West Bengal News : પશ્ચિમ બંગાળ(Bengal)માં પ્રથમ તબક્કાના મતદાન દરમિયાન અનેક જગ્યાએ તણાવ અને હિંસાની ઘટનાઓ સામે આવી. વિવિધ બેઠકો પર રાજકીય પક્ષોના કાર્યકરો વચ્ચે અથડામણ, પથ્થરમારો અને હંગામાની સ્થિતિ સર્જાઈ. મુખ્ય ઘટનાઓ આ પ્રમાણે છે:
1. કુમારગંજમાં ભાજપ ઉમેદવાર પર હુમલો
દક્ષિણ મિદનાપુરના કુમારગંજ વિસ્તારમાં ભાજપના ઉમેદવાર સુવેન્દુ સરકાર પર હુમલો થયો. પરિસ્થિતિ એવી બની કે તેઓને બચવા માટે સ્થળ પરથી દૂર જવું પડ્યું. તેમની સુરક્ષા ટીમ હોવા છતાં ભીડ દ્વારા ધકામુક્કી અને મારામારી કરવામાં આવી. ઘટનાને લઈને ચૂંટણી પંચે કાર્યવાહી કરવાની સૂચના આપી છે.
2. આસનસોલ સાઉથમાં કારને નિશાન બનાવાઈ
આસનસોલ સાઉથ બેઠક પરથી ભાજપની ઉમેદવાર અગ્નિમિત્રા પોલની કાર પર બર્નપુર વિસ્તારમાં હુમલો થયો. પથ્થરમારાના કારણે વાહનનો કાચ તૂટી ગયો. તે સમયે તેઓ કારમાં હાજર હતા, પરંતુ સદનસીબે ગંભીર ઈજા ટળી.
3. મુર્શિદાબાદમાં અથડામણ અને પથ્થરમારો
મુર્શિદાબાદ જિલ્લાના નૌદા વિસ્તારમાં મતદાન પહેલા જ તણાવ સર્જાયો હતો. બાદમાં AJUPના નેતા હુમાયૂં કબીર સ્થળ પર પહોંચતા તેમના સમર્થકો અને TMC કાર્યકરો વચ્ચે અથડામણ થઈ. બંને પક્ષ વચ્ચે પથ્થરમારો થયો અને પરિસ્થિતિ બેકાબૂ બનતા પોલીસે લાઠીચાર્જ કરીને ભીડને છટકાવી. આ દરમિયાન તેમની કારને પણ નુકસાન પહોંચાડાયું.
4. સિલીગુડીમાં કાર્યકરો વચ્ચે ઝપાઝપી
સિલીગુડીના એક મતદાન કેન્દ્ર બહાર ભાજપ અને TMCના કાર્યકરો વચ્ચે બોલાચાલીથી શરૂઆત થઈ અને પછી ધકામુક્કી સુધી વાત પહોંચી. સુરક્ષા દળોએ તાત્કાલિક હસ્તક્ષેપ કરીને પરિસ્થિતિ કાબૂમાં લીધી.
5. માલદામાં EVM ખામીથી હંગામો
માલદાના એક બૂથ પર EVM મશીનમાં ખામી આવતા મતદારોમાં નારાજગી જોવા મળી. ગુસ્સે ભરાયેલા લોકોએ ચૂંટણી અધિકારીને ઘેરી લીધા. ત્યારબાદ સુરક્ષા દળોએ અધિકારીને સુરક્ષિત રીતે બહાર કાઢ્યા અને સ્થિતિ નિયંત્રણમાં લીધી.
આ તમામ ઘટનાઓ વચ્ચે સુરક્ષા વ્યવસ્થાઓ કડક કરવામાં આવી છે અને ચૂંટણી પ્રક્રિયા શાંતિપૂર્ણ રીતે પૂર્ણ થાય તે માટે પ્રયત્નો ચાલુ છે.
