રાજસ્થાન સરકારે તાજેતરમાં કર્મચારીઓ માટે જૂની પેન્શન યોજના લાગુ કરી છે.વિધાનસભામાં બજેટની રજૂઆત દરમિયાન મુખ્યમંત્રી અશોક ગેહલોતે જૂની પેન્શન યોજના લાગુ કરવાની જાહેરાત કરી હતી. સીએમની આ જાહેરાતને લઈને ભારે ચર્ચા થઈ હતી.મુખ્યમંત્રીના આ નિર્ણય બાદ અનેક કર્મચારીઓએ ખુશી વ્યક્ત કરી હતી.
આ પણ વાંચો:યુપીમાં છઠ્ઠા તબક્કાનો પ્રચારનો આજે અંતિમ દિવસ, ગોરખપુરમાં યોગી અને અખિલેશ યાદવની રેલી
સીએમના આ નિર્ણયથી ખુશ જોધપુરના એક શિક્ષકે અનોખી રીતે તેમનો આભાર માન્યો છે. એમ્પ્લોઈઝ યુનિયન યુનાઈટેડ એમ્પ્લોઈઝ ફેડરેશનના નેતા શંભુ સિંહ મેડતિયાએ પોતાના લોહીથી મુખ્યમંત્રીને પત્ર લખ્યો છે. મેડતિયાનો પત્ર સોશિયલ મીડિયા પર પણ ઘણો વાયરલ થયો છે.
તેઓ મુખ્ય પ્રધાનના ગૃહ જિલ્લા જોધપુરના શિક્ષક છે. તેમણે કહ્યું કે આવનારા સમયમાં મુખ્યમંત્રી અશોક ગેહલોત દેશ માટે એક મોટું ઉદાહરણ બનશે. આજે સમગ્ર દેશના કર્મચારીઓની નજર મુખ્યમંત્રીના આ નિર્ણય પર છે. તેમણે કહ્યું કે, તેઓ પોતે જયપુર જશે અને મુખ્યમંત્રીને આ પત્ર આપશે.
આ પત્રમાં મેડતિયાએ જૂની પેન્શન યોજના લાગુ કરવા બદલ મુખ્યમંત્રીનો આભાર માન્યો છે અને તેમના નિર્ણયની પ્રશંસા કરી છે. એટલું જ નહીં, સંઘના નેતાએ ઈચ્છા વ્યક્ત કરી છે કે અશોક ગેહલોત દેશના આગામી વડાપ્રધાન બનવા જોઈએ.
તેમણે કહ્યું છે કે, દેશના આગામી વડાપ્રધાન કોંગ્રેસ તરફથી અશોક ગેહલોત હશે. લોહીથી પત્રો લખવા અંગે પોતાની વાત રાખતા મેડતિયાએ કહ્યું કે, મુખ્યમંત્રીએ જૂની પેન્શન યોજના લાગુ કરીને કર્મચારીઓને માત્ર રાહત જ નથી આપી પરંતુ વૃદ્ધોને પણ તેનાથી રાહત મળી છે. હવે કર્મચારીઓ સારી સ્થિતિમાં જીવી શકશે.
આ પણ વાંચો:યુક્રેનમાં ફસાયેલા ભારતીયો માટે રશિયાએ એડવાઇઝરી જાહેર કરી,સુરક્ષાની આપી બાંયધરી
