Surendranagar News:સુરેન્દ્રનગરમાં જમીનના બિન ખેતી (NA) રૂપાંતરણમાં ચાલતા કથિત 1500 કરોડના કૌભાંડમાં એન્ફોર્સમેન્ટ ડિરેક્ટોરેટ (ED)એ મોટી કાર્યવાહી કરી છે. 23 ડિસેમ્બરે EDની ટીમોએ જિલ્લા કલેક્ટર ડૉ. રાજેન્દ્ર પટેલ, નાયબ મામલતદાર ચંદ્રસિંહ મોરી (Chandrasinh Mori) સહિત અન્ય અધિકારીઓના નિવાસસ્થાને દરોડા પાડ્યા હતા. આ કાર્યવાહીમાં નાયબ મામલતદાર ચંદ્રસિંહ મોરીની ધરપકડ કરવામાં આવી છે, જ્યારે કલેક્ટર રાજેન્દ્ર પટેલની તાત્કાલિક બદલી કરી દેવામાં આવી છે.EDને વિશ્વસનીય સૂત્રો પાસેથી માહિતી મળી હતી કે સુરેન્દ્રનગર કલેક્ટર ઓફિસમાં જમીન NA કરાવવા માટે મોટા પાયે ભ્રષ્ટાચાર ચાલી રહ્યો છે. આ માહિતીના આધારે EDએ 23 ડિસેમ્બરે વહેલી સવારે મહારાષ્ટ્ર, દિલ્હી અને બેંગ્લોરની ટીમો સાથે દરોડા પાડ્યા હતા.
સુરેન્દ્રનગર જિલ્લામાં કરોડો રૂપિયાના જમીન કૌભાંડની તપાસમાં એન્ફોર્સમેન્ટ ડિરેક્ટોરેટ (ED) એ ચોંકાવનારા ખુલાસા કર્યા છે. નાયબ મામલતદાર ચંદ્રસિંહ મોરીની પૂછપરછમાં ભ્રષ્ટાચારના નક્કર પુરાવા મળ્યા છે. તપાસ દરમિયાન, ED એ એક મહત્વપૂર્ણ “ખાતા” (એકાઉન્ટ બુક) જપ્ત કરી છે જે લાંચના વ્યવહારોની સ્પષ્ટ વિગતો આપે છે. એવું બહાર આવ્યું છે કે આ ખાતાવહીમાં કોણે કેટલું કમિશન મેળવ્યું અને કયા મધ્યસ્થી દ્વારા વ્યવહારો થયા તેનો સંપૂર્ણ રેકોર્ડ છે. આ કૌભાંડનું અંદાજિત મૂલ્ય 1500 કરોડ રૂપિયા છે, જેનાથી સમગ્ર રાજ્યના મહેસૂલ વિભાગમાં આંચકો લાગ્યો છે.
સમગ્ર મામલે ACBના DIG મકરંદ ચૌહાણનું નિવેદન
ACBના DIG મકરંદ ચૌહાણના નિવેદન અનુસાર, મળેલી રોકડની ઉત્પત્તિ,કોને આપવાની હતી અને કૌભાંડમાં વધુ કોણ સામેલ છે તે દિશામાં તપાસ તેજ કરવામાં આવી છે. તમામ દસ્તાવેજો અને પુરાવાઓની ચકાસણી ચાલુ છે. ED અને ACB બંને એજન્સીઓ સંયુક્ત રીતે તપાસ કરી રહી છે.આ કૌભાંડમાં વચેટિયાઓ અને વકીલોની સંડોવણીના પણ આરોપ છે, જેની તપાસ ચાલુ છે. આ ઘટનાએ રાજ્યના મહેસૂલ વિભાગમાં ખળભળાટ મચાવી દીધો છે અને વધુ મોટા ખુલાસાઓની શક્યતા છે.
