Vadodara News: વડોદરામાં આઠમની રાતે પરંપરાગત શેરી ગરબાની જમાવટ જોવા મળી. વરસાદને કારણે મોટા કોમર્શિયલ ગરબા આયોજકોને મુશ્કેલીઓનો સામનો કરવો પડ્યો, પરંતુ શેરી ગરબા પોતાના જ સદાબહાર રંગ સાથે ખીલી ઉઠ્યા.
મોટા આયોજનોમાં વરસાદને કારણે મંડપ તૂટી પડ્યા, પાર્કિંગમાં પાણી ભરાયા અને ટિકિટ આધારિત ગરબાના કાર્યક્રમો રદ કરવાની ફરજ પડી. વડોદરાના જાણીતા આયોજનો જેમ કે VNF, VVN સહિતના મોટા ગરબા વરસાદને કારણે રદ કરાયા. પરંતુ શહેરની શેરીઓમાં નાના સમૂહો દ્વારા આયોજિત પરંપરાગત ગરબા, અડીખમ ભાવના સાથે ચાલુ રહ્યા.
કોમર્શિયલ ગરબાની ભીડ, અવ્યવસ્થાને કારણે લોકોમાં ચિંતા રહેતી હોવા છતાં શેરી ગરબા વધારે સુરક્ષિત અને અનોખો અનુભવ આપી રહ્યા છે. અહીં ભક્તિભાવ સાથે માની પૂજા અને પરંપરાગત તાલમેળ જોવા મળે છે.
આ વર્ષે ખાસ કરીને “દીકરી મારા આંગણે” થીમ વડોદરાના શેરી ગરબામાં અનોખું સ્થાન મેળવી રહી છે. દીકરીને સન્માન અને સમાન અધિકાર આપવાના સંદેશ સાથે આ થીમ સ્થાનિક સ્તરે લોકપ્રિય બની છે.
શેરી ગરબા માત્ર સંગીત અને નૃત્યનો કાર્યક્રમ નથી, પરંતુ એ સમાજને એકસાથે બાંધી રાખવાનો માધ્યમ છે. અહીં લોકો પોતાના પડોશીઓ સાથે માની આરાધના કરે છે, દાદરા-તાળ સાથે પરંપરાગત ગીતો ગાય છે અને પેઢીથી પેઢીને જોડતી પરંપરા જીવંત રહે છે.
વડોદરાના અનેક વિસ્તારોમાં શેરી ગરબામાં ખાસ સુરક્ષા વ્યવસ્થા ગોઠવાઈ હતી જેથી મહિલાઓ અને બાળકો નિરાંતે ઉત્સવનો આનંદ માણી શકે. વરસાદ વચ્ચે પણ શેરી ગરબાએ સાબિત કર્યું કે ભક્તિભાવ અને પરંપરાગત ઉત્સવનો રંગ ક્યારેય ફિકો નથી પડતો. કોમર્શિયલ ગરબા જ્યાં મોડર્ન સજાવટ અને સંગીત પર ભાર મૂકે છે, ત્યાં શેરી ગરબા સમાજના હૃદય સાથે જોડાય છે.
આ પણ વાંચો:મંજૂરી માટે શહેરમાં 66 ગરબા આયોજકોએ અરજી કરી, એકપણ આયોજકને પોલીસે મંજૂરી આપી નથી
આ પણ વાંચો:કેમ યુવાનોમાં વધ્યું ‘OG મંડલી’નું આકર્ષણ?, પારંપારિક ગરબામાં..
આ પણ વાંચો:વડોદરામાં સગીરા પર દુષ્કર્મ, વિધર્મીએ 12 સાયન્સની વિદ્યાર્થીનીને ગરબા રમવા કર્યું દબાણ
