Vapi News: વાપી GIDCમાં આવેલી આર.બી. ઇલેક્ટ્રોનિક એન્ડ એન્જિનિયરિંગ કંપનીમાં બોઈલર સંબંધિત ગંભીર અકસ્માતની ઘટના સામે આવી છે. બોઈલરમાં પ્રેશર લીકેજની સમસ્યા સર્જાતા તેને નિયંત્રિત કરવા ગયેલા એક કામદારનું બ્લાસ્ટ (Vapi GIDC Boiler Blast)માં મોત થયું છે. ઘટનામાં અન્ય એક કામદાર પણ ઘાયલ થયો હોવાનું સામે આવ્યું છે. આ ઘટનાને પગલે કંપનીમાં કામ કરતા કર્મચારીઓની સલામતી અને ઔદ્યોગિક સુરક્ષા વ્યવસ્થા અંગે પણ સવાલો ઊભા થયા છે.
Vapi GIDC Boiler Blast: પ્રેશર લીકેજ રોકવા જતા થયો બ્લાસ્ટ
મળતી માહિતી મુજબ, કંપનીમાં બોઈલર પર કામ કરતા તુષાર જોગારીને બોઈલરમાં પ્રેશર લીકેજ થયાની જાણ થઈ હતી. આ સમસ્યાને રોકવા માટે તુષાર બોઈલર પાસે ગયો હતો. જોકે, તે દરમિયાન અચાનક બ્લાસ્ટ (Vapi GIDC Boiler Blast) થતાં ગંભીર અકસ્માત સર્જાયો હતો. ઘટનામાં તુષારને એટલી ગંભીર ઈજા થઈ કે તેનું ઘટનાસ્થળે જ મોત થયું હતું. તુષાર જોગારી મૂળ ધરમપુરનો રહેવાસી હોવાનું જણાવવામાં આવ્યું છે.
અન્ય એક કામદાર પણ ઘાયલ
બોઈલર બ્લાસ્ટની આ ઘટનામાં અન્ય એક કામદાર પણ ઈજાગ્રસ્ત થયો છે. તેને સારવાર માટે હોસ્પિટલમાં ખસેડવામાં આવ્યો હોવાની માહિતી સામે આવી છે.અકસ્મિક બ્લાસ્ટ (Vapi GIDC Boiler Blast)ના કારણે કંપની પરિસરમાં અફરાતફરીનો માહોલ સર્જાયો હતો.
પરિવારજનોએ કંપની સામે બેદરકારીનો આરોપ લગાવ્યો
તુષારના મોતની જાણ થતાં તેના પરિવારજનો કંપની ખાતે પહોંચ્યા હતા. પરિવારજનોએ કંપનીની કામગીરી અને કામદારોની સુરક્ષા વ્યવસ્થા સામે ગંભીર સવાલો ઉઠાવ્યા છે. પરિવારજનોએ આ ઘટના કંપનીની બેદરકારીના કારણે બની હોવાનો આરોપ લગાવ્યો છે. તેમનું કહેવું છે કે કામદારોની સલામતી માટે જરૂરી વ્યવસ્થા અને સાવચેતી રાખવામાં આવી હોત તો આવી દુર્ઘટના ટાળી શકાઈ હોત.જોકે, કંપની તરફથી આ અંગે સત્તાવાર રીતે શું કહેવામાં આવ્યું છે તે તપાસ બાદ વધુ સ્પષ્ટ થશે.
કામદારોની સુરક્ષા વ્યવસ્થા સામે સવાલ
વાપી GIDCમાં અનેક ઔદ્યોગિક એકમો આવેલા છે ત્યારે બોઈલર જેવી જોખમી મશીનરી સાથે કામ કરતા કર્મચારીઓ માટે સુરક્ષા નિયમોનું પાલન કેટલું થાય છે તે મુદ્દો ફરી ચર્ચામાં આવ્યો છે. બોઈલરમાં પ્રેશર લીકેજ જેવી પરિસ્થિતિ સર્જાય ત્યારે યોગ્ય સુરક્ષા પ્રક્રિયા અને તકેદારી રાખવામાં આવી હતી કે નહીં, તેમજ બ્લાસ્ટ (Vapi GIDC Boiler Blast) પાછળનું ચોક્કસ કારણ શું હતું તે અંગે તપાસ જરૂરી બની છે.
વાપી GIDC પોલીસે તપાસ શરૂ કરી
ઘટનાની જાણ થતાં વાપી GIDC પોલીસે સમગ્ર મામલે તપાસ શરૂ કરી છે. પોલીસ દ્વારા અકસ્માત પાછળનું ચોક્કસ કારણ જાણવા માટે તપાસ હાથ ધરવામાં આવી રહી છે. તપાસ દરમિયાન બોઈલરની સ્થિતિ, સુરક્ષા વ્યવસ્થા અને ઘટનાની પરિસ્થિતિ સહિતના મુદ્દાઓ તપાસવામાં આવશે. પોલીસ તપાસ બાદ જ અકસ્માત અંગે વધુ સત્તાવાર વિગતો સામે આવશે.
આ પણ વાંચો:વાપી GIDCમાં લાગેલી આગમાંથી કંપનીના કાટમાળ નીચેથી મળ્યા મૃતદેહ
આ પણ વાંચો:વાપી GIDCમાં અમદાવાદની ઘટનાનું પુનરાવર્તન થતા રહી ગયું, ૭ કામદારો ગંભીર રૂપે ઘાયલ
આ પણ વાંચો:વાપી જીઆઇડીસીમાં ધડાકા સાથે કેમિકલની કંપનીમા ભીષણ આગ ભભૂકી ઉઠી
