China Typhoon Dolphin Alert News: ચીનના પૂર્વી કિનારા તરફ આગળ વધી રહેલું વાવાઝોડું ‘ડોલ્ફિન’(Typhoon Dolphin) હવે તેની અસર બતાવી રહ્યું છે. શનિવારે ઝેજિયાંગ પ્રાંતના હાંગઝોઉ સહિત અનેક વિસ્તારોમાં ભારે વરસાદ નોંધાયો હતો. વાવાઝોડાના ખતરાને ધ્યાનમાં રાખીને શાંઘાઈમાં લગભગ 1300 ફ્લાઈટ્સ રદ કરવામાં આવી છે. સાથે જ મોટી સંખ્યામાં લોકોને સુરક્ષિત સ્થળોએ ખસેડવામાં આવી રહ્યા છે.
હાંગઝોઉમાં ભારે વરસાદ, તંત્ર એલર્ટ
વાવાઝોડું(Typhoon Dolphin) આવે તે પહેલાં જ ચીનના દરિયાકાંઠાના વિસ્તારોમાં સુરક્ષાની તૈયારીઓ શરૂ કરી દેવામાં આવી હતી. હાંગઝોઉના બજારોમાં દુકાનદારોએ ટેન્ટ અને અન્ય અસ્થાયી માળખાં હટાવવાનું શરૂ કર્યું છે. ભારે પવનમાં ઉડીને નુકસાન પહોંચાડી શકે તેવી વસ્તુઓને પણ સુરક્ષિત સ્થળે ખસેડવામાં આવી રહી છે.
162 કિમી પ્રતિ કલાકની ઝડપે પવનની શક્યતા
વાવાઝોડા ડોલ્ફિન(Typhoon Dolphin) સાથે ભારે પવન ફૂંકાઈ રહ્યો છે. તેની ઝડપ લગભગ 162 કિલોમીટર પ્રતિ કલાક સુધી પહોંચી શકે છે. હવામાન વિભાગે ઝેજિયાંગ સહિતના અનેક વિસ્તારોમાં ભારે વરસાદની ચેતવણી આપી છે. કેટલાક વિસ્તારોમાં 500 મિલીમીટર સુધી વરસાદ પડવાની શક્યતા છે. જેના કારણે નીચાણવાળા વિસ્તારોમાં પાણી ભરાવા અને પૂરનું જોખમ વધી શકે છે. પહાડી વિસ્તારોમાં ભૂસ્ખલનની આશંકા પણ વ્યક્ત કરવામાં આવી છે.
1300 ફ્લાઈટ્સ રદ, 500થી વધુ જહાજો ખસેડાયા
વાવાઝોડાની અસર શાંઘાઈના હવાઈ પરિવહન પર પણ પડી છે. હાંગકિયાઓ અને પુડોંગ એરપોર્ટ પરથી લગભગ 1300 ફ્લાઈટ્સ રદ કરવામાં આવી છે. દરિયાઈ વિસ્તારમાં પણ સુરક્ષા વધારી દેવામાં આવી છે. શાંઘાઈના યાંગશાન બંદર પરથી 500થી વધુ જહાજોને સુરક્ષિત સ્થળે ખસેડવામાં આવ્યા છે.
લાખો લોકોને સુરક્ષિત સ્થળે ખસેડાયા
ઝેજિયાંગના તાઈઝોઉ વિસ્તારમાં લગભગ 3.9 લાખ લોકોને સુરક્ષિત સ્થળે ખસેડવામાં આવ્યા છે. તંત્ર દ્વારા ઈમરજન્સી ટીમોને તૈયાર રાખવામાં આવી છે. વાવાઝોડું દરિયાકિનારે અથડાયા બાદ તેની તીવ્રતા ઘટી શકે છે, પરંતુ ભારે વરસાદ ચાલુ રહેવાની શક્યતા છે. તેથી ચીનનું(China) તંત્ર લોકોને સાવચેત રહેવા અને જરૂરી ન હોય તો ઘરની બહાર ન નીકળવાની અપીલ કરી રહ્યું છે.
આ પણ વાંચો:પાકિસ્તાન સરહદે મળી આવી સદીઓ જૂની વસાહત; પુરાતત્વિય સાઇટ પર મોટા ખુલાસા
આ પણ વાંચો:અમેરિકી સાંસદનો ટ્રમ્પ પર ગંભીર આક્ષેપ; ઈરાન યુદ્ધ અને માર્કેટ સાથે રમત રમવાનો દાવો
