહિન્દા 2020માં પીએમ બન્યા તે પહેલા પણ રાનિલ શ્રીલંકાના પીએમ હતા. 73 વર્ષીય રાનિલે કાયદાનો અભ્યાસ કર્યો છે. તમને જણાવી દઈએ કે શ્રીલંકામાં આર્થિક સંકટના કારણે લોકો રસ્તા પર આવી ગયા છે. વધતી જતી મોંઘવારી, જીવનજરૂરી ચીજવસ્તુઓ અને દવાઓની અછતને કારણે સ્થિતિ અત્યંત ખરાબ થઈ ગઈ છે. આ વર્તમાન સંકટ માટે રાજપક્ષ સરકારને જવાબદાર ગણવામાં આવી રહી છે અને તેના કારણે જનતા સરકારની વિરુદ્ધ થઈ ગઈ છે.
આ પણ વાંચો: congresss/ દિલ્હીમાં મારો કોઈ ‘ગોડ ફાધર’ નથી, કોંગ્રેસ મારી ભૂમિકા સ્પષ્ટ કરેઃ હાર્દિક પટેલ
