New Delhi News : સામાજિક કાર્યકર્તા સોનમ વાંગચુક (Sonam Wangchuk)ની લાંબા સમયથી ચાલી રહેલી ભૂખ હડતાળ Hunger Strike)હવે સમાપ્ત થવાની શક્યતા વ્યક્ત કરવામાં આવી છે. તેમની પત્ની ગીતાંજલિ એંગ્મોએ જણાવ્યું છે કે જો વિવિધ રાજકીય પક્ષોના નેતાઓ તેમની મુલાકાત લઈ સંસદના ચોમાસુ સત્રમાં શિક્ષણમાં જવાબદારી અને NEET પેપર લીકનો મુદ્દો ઉઠાવવાની ખાતરી આપે, તો વાંગચુક 20 જુલાઈએ પોતાનો ઉપવાસ સમાપ્ત કરી શકે છે.
દિલ્હી હાઈકોર્ટમાં કરી હતી અરજી
વાંગચુકની તબિયતને ધ્યાનમાં રાખીને તેમની પત્નીએ તેમને સફદરજંગ હોસ્પિટલમાંથી ખાનગી હોસ્પિટલમાં ખસેડવાની માંગ સાથે દિલ્હી હાઈકોર્ટમાં અરજી કરી હતી. જોકે કોર્ટે આ અરજી ફગાવી દીધી હતી અને હાલ તેઓ સરકારી હોસ્પિટલમાં જ સારવાર હેઠળ છે.
હોસ્પિટલનું હેલ્થ બુલેટિન જાહેર
સફદરજંગ હોસ્પિટલ દ્વારા જાહેર કરાયેલા આરોગ્ય બુલેટિનમાં જણાવાયું છે કે સોનમ વાંગચુકની સ્થિતિ હાલ સ્થિર છે. તેમના મહત્વના આરોગ્ય પરિમાણો નિયંત્રણમાં છે, પરંતુ લાંબા ઉપવાસના કારણે શરીર પર પડતી અસરને ધ્યાનમાં રાખીને નિષ્ણાત ડોક્ટરોની ટીમ સતત દેખરેખ રાખી રહી છે.
ડોક્ટરોના જણાવ્યા અનુસાર તેમને 24 કલાક ક્લિનિકલ મોનિટરિંગ અને સતત તબીબી સારવારની જરૂર છે જેથી કોઈપણ સંભવિત જટિલતા સામે તરત કાર્યવાહી કરી શકાય.
જંતર-મંતર પરથી હટાવાયા હતા
ભૂખ હડતાળ દરમિયાન દિલ્હી પોલીસે સોનમ વાંગચુક (Sonam Wangchuk)ને જંતર-મંતર પરથી હટાવી હોસ્પિટલમાં દાખલ કર્યા હતા. ત્યારબાદ કોકરોચ જનતા પાર્ટી (CJP)ના પ્રમુખ અભિજીત દિપકેએ જાહેરાત કરી હતી કે તેઓ વાંગચુકના સ્થાને ઉપવાસ ચાલુ રાખશે.
NEET પેપર લીક મુદ્દે શરૂ કર્યો હતો ઉપવાસ
સોનમ વાંગચુક (Sonam Wangchuk) NEET પેપર લીકના વિરોધમાં ચાલી રહેલા CJPના આંદોલનમાં જોડાયા હતા. આ વિરોધ 6 જૂનથી દિલ્હીના જંતર-મંતર (Jantar Mantar) ખાતે ચાલી રહ્યો છે. આંદોલનકારીઓ કેન્દ્રીય શિક્ષણ પ્રધાન ધર્મેન્દ્ર પ્રધાનના રાજીનામાની માંગ કરી રહ્યા છે. વાંગચુકે 28 જૂને આંદોલનને સમર્થન આપતાં ઔપચારિક રીતે ભૂખ હડતાળ (Hunger Strike)શરૂ કરી હતી.
જો રાજકીય નેતાઓ તરફથી માંગણીઓ અંગે સકારાત્મક આશ્વાસન મળે, તો 20 જુલાઈએ તેમની ભૂખ હડતાળ સમાપ્ત થવાની શક્યતા છે.
