Anand News : જિલ્લાના આંકલાવ તાલુકાના કહાનવાડી ગામ સ્થિત ઉત્તર બુનિયાદી હાઇસ્કૂલ હોસ્ટેલમાં એક દુઃખદ ઘટના સામે આવી છે. હોસ્ટેલમાં રહેતા ધોરણ 12ના એક વિદ્યાર્થીએ આપઘાત (Suicide) કર્યો હોવાનું જાણવા મળ્યું છે.
મળતી માહિતી મુજબ, મૃતક વિદ્યાર્થી મૂળ છોટાઉદેપુર જિલ્લાના કવાંટ ગામનો રહેવાસી હતો અને અભ્યાસ માટે હોસ્ટેલમાં રહેતો હતો. ઘટનાની જાણ થતાં જ હોસ્ટેલ સંચાલકો અને સ્થાનિક લોકોમાં ચકચાર મચી ગઈ હતી.
ઘટનાની માહિતી મળતા જ આંકલાવ પોલીસ તેમજ FSL (ફોરેન્સિક સાયન્સ લેબોરેટરી)ની ટીમ તાત્કાલિક ઘટનાસ્થળે પહોંચી હતી અને સ્થળનું નિરીક્ષણ કરી પુરાવા એકત્રિત કરવાની કાર્યવાહી હાથ ધરી હતી.
હાલમાં વિદ્યાર્થીએ આપઘાત (Suicide)નું આ પગલું શા માટે ભર્યું તે અંગે કોઈ સ્પષ્ટ કારણ સામે આવ્યું નથી. પોલીસે મૃતદેહને પોસ્ટમોર્ટમ માટે મોકલી આપ્યો છે અને પરિવારજનોના નિવેદન સહિત વિવિધ દિશામાં તપાસ શરૂ કરી છે.
આ ઘટનાને પગલે હોસ્ટેલમાં વિદ્યાર્થીઓની સુરક્ષા, દેખરેખ અને માનસિક આરોગ્ય સંબંધિત વ્યવસ્થાઓ અંગે પણ અનેક સવાલો ઊભા થયા છે. પોલીસ તપાસ પૂર્ણ થયા બાદ જ સમગ્ર ઘટનાક્રમ અંગે વધુ વિગતો બહાર આવી શકે છે.
