Viramgam Accident News: લગ્નનો ઉત્સાહ અને ખુશીનો માહોલ અચાનક જ ચિંતામાં ફેરવાઈ જાય તેવી એક ગંભીર ઘટના અમદાવાદ જિલ્લાના વિરમગામ પાસેથી સામે આવી છે. અહીંથી પસાર થઈ રહેલી જાનૈયાઓની એક સ્કોર્પિયો કાર અચાનક બેકાબૂ બનીને હાઈવે પર પલટી ખાઈ ગઈ હતી. આ ગોઝારા અકસ્માતમાં કારમાં સવાર 3 લોકોને ઈજાઓ પહોંચી છે, જેમને તાત્કાલિક હોસ્પિટલ ખસેડવામાં આવ્યા છે.
Viramgam : જાલીસણાથી ભોજવા જઈ રહી હતી જાન
પ્રાપ્ત માહિતી અનુસાર, માંડલ તાલુકાના જાલીસણા ગામથી એક જાન ભોજવા ગામે જવા માટે હરખભેર નીકળી હતી. આ જાનમાં જોડાયેલી એક સ્કોર્પિયો કાર જ્યારે વિરમગામ-બેચરાજી હાઈવે પર આવેલા દસલાણા ગામ નજીકથી પસાર થઈ રહી હતી, ત્યારે અચાનક ચાલકે સ્ટિયરિંગ પરથી કાબૂ ગુમાવી દીધો હતો. બેકાબૂ બનેલી સ્કોર્પિયો રોડ પર જ ધડાકાભેર પલટી મારી ગઈ હતી. અકસ્માત એટલો ભયાનક હતો કે કારના ફુરચા ઊડી ગયા હતા અને અંદર બેઠેલા જાનૈયાઓ ફસાઈ ગયા હતા.
સ્થાનિકોએ દોડી જઈને કર્યું રેસ્ક્યુ
હાઈવે પર કારને પલટી ખાતા જોઈને આસપાસના સ્થાનિકો અને પાછળ આવી રહેલા અન્ય જાનૈયાઓ તાત્કાલિક મદદે દોડી આવ્યા હતા. કારમાં ફસાયેલા ત્રણેય ઈજાગ્રસ્તોને ભારે જહેમત બાદ બહાર કાઢવામાં આવ્યા હતા. ઘટનાસ્થળે તાત્કાલિક 108 એમ્બ્યુલન્સ બોલાવીને તમામ ઈજાગ્રસ્તોને વધુ સારવાર માટે વિરમગામની ખાનગી હોસ્પિટલમાં દાખલ કરવામાં આવ્યા છે.
સદનસીબે મોટી જાનહાનિ ટળી
ખુશીના પ્રસંગે બનેલી આ ઘટનાથી જાનૈયાઓ અને બંને પરિવારોમાં થોડા સમય માટે ગભરાહટ ફેલાઈ ગઈ હતી. જોકે, રાહતની વાત એ છે કે આ ભયાનક અકસ્માતમાં કોઈ જાનહાનિના સમાચાર નથી. ઈજાગ્રસ્તોને સમયસર સારવાર મળી ગઈ હોવાથી મોટી દુર્ઘટના ટળી છે, પરંતુ હાલ તેઓની હાલત નાજુક હોવાનું જાણવા મળ્યું છે.
