પોપ્યુલર ફ્રન્ટ ઓફ ઈન્ડિયા (PFI)ના સંબંધો આતંકવાદી સંગઠન અલ-કાયદા સાથે છે. નેશનલ ઇન્વેસ્ટિગેશન એજન્સી (NIA)એ કેરળની એક કોર્ટમાં રજૂ કરેલા રિપોર્ટમાં આ દાવો કર્યો છે. રિપોર્ટમાં કહેવામાં આવ્યું છે કે PFIના ઘણા નેતાઓ આતંકવાદી સંગઠન સાથે વિવિધ માધ્યમોથી જોડાયેલા છે. ન્યૂઝ એજન્સી IANS અનુસાર, NIAએ વધુમાં દાવો કર્યો કે પ્રતિબંધિત જૂથ એક ગુપ્ત વિંગ ચલાવી રહ્યું હતું, જેને તેઓ ચોક્કસ સમયે ઉજાગર કરવા માગે છે. એક સૂત્રએ જણાવ્યું હતું કે, ભૂતકાળમાં કરાયેલા દરોડા દરમિયાન NIAએ કેટલાક સાધનો જપ્ત કર્યા હતા. આ ઉપકરણોના સ્કેનિંગ દરમિયાન, એજન્સીને જાણવા મળ્યું કે PFI નેતાઓ અલ-કાયદાના સંપર્કમાં હતા. તેની એક ગુપ્ત વિંગ પણ હતી.
તાજેતરના રાષ્ટ્રવ્યાપી દરોડા દરમિયાન NIA દ્વારા PFIના સમગ્ર નેટવર્કનો પર્દાફાશ કરવામાં આવ્યો હતો. ત્યારબાદ પીએફઆઈ પર પ્રતિબંધ મૂકવામાં આવ્યો અને તેના તમામ નેતાઓની ધરપકડ કરવામાં આવી. 22 નવેમ્બર 2006ના રોજ ત્રણ મુસ્લિમ સંગઠનોના વિલીનીકરણ દ્વારા પોપ્યુલર ફ્રન્ટ ઓફ ઈન્ડિયાની રચના કરવામાં આવી હતી. સંગઠનના સભ્યો વિરુદ્ધ હત્યાના અનેક કેસ પણ નોંધાયેલા છે.
