ફિફા વર્લ્ડ કપ 2022 શરૂ થઈ ગયો છે. હાલમાં અલ બૈત સ્ટેડિયમમાં રંગારંગ કાર્યક્રમ સાથે આરંભ થયો હતો. આ પહેલા સ્ટેડિયમમાં હાજર લગભગ 60 હજાર પ્રશંસકોએ વર્લ્ડ કપ ટ્રોફીની ઝલક જોવા મળી હતી. જે બાદ આ ઓપનિંગ સેરેમની શરૂ થઈ હતી. અલ બાયત સ્ટેડિયમમાં મોટી સંખ્યામાં હાજર પ્રશંસકોના ઘોંઘાટ વચ્ચે કાર્યક્રમ શરૂ થયો. આ દરમિયાન સ્ટેડિયમમાં હાજર પ્રશંસકોનો ઉત્સાહ વધી રહ્યો છે. BTSના K-pop સુપરસ્ટાર જીઓન જંગકુકનો કાર્યક્રમ યાદગાર બની ગયો હતો.
BTS સિંગર જંગ કૂકે તેના નવા ટ્રેક ‘ડ્રીમર્સ’ સાથે ઓપનિંગ સેરેમનીમાં ધમાલ મચાવી હતી. જ્યારે હોલીવુડ સ્ટાર મોર્ગન ફ્રીમેને સમારોહમાં આશા, એકતા અને સહિષ્ણુતાનો સંદેશ આપ્યો હતો. આ સિવાય અલ બૈત સ્ટેડિયમમાં સાંસ્કૃતિક કાર્યક્રમો જોવા મળ્યા હતા. આ સમારોહ પહેલા, ફ્રેંચ દિગ્ગજ માર્સેલ ડિસેલીએ ચાહકોને FIFA વર્લ્ડ કપ 2022ની ટ્રોફી રજૂ કરી હતી.
FIFA વર્લ્ડ કપ 2022ની શરૂઆત થઈ ગઈ છે અને પ્રથમ મેચમાં એક્વાડોરએ યજમાન કતારને 2-0થી હરાવીને શાનદાર શરૂઆત કરી હતી. પહેલા હાફમાં જ એક્વાડોર 2-0થી લીડ મેળવી હતી જે તેના માટે પુરતી સાબિત થઈ હતી. એનર વેલેન્સિયાએ એક્વાડોર માટે બંને ગોલ કર્યા અને પોતાની ટીમને મેચ જીતાડવામાં મહત્વની ભૂમિકા ભજવી. આ સાથે વેલેન્સિયા વર્લ્ડ કપમાં ચાર ગોલ કરનાર ઈક્વાડોર માટે પ્રથમ ખેલાડી બની ગયો છે.
મેચની ત્રીજી મિનિટે એક્વાડોર ગોલ કરીને તેની ઉજવણી કરી હતી, પરંતુ રેફરીએ VAR દ્વારા ગોલ રદ જાહેર કર્યો હતો. આ ગોલ વેલેન્સિયાએ કર્યો હતો અને 16મી મિનિટે તેણે પેનલ્ટી કોર્નરને ગોલમાં ફેરવીને પોતાની ટીમને 1-0થી આગળ કરી હતી. 31મી મિનિટે વેલેન્સિયાએ શાનદાર હેડર કરીને પોતાની ટીમને 2-0થી આગળ કરી દીધી હતી. કતારના સંરક્ષણની ભૂલને કારણે ગોલ થયો હતો કારણ કે કોઈએ વેલેન્સિયાને ચિહ્નિત કર્યું ન હતું.
