તાઈવાનની કંપની ફોક્સકોને સેમીકન્ડક્ટર બનાવવા માટે વેદાંત સાથેનું તેનું સંયુક્ત સાહસ બંધ કરી દીધું છે. એટલે કે ફોક્સકોન કંપની ભારતમાં સેમિકન્ડક્ટર ચિપ નહીં બનાવે. ગયા વર્ષે સપ્ટેમ્બર 2022માં, ફોક્સકોન અને વેદાંતે ગુજરાતમાં પ્લાન્ટ સ્થાપવા માટે રાજ્ય સરકાર સાથે રૂ. 1.54 લાખ કરોડનો કરાર કર્યો હતો. બંને કંપનીઓ સંયુક્ત રીતે સેમિકન્ડક્ટર અને ડિસ્પ્લે ઉત્પાદન પ્લાન્ટ સ્થાપવાની હતી.ફોક્સકોને ડિલ તોડવાનું કોઈ કારણ જણાવ્યું નથી. વેદાંતે કહ્યું કે તે હવે અન્ય કંપનીઓ સાથે પ્લાન્ટ સ્થાપવા માટે વાતચીત કરી રહી છે. તે જ સમયે, કેન્દ્રીય ઇલેક્ટ્રોનિક્સ અને ટેક્નોલોજી રાજ્ય મંત્રી રાજીવ ચંદ્રશેખરે કહ્યું છે કે ભારત પર તેની કોઈ અસર નહીં થાય.મંત્રીએ કહ્યું કે ફોક્સકોન અને વેદાંત બંને ભારતમાં નોંધપાત્ર રોકાણ ધરાવે છે અને તે મૂલ્યવાન રોકાણકારો છે જે નોકરીઓ અને વૃદ્ધિનું સર્જન કરી રહ્યા છે.
સેમિકન્ડક્ટર ચિપ શું છે?
સેમિકન્ડક્ટર એ સિલિકોનથી બનેલી ચિપ છે. આ સર્કિટમાં વીજળીને નિયંત્રિત કરે છે. સરળ શબ્દોમાં કહીએ તો, સેમિકન્ડક્ટર ચિપ માનવ મગજ જેવી છે, જે સમગ્ર ગેજેટ્સનું સંચાલન કરે છે. દરેક ગેજેટ્સ તેના વિના અધૂરા છે. કોમ્પ્યુટર, લેપટોપ, સ્માર્ટફોન, હોસ્પિટલ મશીન બધે જ વપરાય છે.
વિશ્વ ચીન અને તાઈવાન પર નિર્ભર છે
સેમિકન્ડક્ટર માટે સમગ્ર વિશ્વ ચીન અને તાઈવાન પર નિર્ભર છે. હાલમાં ભારત રૂ. 1.76 લાખ કરોડની આયાત કરે છે. પ્લાન્ટની સ્થાપના સાથે ભારતની ચીન પર નિર્ભરતા ઓછી થશે. તેનાથી નોકરીઓનું સર્જન થશે અને ઈલેક્ટ્રોનિક્સ વસ્તુઓ સસ્તી થશે. સેમિકન્ડક્ટર ઇલેક્ટ્રોનિક્સ વસ્તુઓને આપમેળે ચલાવે છે.
