શીખ ફોર જસ્ટિસ (SFJ) સાથે કથિત સંબંધો ધરાવતા જસવિન્દર સિંહ મુલતાનીને ભારતીય એજન્સીઓની વિનંતી પર સંબંધિત અધિકારીઓ દ્વારા જર્મનીમાં અટકાયતમાં લેવામાં આવ્યા છે. હવે નેશનલ ઇન્વેસ્ટિગેશન એજન્સી (NIA)ની એક ટીમ લુધિયાણા બ્લાસ્ટ કેસમાં મુલતાનીની પૂછપરછ કરવા માટે જર્મની જશે. NIA મુલતાનીને ભારત લાવવા માટે કાર્યવાહી શરૂ કરશે. પરંતુ તે પહેલા એજન્સી મુલતાની અને અન્ય સામે કેસ નોંધવાની તૈયારીમાં છે.
શીખ ફોર જસ્ટિસ એ ભારતમાં નિયુક્ત આતંકવાદી જૂથ છે. એક અધિકારીએ કહ્યું, “આ ખાલિસ્તાન તરફી (જસવિન્દર સિંહ મુલતાની) પંજાબમાં યુવાનોને કટ્ટરપંથી બનાવી રહ્યો હતો અને આતંકવાદી પ્રવૃત્તિઓનો પ્રચાર કરવા માટે સોશિયલ મીડિયાનો ઉપયોગ કરી રહ્યો હતો. તેની પ્રવૃત્તિઓમાં અચાનક ઉછાળો આવ્યો હતો.”
“મુલતાનીને જર્મન પોલીસ દ્વારા અટકાયતમાં લેવામાં આવી છે અને તેની પૂછપરછ કરવામાં આવી રહી છે,” અધિકારીએ જણાવ્યું હતું. ભારતમાં કેસ નોંધાયા બાદ NIAની એક ટીમ કેસની વિગતવાર પૂછપરછ માટે જર્મની જશે. લુધિયાણા બ્લાસ્ટ કેસમાં મુલતાનીની ભૂમિકાના મજબૂત પુરાવા મળ્યા છે.
ગુપ્તચર એજન્સીઓએ દાવો કર્યો છે કે મુલતાની સમગ્ર ભારતમાં અરાજકતા જેવી સ્થિતિ સર્જવા માંગતો હતો. આ પહેલા બલબીર સિંહ રાજેવાલ સહિત ઘણા ખેડૂત નેતાઓ તેમના હિટ લિસ્ટમાં હતા. તે તેમને મારી નાખવા માંગતો હતો, જેથી આખા દેશમાં નરસંહાર થઈ શકે. પાકિસ્તાનની ISI ભારતમાં લોકોની ભરતી કરવા માટે તેને આર્થિક મદદ કરી રહી છે. મુલતાની આતંકવાદ સહિત અનેક ભારત વિરોધી ઓપરેશન ચલાવતો હતો
