India vs Pakistan T20 World Cup 2026 Boycott: દુનિયાભરના ક્રિકેટ ચાહકો જે મેચની આતુરતાથી રાહ જોઈ રહ્યા હતા તે ભારત-પાકિસ્તાન મેચ પર હવે સંકટના વાદળો છવાયા છે. પાકિસ્તાન સરકારે આગામી 15 ફેબ્રુઆરીના રોજ કોલંબોમાં રમાનારી હાઈ-વોલ્ટેજ મેચનો બહિષ્કાર (Boycott) કરવાની સત્તાવાર જાહેરાત કરી છે.
શા માટે પાકિસ્તાને લીધો આ નિર્ણય?
આ વિવાદના મૂળમાં બાંગ્લાદેશ ક્રિકેટ ટીમ છે. ICC (ઇન્ટરનેશનલ ક્રિકેટ કાઉન્સિલ) એ બાંગ્લાદેશની જગ્યાએ સ્કોટલેન્ડને વર્લ્ડકપમાં એન્ટ્રી આપી છે. આ નિર્ણય પાકિસ્તાનને પસંદ પડ્યો નથી. પાકિસ્તાન સરકારે સોશિયલ મીડિયા (X) પર સ્પષ્ટ કર્યું છે કે તેમની ટીમ આખા વર્લ્ડકપમાં ભાગ લેશે, પરંતુ ભારત સામેની મેચમાં મેદાન પર ઉતરશે નહીં.
બાંગ્લાદેશ વિવાદ શું છે?
બાંગ્લાદેશમાં હિન્દુઓની સ્થિતિને ધ્યાનમાં રાખીને BCCI એ આઈપીએલ (IPL) માંથી મુસ્તફિઝુર રહેમાનને બહાર કર્યો હતો. આના જવાબમાં બાંગ્લાદેશ સરકારે ભારતમાં રમવા અંગે સુરક્ષાની ચિંતા વ્યક્ત કરી હતી. ત્યારબાદ ICC એ બાંગ્લાદેશને ટુર્નામેન્ટમાંથી હટાવી દીધું, જેનો વિરોધ હવે પાકિસ્તાન કરી રહ્યું છે.
T20 World Cup: ભારતને થશે મોટો ફાયદો!
જો પાકિસ્તાન 15 ફેબ્રુઆરીની મેચ રમવા નહીં આવે, તો આઈસીસીના નિયમો મુજબ ટીમ ઇન્ડિયાને સીધા 2 પોઈન્ટ્સ મળી જશે. ગ્રુપ-A માં ભારતની સાથે નામિબિયા, નેધરલેન્ડ્સ અને USA જેવી ટીમો છે. પાકિસ્તાનના બહિષ્કારથી ભારત માટે સુપર-8માં પહોંચવાનો રસ્તો ઘણો સરળ બની જશે.
ICC અને બ્રોડકાસ્ટર્સને મોટું નુકસાન
ભારત-પાકિસ્તાન વચ્ચેની મેચ માત્ર એક રમત પૂરતી સીમિત ન રહેતા કરોડો રૂપિયાના વિશાળ બિઝનેસમાં પરિવર્તિત થઈ ગઈ છે, જે આખા વર્લ્ડકપની કુલ કમાણીમાં અંદાજે 8 થી 10% જેટલો મોટો હિસ્સો ધરાવે છે. જો કોઈ કારણોસર આ મેચ રદ થાય તો બ્રોડકાસ્ટર્સને જાહેરાતોની કમાણીમાં મોટું આર્થિક નુકસાન વેઠવું પડી શકે છે. આ ગંભીરતાને ધ્યાનમાં રાખીને ICC એ PCB ને સ્પષ્ટ ચેતવણી આપી છે કે જો તેઓ આ હાઈ-વોલ્ટેજ મેચનો બહિષ્કાર કરશે, તો તેમની સામે કડક કાયદાકીય અને શિસ્તભંગની કાર્યવાહી કરવામાં આવી શકે છે.
વર્લ્ડકપમાં પાકિસ્તાનનો ફ્લોપ શો
રેકોર્ડની વાત કરીએ તો વર્લ્ડકપમાં પાકિસ્તાન હંમેશા ભારત સામે નબળું સાબિત થયું છે. T20 વર્લ્ડકપમાં બંને વચ્ચે 8 મેચ રમાઈ છે, જેમાંથી ભારત 7 વાર જીત્યું છે. કદાચ હારના ડર કે રાજકીય દબાણ હેઠળ પાકિસ્તાને આ નિર્ણય લીધો હોવાનું પણ ચર્ચાઈ રહ્યું છે.
આ પણ વાંચો: ભારતમાં ટૂંક સમયમાં એકસાથે જોવા મળી શકે છે, ટેસ્ટ અને T-20 ની મજા
આ પણ વાંચો:સમીર વાનખેડે ફરી ચર્ચામાં, શાહરૂખ અને ગૌરી ખાન સામે કેસ દાખલ કર્યો!
