Delhi News: દિલ્હી (Delhi)ના ઇન્દિરા ગાંધી ઇન્ટરનેશનલ (IGI) એરપોર્ટ પર કસ્ટમ વિભાગે દાણચોરી(Smuggling)સામે મોટી કાર્યવાહી કરી છે. કસ્ટમ અધિકારીઓએ એક ભારતીય મુસાફરને ઝડપી પાડી તેની પાસેથી 40,000 અમેરિકન ડોલર (USD) અને 63,200 સાઉદી રિયાલ (SAR) સહિત કુલ 50.67 લાખ રૂપિયાથી વધુની કિંમતનું વિદેશી ચલણ જપ્ત કર્યું છે. આ કાર્યવાહી કસ્ટમ વિભાગ દ્વારા ચોક્કસ ગુપ્ત માહિતીના આધારે હાથ ધરવામાં આવી હતી, જેમાં મુસાફર વિદેશી ચલણની ગેરકાયદેસર દાણચોરી(Smuggling) કરવાનો પ્રયાસ કરી રહ્યો હતો.
ટ્રોલીબેગ અને ટ્રાઉઝરમાં છુપાવ્યું હતું ચલણ
કસ્ટમ વિભાગના સૂત્રો અનુસાર, આરોપી મુસાફરે વિદેશી નાણાંને ખૂબ ચતુરાઈથી ટ્રોલીબેગ તેમજ પોતાની ટ્રાઉઝરના અંદર છુપાવી રાખ્યા હતા, જેથી સુરક્ષા તપાસ દરમિયાન કોઈને શંકા ન જાય. જોકે, કસ્ટમ અધિકારીઓની સતર્કતા અને અનુભવે તેની યોજના નિષ્ફળ બનાવી દીધી. તપાસ દરમિયાન, જ્યારે મુસાફરની સંપૂર્ણ રીતે ચેકિંગ કરવામાં આવી, ત્યારે મોટા પ્રમાણમાં વિદેશી ચલણ મળી આવ્યું, જે કાયદા મુજબ જાહેર કરેલું નહોતું.
દિલ્હીથી મુંબઈ થઈ UAE જવાનું હતું આયોજન
પ્રાથમિક તપાસમાં સામે આવ્યું છે કે આરોપી દિલ્હીથી મુંબઈ થઈને UAE જવાની ફિરાકમાં હતો. આશંકા છે કે આ વિદેશી ચલણ UAEમાં ગેરકાયદેસર રીતે પહોંચાડવાનું હતું. કસ્ટમ વિભાગ હવે આ દાણચોરી (Smuggling) પાછળ કોઈ સંગઠિત ગેંગ કાર્યરત છે કે નહીં, તે દિશામાં પણ તપાસ કરી રહ્યો છે.
કસ્ટમ વિભાગે પૂછપરછ શરૂ કરી
આરોપીને અટકાયત કરીને કસ્ટમ વિભાગે વિસ્તૃત પૂછપરછ શરૂ કરી છે. અધિકારીઓ એ જાણવા પ્રયત્ન કરી રહ્યા છે કે આ વિદેશી ચલણ ક્યાંથી લાવવામાં આવ્યું, કોના કહેવા પર લઈ જવાતું હતું અને અગાઉ પણ આવા પ્રયાસો થયા છે કે નહીં.
કસ્ટમ અધિકારીઓના જણાવ્યા મુજબ, ફોરેન એક્સચેન્જ મેનેજમેન્ટ એક્ટ (FEMA) અને સંબંધિત કસ્ટમ કાયદાઓ હેઠળ આરોપી સામે કડક કાર્યવાહી કરવામાં આવશે.
દાણચોરી (Smuggling) સામે કડક વલણ
કસ્ટમ વિભાગે સ્પષ્ટ સંદેશ આપ્યો છે કે વિદેશી ચલણની દાણચોરી (Smuggling) સામે ઝીરો ટોલરન્સ નીતિ અપનાવવામાં આવી છે. એરપોર્ટ પર સુરક્ષા અને તપાસને વધુ કડક બનાવવામાં આવી રહી છે, ખાસ કરીને આંતરરાષ્ટ્રીય ફ્લાઇટ્સ માટે.
છેલ્લા કેટલાક મહિનાઓમાં IGI એરપોર્ટ પર આવી અનેક કાર્યવાહી થઈ છે, જેમાં સોનું, વિદેશી ચલણ અને પ્રતિબંધિત વસ્તુઓની દાણચોરી(Smuggling) ઝડપાઈ છે.