સુરેન્દ્રનગર NA કૌભાંડમાં EDનું એક્શન
નાયબ મામલતદાર ચંદ્રસિંહ મોરીના ઘરેથી 67.50 લાખ રૂપિયાની રોકડ મળી આવી હતી. મોરીએ ઈડી સમક્ષ કબૂલ્યું કે આ રકમ લાંચ તરીકે લેવડ-દેવડમાંથી મળેલી છે. તેમને અમદાવાદની વિશેષ કોર્ટમાં રજૂ કરવામાં આવ્યા, જ્યાં કોર્ટે 1 જાન્યુઆરી 2026 સુધી ED રિમાન્ડ મંજૂર કર્યા હતા.
આ સાથે જ કલેક્ટરના બંગલેથી 100 જેટલી શંકાસ્પદ ફાઈલો જપ્ત કરવામાં આવી હતી. તપાસ દરમિયાન નિયમ વિરુદ્ધ કલેક્ટર ફાઈલો ઘરે લઈ જતા હોવાનું સામે આવ્યું હતું. આપને જણાવી દઈએ દરોડા દરમિયાન એક કાગળ મળ્યો હતો જેમાં લાંચના હિસાબ, કમિશન અને દલાલોના નામનો ઉલ્લેખ હતો.
એવું બહાર આવ્યું છે કે આ કૌભાંડ ઉચ્ચ કક્ષાના અધિકારીઓ સાથે જોડાયેલું છે. નાયબ મામલતદારના નિવેદન અને એકત્ર કરાયેલા પુરાવા અનુસાર, સુરેન્દ્રનગરના તત્કાલીન કલેક્ટર રાજેન્દ્ર પટેલ, તેમના અંગત મદદનીશ (PA) અને એક કારકુન પણ આ ગેરકાયદેસર પ્રવૃત્તિમાં સીધા સંડોવાયેલા હતા. ED ને સરકારી જમીન ખાનગી વ્યક્તિઓને ટ્રાન્સફર કરવામાં અને બિન-કૃષિ (NA) જમીન રૂપાંતર પ્રક્રિયામાં મોટા પાયે ગેરરીતિઓના પુરાવા મળ્યા છે. ED હાલમાં સંડોવાયેલા તમામ નામો અને નાણાકીય વ્યવહારોની સંપૂર્ણ તપાસ કરી રહી છે, અને આગામી દિવસોમાં ઉચ્ચ પ્રોફાઇલ વ્યક્તિઓની ધરપકડ થવાની પ્રબળ શક્યતા છે.
ઈડીના ઇનપુટના આધારે ગુજરાત એન્ટી કરપ્શન બ્યુરો (ACB)એ જિલ્લા કલેક્ટર ડૉ. રાજેન્દ્ર પટેલ,નાયબ મામલતદાર ચંદ્રસિંહ મોરી,કલેક્ટર ઓફિસના ક્લાર્ક મયુર ગોહિલ અને કલેક્ટરના અંગત સચિવ (PA) જયરાજસિંહ ઝાલા સામે FIR નોંધી છે.
દરોડાના 24 કલાકમાં જ રાજ્ય સરકારે કલેક્ટર રાજેન્દ્ર પટેલને પદેથી હટાવીને ‘વેઇટિંગ ઓન પોસ્ટિંગ’ કર્યા છે. જિલ્લા વિકાસ અધિકારી (DDO)ને વધારાનો ચાર્જ સોંપવામાં આવ્યો છે.
તપાસમાં ખુલ્યું છે કે NA અરજીઓને ઝડપી અથવા અનુકૂળ મંજૂરી આપવા માટે અરજદારો પાસેથી લાંચ માંગવામાં આવતી હતી. આમાં દલાલોની ભૂમિકા પણ સામે આવી છે. કૌભાંડનું અંદાજિત મૂલ્ય 1500 કરોડ રૂપિયા છે, જેમાં મોટા પાયે જમીન રૂપાંતરણનો સમાવેશ થાય છે.
