Vadodara News: વડોદરાની ન્યૂ એરા હાઈસ્કૂલમાં (New Era High School) ધોરણ-11ના વિદ્યાર્થી દેવ પ્રશાંત શાહનું ફૂટબોલ રમતી વખતે વીજ કરંટ લાગવાથી મોત (Vadodara Student Death) થયાની ઘટના બાદ વડોદરા પેરેન્ટ્સ એસોસિએશને ગંભીર રજૂઆત કરી છે. એસોસિએશને મુખ્યમંત્રી, શિક્ષણમંત્રી, NCPCR તથા વડોદરા સાંસદને ઈ-મેઈલ કરીને ઘટનામાં યોગ્ય અને કડક કાર્યવાહી કરવાની માંગ કરી છે.
Vadodara Student Death: શાળાની સુરક્ષા વ્યવસ્થા સામે સવાલ
વાલી મંડળે રજૂઆતમાં જણાવ્યું છે કે માતા-પિતા પોતાના બાળકોને સુરક્ષિત વાતાવરણની અપેક્ષા સાથે શાળામાં મોકલે છે. આવી સ્થિતિમાં રમતગમતની પ્રવૃત્તિ દરમિયાન ખુલ્લા અથવા ખામીયુક્ત વાયરના (Electric Shock) કારણે વિદ્યાર્થીનું મોત થવું ગંભીર ચિંતાનો વિષય છે. એસોસિએશનના જણાવ્યા મુજબ, આ ઘટનામાં શાળાની ઇલેક્ટ્રિકલ સેફ્ટી અને જાળવણી વ્યવસ્થાની તપાસ જરૂરી છે.
ઉચ્ચ સ્તરીય સ્વતંત્ર તપાસની માંગ
પેરેન્ટ્સ એસોસિએશને (Parents Association) ઘટનાની ગંભીરતાને ધ્યાનમાં લઈને ઉચ્ચ સ્તરીય સ્વતંત્ર તપાસ કરવાની માંગ કરી છે. સાથે જ શાળાના તમામ ઇલેક્ટ્રિકલ સેફ્ટી સર્ટિફિકેટ, મેન્ટેનન્સ રેકોર્ડ અને મેદાનના CCTV ફૂટેજ સહિતના સંબંધિત ડિજિટલ પુરાવા સુરક્ષિત કરવામાં આવે તેવી રજૂઆત કરાઈ છે.
બેદરકારી સામે ફોજદારી કાર્યવાહી કરવાની માંગ
એસોસિએશને જવાબદાર વ્યક્તિઓ સામે તપાસ બાદ કાયદેસરની અને યોગ્ય ફોજદારી કાર્યવાહી કરવાની માંગ કરી છે. સાથે જ સમગ્ર ઘટનામાં શાળા સંચાલન અને સંબંધિત તંત્રની જવાબદારી નક્કી કરવાની પણ માગણી કરવામાં આવી છે.
આવી દુર્ઘટનાઓનું પુનરાવર્તન અટકાવવા વડોદરા સહિત સમગ્ર ગુજરાતની શાળાઓમાં ફરજિયાત ઇલેક્ટ્રિકલ સેફ્ટી ઓડિટ કરાવવાની માંગ કરવામાં આવી છે. ઓડિટમાં સામે આવતી ખામીઓનું સમયમર્યાદામાં નિવારણ કરાવવામાં આવે તેવી પણ રજૂઆત છે.
પરિવારને વળતર અને કડક માર્ગદર્શિકાની માંગ
વાલી મંડળે શોકગ્રસ્ત પરિવારને યોગ્ય આર્થિક વળતર આપવાની માંગ સાથે બાળકોની સુરક્ષા સુનિશ્ચિત કરવા માટે શાળાઓ માટે વધુ કડક માર્ગદર્શિકા જાહેર કરવાની પણ રજૂઆત કરી છે. એસોસિએશનનું કહેવું છે કે શાળામાં અભ્યાસ અને રમતગમત દરમિયાન બાળકોની સલામતી સર્વોચ્ચ પ્રાથમિકતા હોવી જોઈએ અને સુરક્ષા વ્યવસ્થામાં કોઈ બેદરકારી ન રહે તે માટે જવાબદારી નક્કી કરવી જરૂરી છે.
આ પણ વાંચો: રાણીપ હત્યા કેસમાં 8 આરોપી ઝડપાયા: છત્રાલના ગોડાઉનમાંથી બે સગીર સહિત ધરપકડ, ઘટનાસ્થળે કરાયું પંચનામું
આ પણ વાંચો: ગુજરાતમાં વરસાદ ફરી ખેંચાશે? અલ નીનોની વધતી તાકાતથી ગુજરાત સહિત દેશમાં વરસાદ પર મોટું સંકટ
આ પણ વાંચો: હિંડોળા ઉત્સવની ખુશી પળવારમાં માતમમાં ફેરવાઈ! કાર ફરી વળતાં 5 વર્ષની બાળકીનું કરુણ મોત
