Surat News: સુરતના કતારગામ વિસ્તારમાંથી હત્યાની આશંકા જન્માવતી ચોંકાવનારી ઘટના (Surat Murder Case) સામે આવી છે. ગોટાલાવાડી ચાર રસ્તા પાસે આવેલા ખ્રિસ્તી કબ્રસ્તાનમાંથી અજાણ્યા પુરુષનું માથા વગરનું નગ્ન ધડ મળી આવ્યું હતું. ત્યારબાદ પોલીસની તપાસ દરમિયાન મૃતકનું માથું કબ્રસ્તાનથી આશરે 3 કિલોમીટર દૂર અલકાપુરી રેલવે ટ્રેક પરથી મળી આવ્યું છે. પ્રાથમિક તપાસમાં મૃતકની ઓળખ છુપાવવાના ઇરાદે તેની હત્યા કરી માથું અલગ કરવામાં આવ્યું હોવાની આશંકા વ્યક્ત કરવામાં આવી રહી છે.
Surat Murder Case: કબ્રસ્તાનમાં માથા વગરનું ધડ મળતાં પોલીસ દોડી
મળતી માહિતી મુજબ, 3 નવેમ્બરની રાત્રે કતારગામ (Katargam Murder Case) પોલીસને કંટ્રોલ મેસેજ મળ્યો હતો કે ગોટાલાવાડી ચાર રસ્તા પાસે આવેલા ખ્રિસ્તી કબ્રસ્તાનમાં (Gotalawadi Cemetery) એક વ્યક્તિનો મૃતદેહ પડ્યો છે. માહિતી મળતાં જ પોલીસનો કાફલો ઘટનાસ્થળે પહોંચ્યો હતો. તપાસ દરમિયાન મૃતદેહનું માથું ગાયબ હોવાનું અને શરીર પર કપડાં ન હોવાનું સામે આવ્યું હતું.
3 કિલોમીટર દૂર રેલવે ટ્રેક પરથી માથું મળ્યું
પોલીસે તપાસ આગળ વધારતાં મૃતકનું માથું અલકાપુરી રેલવે ટ્રેક (Alkapuri Railway Track) પરથી મળી આવ્યું હતું. કબ્રસ્તાનમાં મળેલા ધડ અને રેલવે ટ્રેક પરથી મળેલા માથા વચ્ચે આશરે 3 કિલોમીટરનું અંતર હોવાનું સામે આવ્યું છે. પ્રાથમિક અનુમાન મુજબ મૃતકની ઉંમર 30થી 35 વર્ષની આસપાસ હોઈ શકે છે.
હત્યા પાછળ ઓળખ છુપાવવાનો ઇરાદો હોવાની આશંકા
પ્રાથમિક દૃષ્ટિએ આ મામલે હત્યાની આશંકા વ્યક્ત કરવામાં આવી રહી છે. અજાણ્યા શખ્સોએ પુરાવાનો નાશ કરવા અથવા મૃતકની ઓળખ છુપાવવા માટે માથું અલગ કર્યું હોવાની શક્યતા તપાસવામાં આવી રહી છે. ઘટનાની ગંભીરતાને ધ્યાનમાં રાખીને ઉચ્ચ પોલીસ અધિકારીઓ ઉપરાંત FSL અને ડોગ સ્ક્વોડની ટીમોએ પણ ઘટનાસ્થળે તપાસ હાથ ધરી હતી.
બે દિવસ પહેલાં હત્યા થઈ હોવાની શક્યતા
પોલીસના પ્રાથમિક અનુમાન મુજબ, મૃતકની હત્યા આશરે બે દિવસ પહેલાં થઈ હોઈ શકે છે. પોલીસે પંચનામું કર્યા બાદ ધડને પોસ્ટમોર્ટમ માટે સ્મીમેર હોસ્પિટલ ખસેડ્યું હતું. પોસ્ટમોર્ટમ રિપોર્ટ આવ્યા બાદ મોતનું ચોક્કસ કારણ અને સમય અંગે વધુ સ્પષ્ટતા થઈ શકશે.
મૃતકની ઓળખ મેળવવા પોલીસની તપાસ
હાલ કતારગામ પોલીસ મૃતકની ઓળખ મેળવવા માટે આસપાસના વિસ્તારોમાં છેલ્લા બે-ત્રણ દિવસ દરમિયાન ગુમ થયેલા લોકોની વિગતો તપાસી રહી છે. આ ઉપરાંત કબ્રસ્તાન અને નજીકના વિસ્તારોના CCTV ફૂટેજ પણ ચકાસવામાં આવી રહ્યા છે. મૃતકની ઓળખ, હત્યા પાછળનું કારણ અને આ ઘટનામાં સંડોવાયેલા લોકો અંગે પોલીસ વધુ તપાસ કરી રહી છે.
આ પણ વાંચો: હિંદ મહાસાગરમાંથી મળ્યું 53 લાખ વર્ષ જૂનું વ્હેલ માછલીઓનું સૌથી મોટું કબ્રસ્તાન
આ પણ વાંચો: ડેટિંગ માટે કેફેને બદલે કેમ કબ્રસ્તાન પસંદ કરી રહ્યા છે આજ ના યુવાનો?
આ પણ વાંચો: દુનિયાનું એવું અનોખું કબ્રસ્તાન જ્યાં માણસો નહીં પણ મશીનોને દફનાવવામાં આવે છે!
